“Kua Hoki Au Maʼu Te ʼAteaina Moʼoni”

TOKU MAʼULI ʼI MUʼA ATU: Neʼe au tupu ʼi Moundsville, te kiʼi kolo ʼe tuʼu ʼi te vaʼe Vaitafe ko Ohio, ʼi te potu noleto ʼo Virginie Occidentale, ʼi Amelika. Neʼe au tuʼulaga lua ʼi te fanau ʼe toko fa, neʼe matou toko tolu tagata, pea neʼe mole ʼi ai he temi ʼe matou nonofo noa ai ʼi fale. Ko ʼamatou matuʼā neʼe faʼa gaue, pea mo loto manavaʼofa ki te hahaʼi. Neʼe mole matou falaʼia kaʼe neʼe matou maʼu tuʼumaʼu pe te ʼu meʼa ʼae ʼe ʼaoga ki tomatou maʼuli. ʼI tonā ʼuhiga Fakamoʼoni ʼa Sehova, neʼe faiga tuʼumaʼu pe ʼamatou matuʼā ke lelei te ako ʼo te ʼu akonaki Fakatohi-tapu kia matou talu mai tamatou kei liliki.

Kaʼe ʼi taku lahilahi ake, neʼe au kamata lituʼa ki te ʼu akonaki ʼae neʼe akoʼi mai e ʼaku matuʼā. Neʼe au feuiʼaki peʼe feala koa ke au maʼuli lelei pea mo fiafia mo kapau ʼe au mulimuli ki te ʼu lao ʼa te Tohi-Tapu. Pea ʼi taku manatu ʼe hoki feala ke au fiafia moʼoni mo kapau ʼe au fai te ʼu meʼa fuli ʼae ʼe au loto kiai. Mole faʼa fualoa, pea neʼe mole kei au kau ki te ʼu fono Fakakilisitiano. Neʼe muli mai ia au toku taʼokete pea mo toku kiʼi tokolua. Neʼe faigaʼi malohi e ʼamatou matuʼā ke nā tokoni mai kia matou kaʼe neʼe mole matou tokagaʼi.

ʼAki te temi, neʼe au tokagaʼi leva ko te ʼateaina ʼae neʼe au loto kiai neʼe ina taki au ke au kaugana ki te tahi ʼu aga ʼe kovi. ʼI te tahi ʼaho, ʼi taku liliu mai te fale ako, neʼe foaki mai e toku kaumeʼa te foʼi sikaleti. Pea neʼe au toʼo. Talu mai te temi ʼaia, neʼe au tali te tahi ʼu meʼa ʼe fakatupu kovi kia au. ʼAki te temi, neʼe au fakaʼaoga fakavale ia te ʼu toloke, mo te kava pea mo te fai ʼo te ʼu aga heʼe maʼa. ʼI te ʼu taʼu ʼae neʼe hoa mai ki ai, neʼe au ʼahiʼahiʼi leva te ʼu toloke ʼe malohi age pea neʼe au liliu ʼo popula ki te ʼu meʼa ʼaia. ʼI te lahi ʼo taku popula, neʼe au kamata fakatau te ʼu toloke ke feala haku taupau toku faʼahiga maʼuli ʼaia.

Neʼe kua faigataʼa taku mole tokagaʼi toku leʼo ʼo loto, ʼae ʼe ina fakatokaga tuʼumaʼu mai te kovi ʼo taku aga. Kaʼe ʼi taku iloʼi ʼae kua kovi fau taku aga, neʼe au manatu au ʼe kua tauhala taku toe fetogi. Logola te kauga malie ʼo te hahaʼi ʼae e fakatahi mo au ʼi te ʼu lafeti pea mo te ʼu faimaholō, kaʼe ʼe hage ia kia au ʼe au tokotahi pea neʼe au lotomamahi ai. ʼI ʼihi temi, ʼe au manatuʼi te agalelei ʼo ʼaku matuʼā pea mo au fakakaukau pe ko ʼe koa kua au liliu ʼo feia.

TE FETOGI ʼO TOKU MAʼULI E TE TOHI-TAPU: Logola neʼe kua au lotovaivai kaʼe neʼe mole tukunoaʼi au e ʼihi. ʼI te taʼu 2000, neʼe fakaafe au e ʼaku matuʼā ki te fakatahi lahi ʼa te kau Fakamoʼoni ʼa Sehova. Neʼe au alu pe au kaʼe neʼe mole au loto ki ai. Neʼe au punamaʼuli ʼi taku felaveʼi mo toku taʼokete pea mo toku kiʼi tokolua ʼi te fakatahi ʼaia.

