ʼU Tūpulaga Ke Malave Takotou Aga Ki Te Loto ʼo Takotou ʼu Mātuʼa
“E MOLE lahiʼage toku fiafia ki niʼihiʼage mea i te mea aeni, i taku logo e mauli aku fanau i te mooni.” (3 Soane 4) ʼI te vaega ʼaenī ʼe faka ʼuhiga tāfito ia te kupu fānau ki te ʼu tisipulo, kae ʼe feala pē ke faka ʼuhiga e he ʼu mātuʼa ʼe manavasiʼi ki te ʼAtua ia te ʼu palalau ʼaia ʼa Soane kiā nāua. Ohagē pē ko te ʼu mātuʼa ʼe natou fai he ʼu meʼa ke malave ki te maʼuli ʼo tanatou ʼu fānau, ʼo toe fēia pē mo te fānau ʼe natou fai he ʼu meʼa ʼe malave anai ki te maʼuli ʼo tanatou ʼu mātuʼa.
Neʼe fakatokagaʼi e te Hau ko Salomone ʼo Iselaele, ko te aga ʼa te fānau ʼe feala ke malave ki te maʼuli ʼo tanatou ʼu mātuʼa. Neʼe ina tohi fēnei: “Ko te foha poto, ʼe ina fakafiafia te tamai, pea ki he tama vale ʼe ko he fakaloto mamahi ia ʼo tana faʼē.” (Tāʼaga Lea 10:1) Koia ʼaē ʼe tonu ai ki te fānau fuli mo nātou kua lalahi, ke natou vakavakaʼi te ikuʼaga ʼo te ʼu meʼa ʼaē ʼe natou fai ki te maʼuli ʼo tanatou tamai pea mo tanatou faʼē. He koʼē ʼe maʼuhiga ia te faʼahi ʼaia?
Kotou fakakaukauʼi age muʼa te tokaga lahi ʼaē neʼe fai atu e takotou ʼu mātuʼa ʼe manavasiʼi ki te ʼAtua moʼo pusiʼaki ʼo koutou! ʼI muʼa ʼo takotou tutupu ake, neʼe kua natou hoha pea mo faikole maʼa koutou. ʼI takotou kua tutupu ake leva, ko takotou tamai pea mo takotou faʼē neʼe nā maʼu te ʼu felōgoi lelei mo koe pea mahino ia neʼe nā fakafetaʼi ki te ʼAtua ki te pilivilēsio pea mo tonā maʼua lahi mo maʼuhiga ʼaē kua nā maʼu, ʼi tonā ʼuhiga mātuʼa. Kua nā nonofo leva mo te maʼua ʼaē ke nā tokaga ki te kiʼi tamasiʼi veliveli pea mo tokoni kiai, pea ʼi tonā ʼuhiga kaugana ʼa Sehova, ʼe nā fakahoko fakalelei tonā maʼua ʼaia.
Mai tona ʼaluʼaga ʼaē ko takotou ʼu mātuʼa ʼe ko he ʼu Kilisitiano moʼoni, neʼe nā kumi tokoni ki te Tohi-Tapu pea mo te ʼu tohi faka Tohi-Tapu moʼo takitaki nāua, pea mo toe kumi tokoni kiā nātou ʼaē neʼe kua natou pusiʼaki tanatou ʼu fānau. Pea ʼi te faikole neʼe nā kole pē ki te ʼAtua ke tokoni mai kiā nāua. (Kau Tui Fakamāu 13:8) ʼI takotou lahilahi ake, neʼe sio takotou ʼu mātuʼa ki tokotou ʼu puani mālohi, kae neʼe nā toe fakatokagaʼi pē mo tokotou ʼu puani vaivai. (Sopo 1:5) ʼI tokotou temi tūpulaga, neʼe toe hoko ai te ʼu fetogi kiā koutou. Pea ʼi ʼihi temi, lagi neʼe kotou ʼuigataʼa, pea neʼe toe ʼaoga ai ki takotou ʼu mātuʼa ke lahi age tanatou ʼu faikole, mo tanatou lautohi, pea mo tanatou fakakaukauʼi ki te tokoni ʼaē ke natou foaki atu moʼo hoko atu takotou tauhi ʼaē ki tokotou Tamai ʼe ʼi selō, ko Sehova.
Neʼe mole he lakaga neʼe situʼa ai takotou ʼu mātuʼa ki tonatou ʼu maʼua ʼaē ko he faʼē pea mo he tamai. Māʼiapē lā takotou kua lalahi kae ʼe kei hoko atu pē tanatou tokaga ki tokotou maʼuli fimālie ʼi te faʼahi fakasino, fakaʼatamai, fakaloto, pea mo fakalaumālie. Kae ʼi tanatou pusiʼaki koutou pea mo te temi ʼaē kua koutou lalahi ai, ʼe ʼiloʼi e takotou ʼu mātuʼa ʼe kotou maʼu te loto faʼitaliha pea ʼe mole feala ke ʼiloʼi papau, pe koteā ʼaē kā hoko ki tokotou maʼuli. Pea ki muli age leva, ʼe fakalogo pē anai kiā koutou tokotou maʼuli.
“ʼE mole [koa lā] lahiʼage [te] fiafia” ʼa te ʼu mātuʼa ʼi tanatou logo ʼaē ko tanatou fānau ʼe natou “mauli . . . i te mooni,” pea mo natou lotomamahi anai mo kapau ʼe mole hoko fēia? ʼIo, ko te fānau ʼaē ʼe agavale ʼe natou fakatupu lotomamahi ki ʼanatou mātuʼa. Neʼe ʼui fēnei e Salomone: “Ko he foha ʼe agavale, ʼe ko he meʼa fakatupu mamahi ia ki tana tamai, pea ʼe ko he meʼa fakatupu ogosia kiā ia ʼaē neʼe ina fānauʼi.” (Tāʼaga Lea 17:25) ʼI meʼa fakaloto mamahiē ki he ʼu mātuʼa mokā mavae hanā tamasiʼi ʼi te tauhi ʼo te ʼAtua moʼoni!
ʼE hā mai, ʼu fānau ʼe malave mālohi takotou aga ki te maʼuli ʼo tokotou fāmili pea mo ʼihi atu. ʼE malave ʼaupitō takotou aga ki te loto ʼo takotou ʼu mātuʼa. Kapau ʼe kotou situʼa ki te tokoni ʼa te ʼAtua pea mo tana ʼu pelesepeto, ʼe lotomamahi anai takotou ʼu mātuʼa. Kae ʼe nā fiafia anai mo kapau ʼe kotou fakalogo ki te ʼAtua. Kapau ʼe kotou haga nofo agatonu pea mo fakalogo kiā Sehova, ʼe fiafia anai takotou ʼu mātuʼa. Kotou faiga mālohi ke kotou fakafiafia ia te loto ʼo takotou ʼu mātuʼa! Koteā lā he meʼa ʼofa ʼe maʼuhiga age ke kotou foaki kiā nātou ʼaē neʼe natou pusiʼaki kiā koutou, mo puipui koutou, pea mo ʼofa kiā koutou?