Tou Ako Mai Te Folafola ʼa Te ʼAtua

ʼE Fua Lelei Feafeaʼi Kiā Tātou Te ʼu Lao ʼa Te ʼAtua?

ʼE lagaʼi ʼi te ʼalatike ʼaenī te ʼu fehuʼi neʼe lagi kua kotou ʼosi fai pea mo te ʼu vaega ʼi takotou Tohi-Tapu ʼaē ʼe feala ke kotou maʼu ai te ʼu tali. ʼE fiafia anai te kau Fakamoʼoni ʼa Sehova ʼi te fai palalau mo koutou ki te ʼu fehuʼi ʼaenī.

1. He koʼē ʼe tonu ke tou fakalogo ki te ʼAtua?

ʼE tonu ke tou fakalogo ki te ʼAtua he neʼe ina fakatupu tātou. Māʼia lā mo Sesu neʼe fakalogo tuʼumaʼu ki te ʼAtua. (Soane 6:38; Apokalipisi 4:11) Ko te fakalogo ki te ʼu lao ʼa te ʼAtua ʼe ko te fakamoʼoni ʼaia ʼo totatou ʼofa kiā te ia.—Lau ia 1 Soane 5:3.

ʼE ʼaoga kiā tātou te ʼu lao ʼa Sehova ʼAtua. ʼE fakamahino mai ai te faʼahiga maʼuli ʼaē ʼe lelei ʼi te temi nei pea mo fakahā mai peʼe feafeaʼi hatatou lava maʼu ia te maʼuli heʼegata ʼi te kā haʼu.—Lau ia Pesalemo 19:8, 12; Esaia 48:17, 18.

2. ʼE fua lelei feafeaʼi te ʼu lao ʼa te ʼAtua ki totatou maʼuli fakasino?

Ko te lao ʼa te ʼAtua ʼo ʼuhiga mo te konahia ʼe ina puipui tātou mai he mahaki pea mo he ʼu tuʼutāmaki fakatupu mate. Ko te ʼinu kava fakavale ʼe fakatupu pōpula pea mo fakaliliu he tahi ke agavale. (Taaga Lea 23:20, 29, 30) ʼE fakagafua mai pē e Sehova te ʼinu fakapotopoto ʼo te kava.—Lau ia Pesalemo 104:15; 1 Kolinito 6:10.

ʼE toe fakatokaga mai foki ia Sehova ʼo ʼuhiga mo te maheka, te ʼita ʼaē ʼe mole matatāʼofi, pea mo te ʼu aga ʼaē ʼe fakatupu kovi ki te maʼuli. Koia ʼe fakalogo te lelei ʼo totatou maʼuli fakasino ki te maʼuliʼi ʼo tana ʼu tokoni.—Lau ia Taaga Lea 14:30; 22:24, 25.

3. ʼE lava puipui feafeaʼi tātou e te lao ʼa te ʼAtua?

ʼE tautea e te lao ʼa te ʼAtua te fai feʼauʼaki. (Hepeleo 13:4) Ko te ʼu taumātuʼa ʼaē ʼe fakalogo ki te lao ʼaia ʼe natou maʼuli fīmālie pea mo foaki he maʼuli fakafāmili lelei maʼa te ʼu fānau. Pea tahi, ko te fai feʼauʼaki ʼe iku tuʼumaʼu ki te mahaki, te māvete, te agamālohi, te lotomamahi pea mo te taupau tokotahi e te tamai peʼe ko te faʼē tona kiʼi fāmili.—Lau ia Taaga Lea 5:1-9.

Kapau ʼe tou tekeʼi te ʼu ʼaluʼaga ʼaē ʼe feala ke tou tō ai ki te fai feʼauʼaki, pea ʼe tou puipui ai totatou ʼu felōgoi mo te ʼAtua. Pea ʼe mole tou fai anai he aga ʼe fakatupu kovi ki he tahi.—Lau ia 1 Tesalonika 4:3-6.

4. ʼE fua lelei feafeaʼi kiā tātou te fakaʼapaʼapa ki te maʼuli?

ʼE maʼuli fiafia ia nātou ʼaē ʼe fakaʼapaʼapa ki te meʼa ʼofa ʼo te ʼAtua ʼaē ko te maʼuli, ʼi te temi ʼaē neʼe natou tuku ai te ʼu aga ʼaē ʼe fakatupu tuʼutāmaki ki te maʼuli, ohagē ko te suluka mo te toloke. (2 Kolinito 7:1) ʼE toe maʼuhiga ki te ʼAtua te maʼuli ʼo he kiʼi tamasiʼi ʼe kei fuafatuʼi. (Ekesote 21:22, 23) Koia ʼe mole tou fakapōgi faʼitaliha anai he tamasiʼi heʼeki fānauʼi. ʼE toe tokaga lelei ia nātou ʼaē ʼe fakaʼapaʼapa ki te maʼuli naʼa natou tuʼutāmaki ʼi te gāue, ʼi te loto fale pea mo tanatou feʼoloʼaki ʼi te motokā. (Tetelonome 22:8) Pea tahi ʼaē meʼa, ʼe mole natou kau anai ki ni fai gaoʼi ʼe fakatupu tuʼutāmaki ki te maʼuli, heʼe ko te maʼuli ʼe ko te meʼa ʼofa ia mai te ʼAtua.—Lau ia Pesalemo 36:10.

5. ʼE fua lelei feafeaʼi kiā tātou te ʼuhiga taputapu ʼo te toto?

ʼE taputapu te toto koteʼuhi ʼe ʼui e te ʼAtua ʼe fakatā e te toto ia te maʼuli, peʼe ko te nefesi, ʼo he meʼa fakatupu maʼuli. (Senesi 9:3, 4) ʼE fua lelei kiā tātou te lao ʼa te ʼAtua, ʼaē ʼe ina fakamaʼuhigaʼi tatau te toto mo te maʼuli. ʼO feafeaʼi? ʼO fakatafito ki te lao ʼaia, ko te ʼAtua neʼe ina fakafealagia te fakamolemole ʼo te agahala.—Lau ia Levitiko 17:11-13; Hepeleo 9:22.

Neʼe maʼuhiga ʼaupitō te taʼataʼa ʼo Sesu koteʼuhi neʼe haohaoa ia. Neʼe fakahā e Sesu ki te ʼAtua te meʼa ʼe ina fakatā tona maʼuli—tona taʼataʼa. (Hepeleo 9:12) ʼAki tona taʼataʼa ʼaē neʼe liligi kua feala leva ke tou maʼu te maʼuli heʼegata.—Lau ia Mateo 26:28; Soane 3:16.

[Paki ʼo te pāsina 31]

Kapau ʼe kotou fia maʼu he tahi ʼu fakamahino, vakaʼi te kāpite 12 pea mo te 13 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu?, neʼe tā e te kau Fakamoʼoni ʼa Sehova.