Neʼe Kua Fakaʼaogaʼi Te Huafa ʼo Te ʼAtua ʼi Te ʼUluaki Tohi-Tapu Faka Siamani

KO TE huafa totonu ʼo te ʼAtua, ko Sehova, ʼe lauʼi afe tona tuʼu ʼi te Tohi-Tapu Faka Siamani Les Saintes Écritures — Traduction du monde nouveau, ʼaē neʼe tā ʼi te taʼu 1971.a Kae mole ko te tohi ʼaia ʼaē neʼe ina ʼuluaki fakaʼaogaʼi te huafa ʼo te ʼAtua. Kua hili kiai taʼu ʼe teitei 500, neʼe kua tuʼu ia te huafa ʼo Sehova ʼi te Tohi-tapu Faka Siamani, ʼaē neʼe tā e te tagata teolosia Katolika ʼiloa ʼe higoa ko Johann Eck.

Neʼe tupu ia Johann Eck ʼi te taʼu 1486, ʼi te potu saute ʼo Siamani. ʼI tona taʼu 24, neʼe liliu ia ko he tagata faiako teolosia ʼi te univelesitē ʼo Ingolstadt, ʼo gāue ai ʼo aʼu ki tana mate ʼi te taʼu 1543. Neʼe maʼuli ia Eck ʼi te temi ʼo Lutelo, pea neʼe nā kaumeʼa lolotoga te kiʼi temi. Kae neʼe liliu leva ia Lutelo ko he tagata takitaki ʼo te fetogi ʼaē neʼe iku ki te fakatuʼu ʼo te Lotu Polotesita, kae ko Eck neʼe lagolago ki te Lotu Katolika.

Ko te tama ʼaliki ʼo Bavaria neʼe ina fekauʼi ia Eck ke ina fakaliliu te Tohi-Tapu ki te lea Faka Siamani, pea neʼe tā tana fakaliliu ʼaia ʼo te Tohi-Tapu ʼi te taʼu 1537. ʼE ʼui fēnei ʼi te Kirchliches Handlexikon, neʼe mulimuli lelei tana fai fakaliliu ki te ʼu ʼuluaki tohi ʼo te Tohi-Tapu pea “ ʼe tāu ke faka maʼuhigaʼi lahi age.” ʼE tou lau fēnei te fai fakaliliu ʼa Eck iā Ekesote 6:3: “Ko au te ʼAliki ʼaē neʼe au ʼasi kiā Apalahamo, mo Isaake pea mo Sakopo ʼi tona ʼuhiga ʼAtua Māfimāfi: pea ko toku huafa ʼaē ko Adonai, neʼe mole au fakahā kiā nātou.” Pea neʼe tohi e Eck ia te manatu ʼaenī ʼo ʼuhiga mo te vaega ʼaia: “Te huafa ko Adonai Jehoua.” Tokolahi te hahaʼi sivi Tohi-Tapu ʼe nātou tui neʼe ko te temi ʼaia ʼaē neʼe hoki fakaʼaogaʼi ai ia te huafa ʼo te ʼAtua ʼi te Tohi-Tapu Faka Siamani.

Kae neʼe kua lauʼi afe taʼu te kua ʼiloʼi pea mo fakaʼaogaʼi ia te huafa ʼo te ʼAtua. Kua fualoa ia tona fakaʼaogaʼi ʼi te lea Faka Hepeleo te huafa ko “Sehova” moʼo hinoʼi te ʼAtua moʼoni. (Teutalonome 6:4) Kua hili kiai taʼu ʼe teitei 2 000, ko te ʼu palalau ʼa Sesu ʼaē neʼe ina fakahā ai te huafa ʼo te ʼAtua neʼe tohi ʼi te lea Faka Keleka. (Soane 17:6) Talu mai ai, ko tona huafa neʼe tā ʼi te ʼu lea kehekehe, pea ʼo mulimuli kiā Pesalemo 83:​18, kua vave pe anai te ʼiloʼi e te hahaʼi ko ia ʼaē ko tona huafa ko Sehova, ʼe ko ia te Māʼoluga ʼAupito ʼi te kele kātoa.

[Kiʼi nota]

[Paki ʼo te pasina 32]

Ko te Tohi-Tapu ʼa Eck ʼaē neʼe tā ʼi te taʼu 1558, ʼaki te kiʼi nota ʼo ʼuhiga mo te huafa ʼo Sehova ʼaē iā Ekesote 6:3