“ ʼE Mole Galo Anai” Pea Neʼe To Tonu!

“ ʼE MOLE GALO ANAI!” Ko te ʼu palalau ʼaia neʼe fai e te hahaʼi tokolahi ʼo ʼuhiga mo te ʼata “Drame de la Création.” Neʼe to tonu te ʼata ʼaia pea neʼe mole galo ki te hahaʼi ʼae neʼe natou sio ai. ʼE moʼoni, neʼe lahi te fagonogono neʼe fai ʼaki te “Drame de la Création” moʼo fakavikiviki ia Sehova, ʼi muʼa pe ʼo te fakataga fakamataku ʼae neʼe fai e te puleʼaga ʼo Itilele ki te hahaʼi ʼa Sehova ʼi Eulopa. Kaʼe neʼe kotea koa te ʼata ʼaia?

ʼI te taʼu 1914 ko te pilo gaue ʼo te fale lahi fakamalamanei ʼa te hahaʼi ʼa Sehova ʼi Brooklyn, ʼi Amelika, neʼe natou faʼufaʼu te ʼata “Photo-Drame de la Création,” ʼae neʼe ko he ʼu pakī pea mo he ʼu ʼata neʼe lanu. Neʼe ʼi ai mo te musika mo te ʼu fakamatala, pea neʼe fai ia hola ʼe valu. Neʼe ko te toko lau ʼi miliona hahaʼi ʼi te malamanei neʼe natou sio ʼi te “Photo-Drame.” Pea neʼe toe faʼufaʼu ʼi te taʼu 1914 te ʼata “Eurêka-Drame” ʼe tatau kaʼe ʼe nounou age. Kaʼe ʼi te ʼu taʼu 1920, neʼe kua ʼafeā te ʼu pakī, mo te ʼu ʼata, pea mo te ʼu meʼa moʼo fakaha te ʼata. Kaʼe neʼe kauga malie natou ʼae neʼe natou toe fia sisio ʼi te “Photo-Drame.” Ohage la, ko te hahaʼi ʼo te kolo ko Ludwigsbourg, ʼi Siamani, neʼe natou fehuʼi fenei: “Ko ʼafea koa ʼae ka matou toe sisio ai ki te Photo-Drame?” Kotea ʼae neʼe feala ke fai?

Ke feala ke toe fakaha te ʼata ʼaia, ʼi te ʼu taʼu 1920 ko te ʼu tehina fakafofoga ʼo te Petele ʼi Magdebourg, ʼi Siamani, neʼe natou totogi te ʼu ʼata mai te ʼu fale foʼou fakatauʼaga meʼa ʼi Palesi, ʼi Falani, pea mo te ʼu pakī mai te ʼu fale faipakī ʼi te ʼu kolo ʼo Leipzig mo Dresde. Neʼe fakatahiʼi te ʼu meʼa ʼaia mo te ʼu pakī ʼafeā ʼae neʼe kei lelei ʼo te ʼata te “Photo-Drame.”

Ko te tehina ko Erich Frost, te tagata faimaholō faiva, neʼe ina fai te musika ʼae neʼe fakatatagi tahi mo te ʼu ʼata pea mo te ʼu paki. Neʼe ʼi ai te koga ʼo te fakamatala ʼo te ʼata neʼe toʼo mai tatatou tohi Création. Ko ia la ʼae neʼe fetogi ai te higoa “Photo-Drame” ʼaki te higoa foʼou “Drame de la Création.”

Neʼe fai te ʼata foʼou ʼaia ia hola ʼe valu ohage pe ko te “Photo-Drame,” pea neʼe mole fakaha fuli ʼi he po katoa kaʼe neʼe fakakoga ʼi ni po hoholo. Neʼe ʼasi ai te ʼu faʼahi ʼo te ʼu ʼaho ʼo te fakatupu, mo te ʼu hisitolia ʼi te Tohi-Tapu pea mo ʼae neʼe hoko ʼi te malamanei. Neʼe toe fakaha lelei ai ko te ʼu lotu hala neʼe mole natou tokoni ki te hahaʼi. Neʼe fakaha ia te “Drame de la Création” ʼi te ʼu fenua ʼo Autriche, mo Siamani, mo Luxembourg, pea mo Suisse, pea mo te tahi age ʼu fenua ki te hahaʼi ʼae ʼe palalau Fakasiamani.

