ʼE Gafua Ke ʼi Ai Hota Higoa

KO TE hahaʼi fuli ʼe ʼi ai tonatou higoa. ʼI Tahisi, ʼe foaki he higoa ki he kiʼi tamasiʼi neʼe līʼaki e tana ʼu mātuʼa, kae ʼe mole ʼiloʼi tonā ʼu higoa. Ko te lameli ʼe ina foaki anai ki ai hona kiʼi higoa veliveli pea mo hona matuʼa higoa.

Kae ʼe ʼi ai te tokotahi neʼe mole fakagafua age, ohage ko te gafua ki te hahaʼi fuli, ke ʼi ai hona higoa. Pea ʼe ko he meʼa faka punamaʼuli, heʼe ko ia “te Tāmai aē ʼe maʼu mai ai te higoa ʼo te famili kātoa ʼaē ʼi selo pea mo ʼaē ʼi te kele”! (Efeso 3:​14, 15, MN ) Heʼe tokolahi te hahaʼi ʼe mole nātou fia fakaʼaogaʼi ia te huafa ʼo te Tupuʼaga aē ʼe tuʼu ʼi te Tohi Tapu. ʼE natou leleiʼia age nātou te fetogi ʼaki te ʼu higoa faka tuʼulaga ohage ko te “ ʼAtua,” “te ʼAliki,” peʼe ko “te Eteleno.” Kae ʼe ko tona huafa koa ʼaia? ʼE tali fēnei e te tagata fai Pesalemo: “Ko koe, ʼaē ko tou huafa ko Sehova, ʼe ko koe tokotahi pe, te Māʼoluga ʼAupito ʼi te kele kātoa.”​—Pesalemo 83:⁠18.

ʼI te ʼuluaki vaelua ʼo te 19 sēkulō, ʼi te temi aē neʼe ʼōmai ai te kau misionea mai Pilitania ki Tahisi, neʼe lahi te ʼu taulaʼatua ʼaē neʼe tauhi ki ai ia te kau Polinesia. Pea ko te ʼu taulaʼatua ʼaia neʼe takitahi mo tona higoa, pea ko te ʼu taulaʼatua tāfito neʼe ko Olo pea mo Taʼaloa. Moʼo fakakeheʼi te ʼAtua ʼo te Tohi-Tapu pea mo tonatou ʼu taulaʼatua, neʼe fakaʼaogaʼi lahi e te kau misionea ʼaia ia te Huafa ʼo te ʼAtua, ʼo natou fakaliliu faka Tahisi ko Iehova.

Neʼe tupu ai te ʼiloʼi lelei ʼo te Huafa aia pea neʼe fakaʼaogaʼi ʼi te ʼaho fuli ʼi tanatou ʼu fai palalau, pea mo tanatou ʼu faitohi. Ko te Hau ʼo Tahisi ko Pomale 2, aē neʼe ʼafio ʼi te kamata ʼo te 19 sēkulō, neʼe ina fakaʼaogaʼi tuʼumaʼu ia te Huafa ʼaia ʼi tana ʼu faitohi. ʼI tana tohi ʼaē ʼe tuʼu ʼi te pāki, ʼe fakamoʼoni ki te faʼahi ʼaia. ʼE ko he tohi Fakapilitānia, pea ʼe tuku nei ʼi te Fale Tānakiʼaga Mātaga ʼo Tahisi mo ʼona motu. ʼE hā ʼaki mai te tohi ʼaia, neʼe tali leleiʼi e te hahaʼi ia te fakaʼaogaʼi ʼo te Huafa ʼo te ʼAtua ʼi te temi ʼaia. Pea tahi, ʼe lauʼi afe te tuʼu ʼaē ʼo te Huafa ʼo te ʼAtua ʼi te ʼuluaki Tohi-Tapu faka Tahisi, aē neʼe fakaʼosi tona tā ʼi te taʼu 1835.

[Paki ʼo te pasina 32]

Te Hau ko Pomale 2

[Haʼuʼaga ʼo te paki pasina 32]

King and letter: Collection du Musée de Tahiti et de ses Îles, Punaauia, Tahiti