ʼI te lolotoga ʼo te fakatahi, neʼe au manatuʼi ko te taʼu ʼae ki muʼa atu neʼe au mata maholō ʼi te foʼi maholō lahi neʼe fai ʼi te koga meʼa ʼaeni. Neʼe lave kia au te kehekehe ʼo te fakatahi pea mo te faimaholō ʼaia. ʼI te lolotoga ʼo te maholō ʼaia, neʼe fonu te koga meʼa ʼaeni ʼi te kohu ʼo te sikaleti pea mo te leta ʼo te ʼotaʼota. Tokolahi te hahaʼi mata maholō neʼe mole natou agalelei pea ko te ʼu manatu ʼo te ʼu hiva neʼe fakatupu lotomamahi. Kaʼe ʼi te fakatahi ʼaeni, neʼe au fakatahi mo te ʼu hahaʼi ʼe fiafia moʼoni, pea neʼe natou tali fakafiafia au kaʼe neʼe kua fualoa tamatou heʼeki toe felaveʼi. Neʼe maʼa te koga meʼa ʼae neʼe fai ai te fakatahi pea ko te ʼu akonaki ʼae neʼe fai ʼe maʼu ai te ʼamanaki. ʼI taku sio ʼae ki te fua lelei ʼo te ʼu moʼoni Fakatohi-tapu kia au, neʼe au ui ai pe kotea te tupuʼaga ʼo taku situʼa kiai.—Esaia 48:17, 18.

ʼI te ʼosi pe ʼo te fakatahi, neʼe au fakatotonu ai ke au toe kau ki te ʼu fono Fakakilisitiano. ʼI te toe lave lelei ʼo te fakatahi ki toku taʼokete pea mo toku kiʼi tokolua, neʼe nā toe fai mo naua te fakatuʼutuʼu ʼaia. Neʼe matou tali toko tolu ke matou toe ako te Tohi-Tapu.

Neʼe lave ʼaupito kia au te vaega Tohi-Tapu ʼo Sakopo 4:8, ʼae ʼe ina ui fenei: “Kotou fakaoviovi ki te Atua, pea e fakaoviovi atu anai ia kia koutou.” Neʼe mahino mai kia au, ke feala haku fakaovi ki te ʼAtua ʼe tonu ke au fetogi toku faʼahiga maʼuli. Ko te ʼu faʼahiga meʼa ʼae ʼe tonu ke au fetogi, ʼe ko te tuku ʼo te suluka, mo te toloke pea mo te inu fakavale ʼo te kava.—2 Kolinito 7:1.

Neʼe au situʼa ki ʼoku kaumeʼa ʼafeā pea neʼe au kumi ʼoku kaumeʼa foʼou ʼi te kau Fakamoʼoni ʼa Sehova. Neʼe tokoni lelei mai kia au ia te tagata ʼafeā ʼae neʼe ina fai taku ako Tohi-Tapu. Neʼe tau telefoni mai peʼe haʼu ki toku ʼapi ʼo ma fai palalau. ʼAki te temi, neʼe liliu ia ia ko toku kaumeʼa lelei.

ʼI te taʼu 2001, neʼe au papitema fakatahi mo toku taʼokete pea mo toku kiʼi tokolua ʼo matou fakamoʼoni ai tamatou foaki ʼae ʼomatou maʼuli ki te ʼAtua. ʼE mahino ia neʼe fiafia lahi ʼaku matuʼā pea mo toku kiʼi tehina ʼae neʼe nofo agatonu ʼi tanatou sio ʼae kua fakatahi fuli tomatou famili ʼi te tauhi ʼae kia Sehova.

TE ʼU LELEI NEʼE AU MAʼU AI: ʼI muʼa atu, neʼe au manatu au ʼe fakatuʼakoi fau e te ʼu lao ʼa te Tohi-Tapu toku loto faʼitaliha, kaʼe ʼi te temi nei kua au mahino ʼe maʼuhiga heʼe natou puipui au mai he ʼu aga ʼe kovi kia au. Neʼe au maʼu mai te Tohi-Tapu, ia te malohi ʼae ke au tuku ai taku fakaʼaoga pea mo taku fakatau ia te toloke, pea ke liliu toku maʼuli ʼo lelei age.

Neʼe au maʼu te tapuakina ʼae ke au kau ki te kautahi fakamalamanei ʼa Sehova. ʼE maʼu e te hahaʼi ʼaia ia te feʼofaʼaki moʼoni pea ʼe natou tauhi ʼi te logotahi ki te ʼAtua. (Soane 13:34, 35) ʼO mole gata ai, neʼe au toe maʼu te tahi tapuakina makehe, he neʼe au maʼu toku ʼohoana ʼe au ʼofa mamahi ai ko Adrianne. ʼE mā fiafia lahi ai heʼe feala ke mā tauhi fakatahi ki totatou Tupuʼaga.

Neʼe au tuku taku kumi te ʼu lelei pe ʼae kia au tokotahi kaʼe au fakaʼaoga katoa toku temi moʼo tokoni ki te hahaʼi ke natou toe maʼu mo natou te ʼu tapuakina ʼae mai te Folafola ʼa te ʼAtua. ʼE maʼu ʼi te gaue ʼaia ia te fiafia lahi ʼaupito. ʼE feala ke au ui moʼoni atu kia kotou neʼe fetogi e te Tohi-Tapu ia toku maʼuli. Kua hoki au maʼu ia te ʼateaina moʼoni.