“He Koʼe ʼe Tou Māʼuʼuli ʼi Te Kele?”
KO TE tagata ko Elie Wiesel, neʼe ina maʼu te prix Nobel pea neʼe hāo ʼi te fakapōgi ʼo te kau Sutea e te kau Nasi, neʼe talanoa ʼi te tahi ʼaho ki “te fehuʼi maʼuhiga neʼe kumi e te tagata tona tali kiai.” Ko te fehuʼi fea? Ko te fehuʼi ʼaenī: “He koʼe ʼe tou māʼuʼuli ʼi te kele?”
Neʼe kua kotou fai koa te fehuʼi ʼaia? Tokolahi te hahaʼi kua natou fai te fehuʼi ʼaia, kae mole heʼeki natou ʼiloʼi lelei tona tali. ʼI tana fakaʼamu ʼaē ke mahino ki te ʼuhiga ʼo te maʼuli, ko te tagata fai hisitolia Pilitania ko Arnold Toynbee, neʼe ina tohi fēnei: “Neʼe faʼu tāfito ia te tagata ke faka kolōliaʼi ki te ʼAtua pea mo maʼuli fiafia ʼi tana tauhi ʼo heʼegata kiā te Ia.”
Tahi ʼaē meʼa, kua hili kiai taʼu e tolu afe, ko te tahi tagata neʼe logona ʼuhi ko tana sivisivi ia te maʼuli, neʼe kua mahino ki te tali ʼo te fehuʼi maʼuhiga ʼaia. Neʼe ʼui fēnei e te Hau Poto ko Salomone: “Ko te manatu fakaʼosi ʼo ʼuhiga mo te faʼahi ʼaia, mai tona ʼaluʼaga ʼaē kua tou fagono kiā meʼa fuli: Manavasiʼi ki te ʼAtua moʼoni pea mo taupau tana ʼu fakatotonu. He koʼenā te maʼua kātoa ʼo te tagata.”—Tagata Tānaki 12:13.
Ko te manatu maʼuhiga ʼaia neʼe toe lagolago kiai ia te ʼAlo ʼo te ʼAtua ia Sesu Kilisito. ʼI tana kei maʼuli ʼi te kele, neʼe faiga mālohi ia Sesu ke ina faka kolōliaʼi tana Tamai ʼaē ʼe ʼi selō. Neʼe koloaʼia te maʼuli ʼo Sesu ʼi tana tauhi ki tona Tupuʼaga. Ko te faʼahi ʼaia neʼe ina fafaga pea mo tokoni kiā te ia, ʼo feala ai hana ʼui: “Ko taku meakai e ko taku fai te finegalo o ia ae nee ina fekaui au.”—Soane 4:34.
Koia, he koʼe ʼe tou māʼuʼuli ʼi te kele? Ohage ko Sesu, mo Salomone pea mo te tahi ʼu kaugana e tokolahi ʼa te ʼAtua, ʼe tou lava ʼiloʼi ia te ʼuhiga moʼoni ʼo te maʼuli pea mo te fiafia heʼegata ʼaki te fai ʼo te finegalo ʼo te ʼAtua. ʼE kotou fia ʼiloʼi lahi age koa peʼe feafeaʼi te tauhi ki te ʼAtua “i te mooni mo te laumalie”? (Soane 4:24) ʼE fiafia anai ia te kau Fakamoʼoni ʼa Sehova ʼo tokotou telituale ʼi te tokoni atu kiā koutou ke kotou maʼu ia te tali ki te fehuʼi ʼaenī: “He koʼe ʼe tou māʼuʼuli ʼi te kele?”