Te ʼu Fehuʼi ʼa Te Kau Lautohi
He Koʼē ʼe Mole Tali e Te ʼAtua ʼIhi Faikole?
ʼE faigafua hatatou fakaovi ki te ʼAtua. Ohagē ko he tamai ʼofa ʼe fiafia mokā palalau faʼifaʼitaliha age tana fānau, ʼe fēia mo Sehova ʼAtua ʼe ina loto ke tou faikole age kiā te ia. Pea ohagē pē ko te tamai poto fuli, ʼe maʼu e te ʼAtua te ʼu tupuʼaga lelei ke mole ina tali ki te ʼu kole fuli ʼaē ʼe fai age. ʼE ina fakahā mai koa ia te ʼu tupuʼaga ʼaia ʼi te Tohi-Tapu, peʼe ko he meʼa fakalilo ia?
ʼE fakamahino fēnei e te ʼapositolo ko Soane: “Koʼenī te meʼa ʼaē ʼe tou tui papau kiai ʼo ʼuhiga mo ia: Tatau aipē pe koteā he meʼa ʼe tou kole ʼo mulimuli ki tona finegalo, ʼe fagono ia kiā tātou.” (1 Soane 5:14) Ko tatatou ʼu faikole ʼe tonu ke ʼalutahi mo te finegalo ʼo te ʼAtua. Ko ʼihi ʼe natou faikole ʼo ʼuhiga mo he ʼu meʼa ʼe hā lelei ʼe mole ko te finegalo ʼaia ʼo te ʼAtua, ohagē lā ke natou maʼu ia te loteli, peʼe ko he tahi age gaoʼi paʼaga. Ko ʼihi ʼe natou faikole ʼaki he ʼu manatu ʼe kovi ʼi tonatou loto. ʼE fai e te tisipulo ko Sake ia te fakatokaga ʼo ʼuhiga mo te ʼu faʼahiga faikole ʼaia, ʼo ina ʼui fēnei: “ ʼE kotou kole kae mole kotou maʼu, heʼe kotou kole ʼaki te fakakaukau kovi, koteʼuhi ke kotou fakaʼaogaʼi moʼo fakafīmālie tokotou ʼu holi ki te ʼu fiafia fakasino.”—Sake 4:3.
Ohagē lā, kotou fakakaukauʼi ki te ʼu foʼi ʼaka e lua ʼi he gaoʼi ʼaka fiti polo ʼe nā faikole ke nā mālo. ʼE faigataʼa hatatou manatu ʼe tali anai e te ʼAtua ki te ʼu faikole ʼaia ʼe fefakafeagaiʼaki. ʼE feala ke toe tatau ʼo ʼuhiga mo he tau ʼe hoko ʼi totatou temi, mokā faikole ia te ʼu faʼahi e lua ʼaē ʼe fetauʼaki ke nā mālo.
Ko nātou ʼaē ʼe mole natou fia fakalogo ki te lao ʼa te ʼAtua ʼe mole tali anai tanatou ʼu faikole. ʼI te tahi temi, neʼe maʼua ke fai e Sehova ia te ʼu palalau ʼaenī ki te kau ʼatolasio mālualoi: “Logo aipē te lahi ʼo te ʼu kole ʼaē ʼe kotou fai, ʼe mole au fakalogo; kua liliu ʼokotou nima ʼo fonu ko te toto.” (Isaia 1:15) ʼE ʼui fēnei ʼi te Tohi-Tapu: “Ko ʼaē ʼe ina leʼei kehe tona taliga ke ʼaua naʼa logo ki te lao—ko tana faikole ʼe ko he meʼa ia ʼe fehiʼaʼinaʼi.”—Tāʼaga Lea 28:9.
ʼI te tahi age faʼahi, ʼe fakalogo tuʼumaʼu pē anai e Sehova ki te ʼu faikole fakamālotoloto ʼaē ʼe fai e te kau ʼatolasio, ʼaē ʼe natou faiga moʼoni ke natou tauhi kiā te ia ʼo mulimuli ki tona finegalo. Kae ko tona fakaʼuhiga koa ʼe tali anai e te ʼAtua tanatou ʼu faikole fuli? Kailoa ia. Tou vakaʼi ʼihi faʼifaʼitaki ʼi te Tohi-Tapu.
Ko Moisese neʼe felōgoi lelei ʼaupitō mo te ʼAtua; kae neʼe tonu mo ia ke faikole “ ʼo mulimuli ki [te] finegalo [ʼo te ʼAtua].” Logolā neʼe kua fakahāhā fakalelei age e te ʼAtua tana manatu, kae neʼe kolekole fēnei age e Moisese ke fakagafua age ke hū ki te fenua ʼo Kanaane: “Fakalelei siʼi ʼou loto, tuku ke au fakalaka pea ke au sio ki te fenua lelei ʼaē ʼi te tahi kauvai ʼo Solotane.” Kae ki muʼa atu, ʼuhi ko te agahala ʼaē neʼe ina fai, neʼe fakahā age kiā Moisese ʼe mole hū anai ki te fenua ʼaia. Koia, ʼi te temi leva ʼaia, neʼe mole tali e Sehova ia te kole ʼaē neʼe fai age e Moisese, kae neʼe ina ʼui fēnei age: “Kua feʼauga! ʼAua naʼa ke toe palalau mai ʼo ʼuhiga mo te faʼahi ʼaia.”—Teutalonome 3:25, 26; 32:51.
Neʼe faikole ia te ʼapositolo ko Paulo ke ina maʼu ia he mālōlō mai te meʼa ʼaē neʼe ina fakahigoaʼi ko tona ‘tala ʼi tona kakano.’ (2 Kolonito 12:7) Ko te “tala” ʼaia ʼe lagi ko he mahaki kovi ʼo te ʼu mata peʼe ko he hoha tuʼumaʼu ʼuhi ko te kau fakafeagai pea mo “te ʼu tehina loi.” (2 Kolonito 11:26; Kalate 4:14, 15) Neʼe tohi fēnei e Paulo: “Neʼe tuʼa tolu taku faikole ki te ʼAliki ke puli toku mamahi ʼaia.” Kae neʼe ʼiloʼi e te ʼAtua, kapau ʼe haga hoko atu e Paulo tana fai fakamafola logolā te ‘tala ʼi tona kakano’ ʼaē ʼe mamahi hoholo ai, ʼe hā lelei ai anai ia te mālohi ʼo te ʼAtua pea mo te falala kātoa ʼa Paulo kiā Sehova. Koia, neʼe mole fakahoko e te ʼAtua ia te kole ʼaē neʼe fai e Paulo, kae neʼe ina ʼui fēnei age: “Ko toku mālohi ʼe lolotoga fakaliliu ʼo haohaoa ʼi te vaivai.”—2 Kolonito 12:8, 9.
ʼE moʼoni, ʼe ʼiloʼi lelei age e te ʼAtua iā tātou peʼe ko te ʼu kole fea ʼaē ʼe tali anai kiai pea mo te ʼu kole ʼaē ʼe mole tali kiai. ʼE tali tuʼumaʼu pē e Sehova ke fua lelei kiā tātou, ʼo mulimuli ki tana ʼu fakatuʼutuʼu ʼofa ʼaē ʼe tuʼu ʼi te Tohi-Tapu.