“Ko Nātou ʼAē ʼe Hihifo Ki Te Tai ʼi Te ʼu Vaka”
ʼO HAGA mai ki te ʼuafu ʼo Gloucester, Massachusetts, ʼi ʼAmelika, ʼe tuʼu ai te fakatātā kapa ʼo te tagata ʼe ina foe tona vaka ʼi te afā. Ko te fakatātā ʼaia ʼe ko he fakamanatu ki te ʼu lauʼi afe kau tautai ʼiloa ʼo Gloucester, ʼaē neʼe mamate ʼi te tai. ʼI te tafitoʼaga ʼo te fakatātā pea mo te lauʼi maka fakamanatu ʼaē ʼe tuʼu ōvi kiai, ʼe tohi ai te ʼu kupu ʼo te Pesalemo 107:23, 24: “Ko nātou ʼaē ʼe hihifo ki te tai ʼi te ʼu vaka, ʼaē ʼe nātou fai koloā ʼi te ʼu tai lalahi; ko nātou ʼaia ʼe nātou sisio ki te ʼu gāue ʼa te ʼAliki, pea mo tana ʼu gāue fakaofoofo ʼi te loloto.”—King James Version.
Ko te gelu ʼi te ʼu loto tai ikaʼia ʼo te tai Atlantique, ʼe ko he gāue ʼe kita lava tuʼutāmaki ai. Lolotoga te ʼu taʼu, ʼi te hahaʼi e toko 30 000 ʼo te kolo ʼo Gloucester, ko te toko 5 368 tagata mai ai neʼe mamate lolotoga tanatou gelu ʼi te tai. ʼE tohi ʼi te lauʼi maka fakamanatu: “Ko ʼihi neʼe tō fakapunamaʼuli kiā nātou te ʼu tuʼani matagi pea mo te ʼu peau lalahi ʼo te afā mai te potu noleto-esite. Ko ʼihi neʼe nātou mamate ʼi te kiʼi vaka neʼe hēhē mai te vaka ʼaē neʼe ina ʼave nātou ki te potu tai ʼaē neʼe nātou gelu ai. Ko ʼihi vaka neʼe nātou feʼīʼaki ʼi te ʼu afā ʼo nātou moū ai. Ko ʼihi vaka neʼe fakaʼī e te ʼu vaka afi ʼi te ʼu ala ʼaē ʼe fakaʼaogaʼi māhani e te ʼu vaka.”
Ko te tuʼu ʼa te fakatātā ʼo te fakamanatu, ʼe ko he fakamoʼoni ki te ʼu ʼaluʼaga fakaʼofaʼofa ʼa te kau tautai, te kinakina ʼo tanatou gāue pea mo te ʼu tuʼutāmaki ʼaē neʼe hoko kiā nātou talu mai te ʼu sēkulō. Koutou fakakaukauʼi age muʼa ki te ʼu hahaʼi ʼaē neʼe fetāgihi, heʼe kua mamate ʼonatou ʼohoana, tanatou ʼu tāmai, tonatou ʼu tēhina, pea mo tonatou ʼu foha. Kae ʼe mole galoʼi ʼe Sehova ʼAtua te ʼu vītua, pea mo te ʼu fānau ʼaē ʼe hala mo tāmai pea mo faʼē peʼe ko nātou ʼaē neʼe mamate ʼi te tai. Neʼe fakahā e te ʼapositolo ko Soane ia te meʼa ʼaē ka hoko anai ʼi te ka haʼu: “Neʼe liufaki e te tai te kau mate ʼaē neʼe iā te ia, pea neʼe liufaki e te mate pea mo te Hatesi te kau mate ʼaē neʼe iā nāua.” (Apokalipesi 20:13, MN ) Ko nātou ʼaē neʼe “hihifo ki te tai ʼi te ʼu vaka,” ʼe nātou sisio anai ki “te ʼu gāue [fakaofoofo] ʼa te ʼAliki” ʼi te temi ʼo tonatou fakatuʼuake.