Ko Te Meʼa Maʼuhiga ʼAupito ʼi Te Hisitolia ʼo Te Tagata
1 Neʼe haʼu ia Sesu ki te kele ʼaki te takitaki ʼo tana Tāmai moʼo fakamoʼoni ki te moʼoni ʼaē ʼe ina lava taki tatou ki te maʼuli heʼegata. (Soane 18:37) Ko tana agatonu ʼo kaku ki tona mate neʼe fakavikiviki ai ia Sehova, mo tāpuhā te huafa ʼo te ʼAtua, pea neʼe ina foaki te totogi. (Soane 17:4, 6) Ko te tupuʼaga la ʼaia ʼo te fakaliliu ʼo te mate ʼa Sesu ko te meʼa maʼuhiga ʼaupito ʼi te hisitolia katoa ʼo te tagata.
2 Talu mai te fakatupu ʼo Atama, neʼe ko tagata haohaoa pe e lua neʼe maʼuʼuli ʼi te kele ʼaenī. Neʼe feala kia Atama ke ina foaki he ʼu tapuakina fakaofoofo ki tona hākoga ʼaē ʼe mole heʼeki tupu. Kae, neʼe agatuʼu ia ʼo manatu pe kia ia totonu, ʼo iku ai ki tona hōloga he maʼuli kinakina ʼe fakaʼosi ʼaki te mate. ʼI te temi ʼaē neʼe haʼu ai ia Sesu, neʼe ina fakahā he agatonu pea mo he fakalogo haohaoa, ʼo faka fealagia ai kia nātou fuli ʼaē ʼe nātou tui anai ke nātou maʼu te maʼuli heʼegata.—Soane 3:16; Lom. 5:12.
3 ʼE mole he tahi age meʼa neʼe hoko ʼe feala ke fakatatau ki te mate faka sakilifisio ʼa Sesu. Neʼe ina fetogi te ʼaluʼaga ʼo te hisitolia ʼo te tagata. Neʼe ina foaki he tafitoʼaga ki te fakatuʼuake mai te mate ʼo te lauʼi miliale hahaʼi. Neʼe fakatuʼu e tona mate he fakatafito ki te Puleʼaga ʼe heʼegata ʼaē ka ina fakagata anai te agakovi pea mo fakaliliu te kele ko he palatiso. ʼE ina faka ʼāteaina katoa anai te malamanei mai te maʼuli kinakina pea mo te maʼuli popūla fuli.—Pes. 37:11; Gāue 24:15; Lom. 8:21, 22.
4 Ko te ʼu meʼa fuli ʼaia ʼe tokoni ai kia tatou ke tou mahino ki te tupuʼaga ʼo te akoʼi e Sesu ki tana kau tisipulo ke nātou fakamanatu tona mate ʼaki te toʼotoʼoga ʼo te Fakamanatu ʼaē ʼe fai ʼi te taʼu fuli. (Luka 22:19) ʼI tatatou mahino ki te maʼuhiga ʼo te toʼotoʼoga ʼaia, ʼe tou fakatalitali ke tou fakatahi mo te ʼu kokelekasio ʼo te kau Fakamoʼoni ʼa Sehova ʼi te malamanei katoa ʼi te Feliaono, ʼaho 14 ʼo ʼApelili, ʼi te ʼosi tō ʼo te laʼā. ʼI muʼa ʼo te ʼaho ʼaia, ʼe lagi lelei anai ke lau fakatahi e te famili te ʼu fakamatala faka Tohi-Tapu ʼo te ʼu ʼaho fakamuli ʼa Sesu ʼi te kele pea mo tana lototoʼa ʼo lagolago te moʼoni. (Ko te ʼu koga tohi ʼaē ʼe tonu ke lau ʼe tuʼu ʼi te Kaletalio 1995, mai te ʼaho 9 ʼo aʼu ki te ʼaho 14 ʼo ʼApelili.) Neʼe ina tuku mai he faʼifaʼitaki kia tatou ʼo ʼuhiga mo te pipiki maʼu ki totatou Tupuʼaga. (1 Pe. 2:21) Tou fai te meʼa ʼi tatatou ʼu fealagia moʼo fakaafe ki te fakatahi maʼuhiga ʼaia, totatou ʼu kaumeʼa pea mo totatou ʼu famili, ʼo feiā mo te kau ako faka Tohi-Tapu pea mo ʼihi ʼe nātou fia logo. Tou fakamahino fakatomuʼa te meʼa ʼaē ka hoko anai pea mo te ʼu faka ʼuhiga ʼo te pane mo te vino.—1 Ko. 11:23-26.
5 ʼE tonu anai ke fakatuʼutuʼu fakatomuʼa te kau tagata ʼāfea ke nātou ʼiloʼi papau kua tokalelei pea mo maʼa te Fale ʼo te Puleʼaga. ʼE tonu anai ke fai he ʼu fakatuʼutuʼu ke teuteuʼi e he tahi te pane mo te vino. ʼE tonu ke fai fakalelei te feʼāveʼaki ʼo te pane mo te vino. ʼE maʼu te ʼu manatu ʼaoga ʼo ʼuhiga mo tatatou fakaʼapaʼapa ki te Taumafa ʼo te ʼAliki ʼi Te Tule Leʼo (fakafalani) ʼo te ʼaho 15 ʼo Fepualio 1985, ʼi te pasina 17. E lagi lelei ke fakatuʼutuʼu e te kokelekasio ke ina fakalahi tana ʼu gāue faka mafola lolotoga te ʼu ʼaho ʼi muʼa ʼo te toʼotoʼoga ʼaia, ʼo feiā mo te ʼu ʼaho ʼaē ʼe hoa mai kiai.
6 ʼI te taʼu kua hili, ko te toko 12 288 917 ʼi te malamanei katoa neʼe nātou kau ki te fakamanatu ʼo te meʼa maʼuhiga ʼaia neʼe hoko. Mai tona ʼaluʼaga ʼaē ʼe ko te ʼaho maʼuhiga ʼaupito ʼaia ʼi tatatou kaletalio, ʼe tonu anai ke tou ʼi ai fuli ʼi te ʼaho ʼaia.