ʼE Nātou Leleiʼia Tamatou Fia Lau Ia Te Tohi-Tapu

KO MARIANNA, ʼe ko te Fakamoʼoni ʼa Sehova ʼe nofo ʼi te potu saute ʼo Italia, ʼe taʼu 18 pea ko tona taʼu fakaʼosi ʼi te lisē. ʼE faleako tahi mo te tahi kau tūpulaga Fakamoʼoni.

Neʼe tohi fēnei e Marianna: “Kua hili nei ni ʼu taʼu, ko te meʼa ʼe fai e ʼihi ia mātou ko te lau ʼi te ʼu temi mālōlō ia te kiʼi kaupepa Tou Vakaʼi Ia Te Tohi-Tapu ʼi Te ʼAho Fuli. Ko te potu pe e tahi ʼe mātou lava fai ai ko te ʼu couloirs ʼaē ʼe feōvi mo te pilo ʼo te kau faiako. Neʼe logoaʼa tuʼumaʼu te potu ʼaia. Teitei pe ko te kau faiako fuli neʼe sisio mai kiā mātou mokā nātou fakalaka, pea ko ʼihi neʼe tutuʼu muʼa ʼo vakaʼi peʼe koteā ʼaē neʼe mātou fai. Neʼe ko te faigamālie ʼaia ke mātou tali ki ʼanatou fehuʼi. Teitei pe ʼi te ʼaho fuli, neʼe tuʼu he tagata peʼe ko he fafine faiako ʼo vakaʼi te meʼa ʼaē ʼe mātou fai. Ko te kaugamālie neʼe nonofo ʼo fakalogo ki ʼamatou fai palalau faka Tohi-Tapu pea mo fakahā mai tanatou fakaʼapaʼapa ki tamatou leleiʼia e mātou kau Fakamoʼoni ia te ʼu meʼa fakalaumālie. ʼI te tahi ʼaho, neʼe fakaafe mātou e te tagata ʼaē ʼe hoa ki te pule ʼo te faleako, ke mātou fai palalau ʼi te pilo ʼo te kau faiako.

“ ʼI te sio ʼa taku tagata faiako ki te koga meʼa ʼaē ʼe mātou lau ai te koga tohi ʼo te ʼaho, neʼe ina kole ai leva ki te pule ʼo te faleako peʼe feala hamatou fakaʼaogaʼi he kalasi, ʼe fīmālie age ai te fai ʼo tamatou fai palalau. Neʼe fakagafua mai e te tagata pule ʼo te faleako, pea neʼe vikiʼi mātou e taku tagata faiako ʼi muʼa ʼo te kalasi ki te faʼifaʼitaki lelei ʼe mātou tuku. Neʼe mātou fakafiafia fuli ki te pilivilesio lahi ʼaē ʼe foaki mai e Sehova.”