Neʼe fakamahino fenei e Erich Frost: “ ʼI te ʼu temi ʼae neʼe fakaha ai te ʼata, neʼe au fakalotomalohi ʼoku kaumeʼa, tafitō natou ʼae neʼe matou gaoʼi ʼi te foʼi mahalo, ke natou olo ʼi te kiʼi temi malolō ʼi te ʼu ʼatu, ʼo tufa ki te hahaʼi ʼamatou tohi mo kaupepa ʼae neʼe lelei ʼaupito. Neʼe lahi age ai te ʼu tohi ʼae neʼe matou tufa ʼi hamatou olo ʼi te ʼu ʼapi.” Ko te tehina ko Johannes Rauthe, ʼae neʼe ina teuteuʼi te fakaha ʼo te ʼata ʼi Pologne pea mo te fenua ʼae kua higoa ʼi te temi nei ko République tchèque, ʼe ina manatuʼi neʼe tokolahi te hahaʼi neʼe natou tuku age ʼanatou tuʼasila ke ʼaʼahi natou. Pea neʼe ʼi ai te ʼu fua lelei ʼo tanatou ʼaʼahi te ʼu hahaʼi ʼaia.

ʼI te ʼu taʼu 1930, neʼe fonu ʼaupito natou neʼe nonofo ʼi te ʼu fale ʼae neʼe fakaha ai te “Drame de la Création,” pea neʼe lahi te palalau ʼo ʼuhiga mo te kau Fakamoʼoni ʼa Sehova ʼi te ʼu kolo ʼaia. ʼI te taʼu 1933, neʼe ko te teitei tahi miliona hahaʼi neʼe natou sisio ʼi te ʼata ʼaia ʼae neʼe teuteu e te Petele ʼo Siamani. ʼE manatuʼi fenei e te tuagaʼane ko Käthe Krauss: “Ke feala hamatou sisio ʼi te ʼata, ʼi te ʼaho fuli neʼe matou haʼele ia kilometa ʼe 10 lolotoga ʼaho ʼe nima, ʼo fakalaka ʼi te ʼu vao matuʼa pea mo hake mo hifo ʼi te ʼu fuga sia mo te ʼu liuʼa.” ʼE ui fenei e Else Billharz: “Neʼe tupu taku ʼofa ki te moʼoni ʼuhi ko te ʼata Drame de la Création.”

ʼE ui e te tehina ko Alfred Almendinger, ʼi te temi ʼae neʼe sio ai tana faʼe ʼi te ʼata, “neʼe fiafia ʼaupito pea neʼe ina totogi hana Tohi-Tapu ʼo kumi peʼe maʼu ai te kupu pulekatolio.” ʼI tana mole maʼu te kupu ʼaia ʼi te Tohi-Tapu, neʼe mole kei toe alu ia ʼo misa kaʼe neʼe papitema. Neʼe manatuʼi fenei e Erich Frost: “Neʼe tokolahi te hahaʼi ʼae neʼe ʼomai ki te moʼoni ʼuhi ko te ʼata Drame de la Création.”—3 Soane 1-3.

ʼI te temi ʼae neʼe tokolahi ai natou neʼe sisio ʼi te “Drame de la Création,” neʼe toe tokolahi ai foki mo natou ʼi Eulopa ʼae neʼe lagolago kia Itilele pea mo fakatupu maveuveu. ʼO kamata ʼi te taʼu 1933, neʼe tapuʼi te ʼu gaue ʼa te kau Fakamoʼoni ʼi Siamani. ʼI te taʼu ʼaia ʼo kaku ki te fakaʼosi ʼo te lua tau fakamalamanei ʼi te taʼu 1945, neʼe kovi ʼosi te fakataga ʼo te ʼu kaugana ʼa Sehova ʼi Eulopa. Ko Erich Frost neʼe pilisoni teitei taʼu ʼe valu. Kaʼe neʼe fakaʼateaina pea mo gaue leva ʼi te Petele ʼo Wiesbaden, ʼi Siamani. ʼI meʼa lelei foki te to tonu ʼo te ʼata “Drame de la Création” ʼae ʼe mole galo anai, moʼo toe fakalotomalohi age te kau Kilisitiano tokolahi ke natou tauʼi te ʼu ʼahiʼahi ʼo tanatou tui lolotoga te Lua Tau Fakamalamanei!—Mai tatatou tanakiʼaga tohi ʼi Siamani.