Tou Taupau Maʼu Tatatou Logo Tahi ʼUhi Ko Te Puleʼaga
1 Ko te Puleʼaga ʼo te ʼAtua ʼe ko he puleʼaga moʼoni, ʼe ʼi ai tona mālohi pea mo tana pule. Neʼe ko te kupu tāfito ʼaia ʼo te faka mafola ʼa Sesu. (Mat. 4:17) Ko te akoʼi ʼo niʼihi pea mo te fagonogono ʼo ʼuhiga mo te moʼoni ʼo te Puleʼaga neʼe ko te koga tāfito ʼo te minisitelio ʼa Sesu. Neʼe ina akoʼi mai kia tatou te faikole ki te Puleʼaga pea ke tou fakamuʼamuʼa tuʼumaʼu. (Mat. 6:9, 10, 33) Ko te nofo ōvi kia Sehova pea mo tana kautahi, mo te fakahoko ʼo tatatou gāue faka mafola, pea mo tatatou fakamamaʼo mai te mālama, ʼe ina faka fealagia ai kia tatou ke tou taupau maʼu tatatou logo tahi ʼuhi ko te Puleʼaga. ʼAki tatatou aga pea mo ʼatatou ʼu palalau, ʼe tou fakahā ai ʼe tou kau ki te Puleʼaga.—Soane 18:37.
2 Talu mai te taʼu 1914, kua liliu te Puleʼaga ko he meʼa moʼoni maʼa te lauʼi miliona hahaʼi fakalogo. Ko te logo tahi ʼaē ʼe fakahā e te hahaʼi fakalogo ʼaia ʼo te Puleʼaga ʼe kehekehe mo te mālama maveuveu. ʼE tonu ke tou faka ʼuhiga te Puleʼaga ko he meʼa moʼoni ʼi totatou maʼuli, mo kapau ʼe tonu ke liliu ko he mālohi ʼe ina fakatupu te logo tahi. He koʼe ʼe tou ʼui ʼe moʼoni te Puleʼaga ʼaia?
3 Ohage ko te ʼu puleʼaga ʼaē, ʼe ʼi ai te ʼu lao ʼa te Puleʼaga. Kae ʼe kehekehe mo te ʼu puleʼaga ʼaē, koteʼuhi ʼe maʼu ʼona ʼu lao ʼi te Tohi-Tapu. ʼE foaki mai kia tatou ʼi tatatou lau tuʼumaʼu ʼo te Folafola ʼa te ʼAtua te ʼu fakamanatu ʼo ʼuhiga mo te ʼu meʼa ʼaē ʼe fakamaʼua ki te hahaʼi fakalogo ʼo te Puleʼaga. Ko te ako takitokotahi ʼo totatou ʼu tohi pea mo te takitaki ʼo “te tagata kaugana agatonu mo poto” ʼe tokoni kia tatou ke tou maʼuliʼi te ʼu lao ʼa te ʼAtua ʼi totatou maʼuli ʼo te ʼaho fuli. (Mat. 24:45) ʼAki tatatou fai he faka ʼuhiga kia tatou takitokotahi, ʼe ʼāʼāsili moʼoni age te Puleʼaga kia tatou, ʼo ina fakaōviōvi tatou ki te fale tautehina ʼi te malamanei katoa, ʼo fakatahiʼi ai tatou ko he famili ʼo he kau atolasio ʼi te ʼuhiga pule ʼa Sesu.
4 Ko Te Logo Tahi ʼAki Te Faka Mafola ʼo Te Puleʼaga: Ko te gāue neʼe hinoʼi mai kia tatou, ko te faka mafola ʼo te logo lelei ʼo te Puleʼaga “ki te potu ʼaē ʼe mamaʼo ʼo te kele.” (Gāue 1:8) Ko te gāue faka mafola “ ʼaki te loto e tahi” ʼe ina fakatahiʼi tatou ʼi tatatou faiga ʼaē ke tou “faka kolōliaʼi” ia Sehova. (Lom. 15:5, 6) Ko te gāue mālohi mo ʼotatou ʼu kaugā faka mafola ʼi te kele katoa, ʼe ina fakamālohiʼi tatatou tui pea ʼe ina faka fealagia ki te laumālie ʼa Sehova ke gāue ia tatou ki te fakahoko ʼo tona finegalo. ‘Ko te fai ke lahi ʼaupito tuʼumaʼu te ʼu gāue ʼi te ʼAliki’ ʼe ina faka fealagia ai kia tatou ke tou ‘mālolohi, mo tuʼu tonu.’—1 Ko. 15:58.
5 ʼE lahi te ʼu fenua ʼe faigaʼi e Satana ke ina veuki tatatou logo tahi ʼaki tana fakafeagai ki tatatou gāue faka mafola. ʼE ina fakaʼaogaʼi te ʼu meʼa fuli ʼe ina maʼu moʼo fakatupu ʼaki te maveuveu pea mo te femahino kehekeheʼaki, ʼo ina faigaʼi ke ina fakatupu he ʼu fihi. (Taag. 6:19; Kal. 5:19-21, 26) ʼE loto e ia ke tou kau ki te ʼu fihi ʼi te malamanei peʼe ke tou kau ki te meʼa faka politike pea mo faka sosiale. (Sake 3:14-16) ʼE tokoni mai te Tohi-Tapu ke tou fakafeagai ki tona mālohi; koteʼuhi ʼe feala pe ke ina kai ia tatou. (1 Pe. 5:8, 9) ʼE mole tonu ke faka fealagia ke pulinoa te ʼuhiga moʼoni ʼo te ʼamanaki ʼo te Puleʼaga ʼi totatou ʼu loto pea mo totatou ʼatamai.
6 ʼE fakamaʼua e te taupau maʼu ʼo tatatou logo tahi te fakapotopoto pea mo te agapoto ʼaē mai ʼoluga. Ka hoko he ʼu fihifihia, tāfito la mo kapau ʼe hoko ki ʼotatou ʼu tēhina, ʼe tonu ke tou fakahā te fua ʼo te laumālie ke tou taupau te tokalelei. Ko te ʼu agaaga ʼo te mālama, ohage ko te fiatuʼu, mo te mānumānu, pea mo te manatu pe kia kita ʼe ko he ʼu agaaga fakatupu maveuveu pea ʼe tonu ke tou tauʼi te ʼu agaaga ʼaia. (Ef. 4:1-3; Kol. 3:5-10, 12-14) ʼE tonu ke tou taupau he ʼu manatu lelei pea mo fakaloto mālohi ʼi totatou ʼatamai. Ko te Puleʼaga ʼe ko he meʼa moʼoni ʼi totatou maʼuli! Kae ʼe tonu ke tou tokakaga ke tou taupau maʼu feiā!—Ef. 6:11, 13.
7 Ko te ʼuhiga moʼoni ʼo tatatou ʼamanaki fakaofoofo ki te Puleʼaga ʼe ina fakatahiʼi tatou ki te logo tahi ʼaē ʼe mole puli anai ʼi he temi.—Pes. 133:1.