Neʼe ʼi Ai Koa He Tohi-Tapu ʼa Sesu?
KAILOA ia, neʼe mole ʼi ai hana Tohi-Tapu ʼa ia totonu. Koteā tona tupuʼaga? Heʼe ko te Tohi-Tapu kātoa ʼaē ʼe tou maʼu iā ʼaho nei, neʼe mole heʼeki maʼu ia ʼi te temi ʼo Sesu. Kae ʼi te ʼu sinakoka neʼe ʼi ai te ʼu takaiga tohi ʼo te ʼu tohi ʼaē kua liliu ʼo kau ki te Tohi-Tapu ʼaē ʼe tou maʼu ʼi te temi nei. Neʼe lau e Sesu ia te takaiga tohi ʼa Isaia ʼi te sinakoka ʼo Nasaleti. (Luka 4:16, 17) Neʼe logo te ʼapositolo ko Paulo ki “te lau o te tohi o te lao mo te tohi a te kau polofeta” ʼi Atioke ʼi Pisitia. (Gāue 13:14, 15, Tauhi Foou) Pea neʼe ʼui e te tisipulo ko Sake ko te ʼu tohi ʼa Moisese “neʼe lau leʼo lahi ʼi te ʼu sinakoka ʼi te sāpato fuli.”—Gāue 15:21.
Neʼe ʼi ai koa he ʼu hahaʼi ʼi te ʼuluaki sēkulō neʼe natou maʼu tanatou ʼu takaiga tohi ʼo te ʼu Tohi Taputapu? ʼE ʼiloga ia neʼe maʼu e te tagata Enuke Etiopea ʼo te fale hau ʼo te Fineʼaliki ko Kanatake tana ʼu takaiga tohi, koteʼuhi ʼi te temi ʼaē neʼe felāveʼi ai ia te tisipulo ko Filipo mo ia ʼi te ala ʼaē ki Kasa, neʼe “heka i tana saliote mo lau te tohi a te polofeta ko Isaia.” (Gāue 8:26-30, Tauhi Foou) Neʼe kole e te ʼapositolo ko Paulo kiā Timoteo ke ʼalu age mo “te u tohi kae tafito te u tohi kiliʼi manu.” (2 Timoteo 4:13, Tauhi Foou) Logolā neʼe mole ʼui age e Paulo peʼe ko te ʼu takaiga tohi fea, kae ʼe mahino papau ia neʼe ko he ʼu koga ʼo te ʼu Tohi Faka Hepeleo.
ʼE ʼui e te polofesea ʼo te ʼu lea faka Sutea ko Alan Millard, ʼi te kau Sutea, ko nātou pē ʼaē neʼe ʼi ai tanatou takaiga tohi ʼo te ʼu Tohi Taputapu, neʼe “ko te ʼu faʼahiga tagata makehe ʼi Palesitina, mo nātou fuli ʼaē neʼe natou lau ko nātou ko te ʼu hahaʼi popoto, mo ʼihi ʼo te kau Faliseo, pea mo te kau faiako ohagē ko Nikotemo.” Ko tona tupuʼaga ʼaē he neʼe totogi kovi. ʼE fakafuafua e Millard “ko he tohi pē e tahi ʼa Isaia ko tona totogi ko tenalio e ono, peʼe ko tenalio e hogofulu,” pea mo ina ʼui kapau ʼe tonu ke maʼu kātoa ia te Tohi-Tapu Faka Hepeleo, “ko ʼana takaiga tohi e 15 peʼe kaku ki te 20,” pea ko tona totogi ko te totogi ʼo te ʼu māhina gāue e ono.
ʼE mole ʼui ʼi te Tohi-Tapu pe neʼe ʼi ai he ʼu takaiga tohi ʼo te Tohi-Tapu ʼa Sesu peʼe ko tana ʼu tisipulo. Kae ʼe mahino papau ia, ko Sesu neʼe ina ʼiloʼi lelei ia te Tohi-Tapu, pea neʼe feala ke talanoa peʼe ina fakamatala fakaʼatamai ia he ʼu vaega faka Tohi-Tapu. (Mateo 4:4, 7, 10; 19:4, 5) ʼE mole koa lā tonu ke uga ai ia tātou iā ʼaho nei ke tou ʼiloʼi lelei ia te Tohi-Tapu, heʼe mole totogi kovi pea ʼe maʼu gafua?