Ko Te ʼu Tali Ki ʼAkotou ʼu Fehuʼi

◼ He koʼe ʼe maʼuhiga kia tatou fuli ke tou tali ʼi te ʼu fono?

Ohage pe ko tatatou fakatokagaʼi, kapau ʼe fai e nātou fuli ʼo te kokelekasio hanatou ʼu tali ʼi te ʼu fono, ʼe feala ke maholo pea mo fakaloto mālohi ʼaupito. Kae, ʼi te fakatokaga neʼe fai ʼi te ʼu tānaki ʼa te ʼu tagata taupau fakakolo, ʼe lahi te ʼu kokelekasio ʼe ʼaoga ke hikihiki tanatou ʼu tali ʼi te ʼu fono.

Ko nātou ʼaē ʼe foʼofoʼou mai ʼe feala hanatou fakamāmāhani vave ki te faʼahi ʼaia. Ko ʼihi ia nātou ʼe nātou feʼekeʼaki peʼe ʼaoga koa ke nātou tali ʼi te ʼu fono, koteʼuhi ʼe mole heʼeki nātou maʼuliʼi katoa te ʼu pelesepeto faka Tohi-Tapu. ʼE mahino ia, ʼe mole feala hatatou ʼui ʼe ʼaoga ke maʼa katoa he maʼuli ʼo he tahi ia muʼa ʼo tana kau ki te ʼu fono. Tahi ʼaē, ʼuhi ko te tali ʼi te ʼu fono ʼe ko he koga ia ʼo tatatou ʼu faʼahiga ako, ko nātou ʼaē ʼe foʼofoʼou ʼe fakaafe ia nātou ke nātou fai hanatou ʼu tali ʼi te ʼu fono.

Ko te kau tūpulaga ʼo feiā aipe mo te tamaliki ʼe feala foki ke nātou fakamāmāhani ʼi te fai ʼo hanatou ʼu tali ʼi te ʼu fono. ʼE fakahā mai e te Tohi-Tapu ʼi te taʼu 12 ʼaē ʼo Sesu neʼe mole nofo fakalogologo ia ʼi tana ʼalu ʼaē ʼo atolasio ki te ʼAtua he neʼe maʼu atu ia ki te fale lotu ʼaē ʼi Selusalemi ‘ ʼe fagono ki te hahaʼi fai akonaki, mo fakafehuʼi ia nātou, mo ina fai age he ʼu tali.’ (Luka 2:46, 47.) Ko tatatou mulimuli ki te faʼifaʼitaki ʼaia, ʼe feala ai foki ki te ʼu tamaliki liliki pea mo nātou ʼaē kua lalahi ke nātou kau ki te fakaloto mālohi ʼo te ʼu fono.

Kapau ʼe tou mulimuli ki te manatu ʼaē neʼe hoki ʼosi atu, ko nātou ʼaē kua ʼāfea ʼi te kokelekasio, ʼe tonu foki ke fai hanatou tali ʼi te ʼu fono. ʼE tou ʼamanaki foki ke foaki e te kau pionie, te kau tagata faifekau faka minisitelio, pea mo te ʼu tagata ʼāfea, ʼo feiā aipe mo tonatou ʼu famili he faʼifaʼitaki lelei ʼi te faʼahi ʼaia.

ʼE feala kia tatou fuli ke fai hatatou ʼu tali ke liliu te ʼu fono ʼo mahōlō. ʼAki tatatou tali tuʼumaʼu ʼi te ʼu fono, ʼe tou fakaloto mālohiʼi anai ʼotatou ʼu tēhina pea ʼe tou maʼu ai anai he fiafia. ʼE fakamoʼoni mai foki ia Tāʼaga Lea 15:23 ko “he tagata fiafia ʼe hā ʼi te lea ʼaē ʼe haʼu mai tona gutu.”