ʼE Koutou Hage Koa Ko He Fuʼu Lagani Auna?

ʼI TE kiʼi kolo ʼi tuʼa atu ʼo Port Moresby, ʼi Papua Niu Kini, ko te ʼu Fakamoʼoni e toko lua neʼe nā liliu ki tonā ʼapi ʼi tanā ʼosi fai faka mafola. ʼI tanā liliu ʼaia, neʼe nā sio ki te fuʼu ʼakau matalelei. Neʼe ʼui e te Fakamoʼoni kua matuʼa: “Sio, ki te fuʼu lagani auna!” Pea neʼe haga age ki te tūpulaga, ʼo ina ʼui fēnei age: “Ko te faka ʼuhiga ʼo te higoa ʼaia ‘ ʼe ko he fuʼu ʼakau ʼo te taʼu fuli.’ ʼE mole hage ko te ʼu fuʼu ʼakau fuli ʼaē, koteʼuhi ʼi te taʼu fuli ʼe fakatō lau pea ʼe hage ia kua mate. Kae ka ʼua, pea ʼe toe tala muko, ʼo fisi, pea ʼe toe liliu ʼo matalelei.”

ʼE ʼi ai te ako ʼe tou lava tāʼofi mai te fuʼu ʼakau ʼaia ko te lagani auna. ʼI te maʼu ʼa ʼihi hahaʼi popoto, ʼe kau te fuʼu ʼakau ʼaia ʼi te ʼu fuʼu ʼakau e nima ʼi te malamanei kātoa ʼaē ʼe matalelei ʼaupito mokā fisi. Tatau aipe peʼe maʼofa ʼona fisiʼi teu pea mo fakatō lau lolotoga te temi vela, ʼe ina tāʼofi te vai. Ko ʼona ʼaka ʼe mālohi, pea ʼe nā lava takatakai te ʼu maka ʼaē ʼe tuʼu loloto ʼi te lalo kele. Koia ʼe faigataʼa hona taʼaki e he ʼu matagi lalahi. ʼE hoko atu pe tona maʼuli logola te ʼu ʼaluʼaga faigataʼa.

ʼE lagi feala pe ke tou tau mo he ʼu ʼaluʼaga ʼe ʼahiʼahiʼi ai te mālohi ʼo tatatou tui. Koteā anai ka tokoni mai ke tou faʼa kātaki? Ohage pe ko te fuʼu ʼakau ʼaē ko te lagani auna, ʼi hona ʼaluʼaga fakatā ʼe tou lava ʼiʼinu pea mo taupau maʼu te vai ʼaē ʼe ina foaki te maʼuli, ʼaē ko te Folafola ʼa te ʼAtua. ʼE tonu foki ke tou toe pipiki mālohi ki ‘totatou maka,’ ʼaē ko Sehova, ʼo feiā mo tana kautahi. (2 Samuele 22:3) Ko te fuʼu ʼakau ʼaē ko te lagani auna ʼe ina fakamanatu lelei mai, logola he faigataʼaʼia ʼe tou felāveʼi mo ia, ʼe tou lava taupau totatou mālohi pea mo totatou matalelei fakalaumālie, mo kapau ʼe tou fakaʼaogaʼi lelei te tokoni ʼaē ʼe foaki mai e Sehova. Kapau ʼe tou fai ia te faʼahi ʼaia, ʼe tou ‘maʼu tofiʼa anai ia tana ʼu fakapapau,’ ʼaē ʼe kau ai ia te fakapapau ʼo te maʼuli heʼegata.​—Hepeleo 6:12; Apokalipesi 21:4.