Kotou Fakaovi Ki Te ʼAtua

Ko He Kaumeʼa ʼo Te Faitotonu

Hepeleo 10:26-31

NEʼE heʼeki fai atu koa e he tahi he aga heʼe faitotonu kiā koutou pe neʼe agamālohi atu, lagi ko he tahi neʼe mole fakatūʼā pea neʼe mole fakahemala ki tana aga ʼaia kiā koutou? ʼE lahi ʼaupitō age hata lotomamahi ʼi he taʼi aga heʼe faitotonu fēia, tāfito lā mo kapau neʼe fakamamahiʼi koutou e he tahi neʼe kotou ʼamanaki ʼe ʼofa kiā koutou pea mo tokaga kiā koutou. ʼE lagi kotou feʼekeʼaki anai fēnei: ‘He koʼē ʼe fakagafua e te ʼAtua ia he ʼu meʼa fēia ke hoko?’a ʼI tona fakahagatonu, ko Sehova ʼAtua ʼe fehiʼa ia ki te ʼu aga heʼe faitotonu fuli. ʼI tana Folafola, ia te Tohi-Tapu, ʼe ina fakapapau mai ko nātou fuli ʼaē ʼe natou māʼuʼuli ʼi te agahala, ʼe mole natou hao anai mai te tautea fakaʼatua. Tou vakaʼi age muʼa ia te ʼu palalau ʼa te ʼapositolo ko Paulo ʼaē iā Hepeleo 10:26-31.

ʼE tohi fēnei e Paulo: “Kapau ʼe tou maʼuliʼi te agahala ʼaki totatou loto kātoa ʼi tatatou kua ʼosi maʼu ia te ʼatamai mālama totonu ʼo te moʼoni, ʼe mole kei maʼu he sākilifisio ʼo ʼuhiga mo te ʼu agahala.” (Vaega 26) Ko te hahaʼi ʼaē ʼe agahala mo tonatou loto kātoa ʼe ko nātou ʼaia ʼaē kā fakatūʼā tāfito anai. Koteā tona tupuʼaga? ʼUluaki, ʼe mole natou agahala ʼi he temi ʼe natou vaivai ai—ia te taʼi agahala ʼaē ʼe tou fai ʼi ʼihi temi ʼuhi ko totatou ʼuhiga heʼe haohaoa. Ko hanatou agamāhani ia te fai ʼo te agahala. Lua, neʼe natou fakatuʼutuʼu ke natou agahala. Ohagē ko tona fakaliliu ʼi te Tohi-Tapu (The Bible in Basic English), ʼe natou “fai ia te meʼa ʼaē ʼe kovi neʼe natou fakatuʼutuʼu kiai.” ʼI tanatou kua māhani ʼi te maʼuli ʼi te agahala kua fonu kātoa ia tonatou loto ʼaki te taʼi faʼahiga maʼuli ʼaia. Tolu, ʼe natou ʼiloʼi lelei pē ia te ʼu agahala ʼaē ʼe natou fai. ʼE natou maʼu ia te “ ʼatamai mālama totonu ʼo te moʼoni” ʼo ʼuhiga mo te finegalo ʼo te ʼAtua pea mo tona ʼu ala.

Koteā ia te manatu ʼa te ʼAtua ʼo ʼuhiga mo te hahaʼi agakovi ʼaē ʼe mole fia fakahemala? ʼE ʼui fēnei e Paulo: “ ʼE mole kei maʼu he sākilifisio ʼo ʼuhiga mo te ʼu agahala.” Ko te sākilifisio ʼo Kilisito—te meʼa ʼofa ʼa te ʼAtua ki te mālamanei—ʼe ina ʼuʼufi ia te ʼu agahala ʼaē ʼe tou fai ʼuhi ko totatou ʼuhiga heʼe haohaoa. (1 Soane 2:1, 2) Kae ko nātou ʼaē ʼe natou agahala kae mole natou fakahemala, ʼe natou fakahā ʼe natou meʼa noaʼi ia te meʼa ʼofa maʼuhiga ʼaia. Kiā mata ʼo te ʼAtua, ʼe natou “molomoloki te ʼAlo ʼo te ʼAtua pea mo meʼa noaʼi ia te taʼataʼa ʼo” Sesu. (Vaega 29) ʼI tonatou maʼuli, ʼe natou moamoagaʼi ia Sesu pea ko tona taʼataʼa kua liliu kiā nātou ko he “meʼa noa” heʼe kua hagē pē ia kiā nātou ko he tagata heʼe haohaoa. (Today’s English Version) Ko te hahaʼi ʼaia ʼe mole loto fakafetaʼi ki te sākilifisio ʼo Kilisito, ʼe mole natou maʼu anai ia tona ʼu lelei.

Koteā ʼaē kā ʼamanaki hoko anai ki te kau agakovi? Ko te ʼAtua ʼo te faitotonu neʼe ina fakapapau mai: “ ʼA ʼaku te lagavaka, ʼe ko au ʼaē ʼe au liufaki anai.” (Vaega 30) Ko nātou fuli ʼaē ʼe natou maʼuli ʼi te agahala ʼo tupu ʼaki ia te mamahi ʼo ʼihi, ke natou tōkakaga heʼe mole feala ki he tahi ke ina manukinuki ia te ʼu lao faitotonu ʼa te ʼAtua pea mo hao mai hona fakatūʼā. ʼI te agamāhani, ʼe toe fua kovi pē kiā nātou ia tanatou ʼu aga ʼaē ʼe kovi. (Kalate 6:7) Tatau aipē peʼe mole tauteaʼi nei nātou, kae ʼe natou tutuʼu anai iā muʼa ʼo te ʼAtua ʼi te kā haʼu, ʼi te temi ʼaē kā haʼu ai anai ʼo toʼo ia te aga heʼe faitotonu fuli ʼaē ʼi te kele. (Tāʼaga Lea 2:21, 22) ʼE fakatokaga fēnei mai e Paulo: “ ʼE ko he meʼa fakamataku te tō kiā nima ʼo te ʼAtua maʼuli.”—Vaega 31.

ʼI tatatou ʼiloʼi ʼaē ʼe mole meʼa noaʼi e Sehova ʼAtua ia te agahala ʼaē ʼe fai e he tahi ʼaki tona loto kātoa, ʼe tou lotofīmālie ai pea mo loto falala, tāfito lā ia nātou ʼaē neʼe lotomamahi ʼi he agakovi ʼa he tahi kua loto fefeka. ʼE feala hatatou falala ʼo tuku kātoa ia te lagavaka ʼo te agakovi ʼaia ki te ʼu nima ʼo te ʼAtua, ʼaē ʼe fehiʼa ki te ʼu aga heʼe faitotonu fuli.

[Nota]