Ia Sesu Kilisito​—Te Malave ʼo Tana Logo Ki Te Maʼuli ʼo Te Hahaʼi

‘ ʼE mahino ia, ko te fakamoʼoni ʼaē ʼe lahi ʼaupitō ʼo ʼuhiga mo te tagata poto mai Kapenaume ia Sesu, ko tana kei malave ʼaē ki te loto pea mo te ʼatamai ʼo te hahaʼi.’a—TE TAGATA FAITOHI KO GREGG EASTERBROOK.

ʼE FEALA ke malave te ʼu palalau ki te loto ʼo te hahaʼi. Kapau ʼe filifili fakalelei he ʼu palalau poto, pea ʼe feala ke malave ki te ʼu loto, ʼo tupu ai he ʼamanaki, pea mo fetogi he ʼu maʼuli. ʼE mole he tagata neʼe heʼeki ina fai he ʼu palalau ʼe mālohi age ʼi te ʼu palalau ʼaē neʼe fai e Sesu Kilisito. Ko te tagata neʼe logo ki te fai ʼaē e Sesu ia te Akonaki ʼiloa ʼi te Moʼuga, neʼe ina tohi fēnei ki muli age: “ ʼI te hili ʼo te fai e Sesu ia te ʼu palalau ʼaia, neʼe ōfo ai te hahaʼi ʼi tana faʼahiga faiakonaki.”—Mateo 7:28.

Māʼia mo te temi nei, kei lahi te ʼu palalau neʼe fai e Sesu kua ʼiloʼi e te hahaʼi ʼi te mālamanei kātoa. Tou vakaʼi ʼihi palalau neʼe ina fai, ʼe maʼuhiga ʼaupitō.

“ ʼE mole feala ke kotou kaugana ki te ʼAtua pea mo te ʼu Koloa.”—Mateo 6:24.

“Koia ko te meʼa fuli pē ʼe kotou loto ke fai e te hahaʼi maʼa koutou, ʼe maʼua foki mo koutou, ke kotou toe fai fēia maʼa nātou.”—Mateo 7:12.

“Kotou liufaki te ʼu meʼa ʼa Sesale kiā Sesale, kae ko te ʼu meʼa ʼa te ʼAtua ki te ʼAtua.”—Mateo 22:21.

“ ʼE lahi age te fiafia ʼi takita foaki, ʼi takita tali.”—Gāue 20:35.

Neʼe mole gata ʼaki pē te fai ʼaē e Sesu ia he ʼu palalau ʼe maʼuhiga, kae neʼe ina toe fakamafola mo he logo neʼe mālohi he neʼe ina fakahā ia te moʼoni ʼo ʼuhiga mo te ʼAtua, mo ina akoʼi ki te hahaʼi peʼe feafeaʼi te takitaki ʼo tonatou maʼuli, pea mo ina fakahā lelei ko te Puleʼaga ʼa te ʼAtua ʼe ko te puleʼaki pē ʼaia ki te ʼu mamahi fuli ʼa te tagata. ʼI tatatou vakavakaʼi ia te logo ʼaia ʼi te ʼu pāsina kā hoa mai, ʼe tou mahino anai pe koʼē ʼe kei ‘malave ia te maʼuli ʼaē ʼo Sesu ki te loto pea mo te ʼatamai ʼo te hahaʼi.’

[Nota]