Te ʼu Kupu Tafito

ʼE fakamahino ʼi te alatike ʼaeni pe ʼe feafeaʼi hatatou fakaʼaogaʼi ʼotatou koloa ke tou maʼu ai hotatou ʼu kaumeʼa ʼi te lagi. (Luka 16:⁠9) ʼE toe fakaha ai foki pe ʼe feafeaʼi hatatou mole liliu ʼo popula ki te malama faikoloa ʼaeni pea ke tou foaki kia Sehova te ʼu meʼa ʼe ­lelei tukupau.

ʼE lava katakiʼi feafeaʼi e he Kilisitiano ia te mate ʼo he tahi neʼe ʼofa mamahi ai? Pea ʼe ina lava maʼu feafeaʼi ia he fakalotofimalie? ʼE fakalotofimalieʼi tatou e Sehova ʼaki ia Sesu Kilisito, mo te Tohi-Tapu pea mo te kokelekasio. ʼE fakamahino ʼi te alatike ʼaeni pe ʼe tou maʼu feafeaʼi anai he fakalotofimalie pea ʼe feafeaʼi anai hatatou fakalotofimalieʼi ia natou ʼae ʼe lotomamahi.

ʼI te kapite 147 ʼo Pesalemo, ʼe liuliuga ia te fakalotomalohiʼi ʼo te hahaʼi ʼa te ʼAtua ke natou fakavikiviki kia Sehova. He koʼe neʼe loto moʼoni e te tagata faipesalemo ke fakavikiviki ki te ʼAtua? ʼE tali anai te alatike ʼaeni ki te fehuʼi ʼaia, pea ʼe fakaha ai anai pe koʼe ʼe tonu mo tatou ke tou fakavikiviki ki totatou ʼAtua.

Tokolahi te kau tupulaga mo te kau finemui ʼe natou kau ʼaki he faʼafai ki te selevisi temi katoa. ʼE mole koa la kotou fia faʼifaʼitakiʼi ia natou? ʼE kotou maʼu anai ʼi te alatike ʼaeni he ʼu tokoni mai te Tohi-Tapu ʼe ʼaoga atu anai ke kotou fai hakotou ʼu fakatuʼutuʼu lelei ke feala ai hakotou maʼu he ka haʼu fakafiafia.