Tou Fakaʼaogaʼi Te Tohi Te tagata ʼaē ʼe lahi tokotahi ʼo te ʼu temi fuli
1 ʼI te lolotoga ʼo te ʼu taʼu, ʼe teitei pe ke talanoa te ʼu tohi fuli ki te maʼuli pea mo te minisitelio ʼo Sesu Kilisito. Ko te faʼahi ʼaia ʼe tau mo feʼauga, koteʼuhi “ ʼe mole ʼi ai he fakamaʼuli ʼi he tahi atu, heʼe mole ʼi te lalo lagi he tahi higoa neʼe tuku ki te hahaʼi, ʼe tonu ke tou maʼuʼuli ai.” (Gāue 4:12) Ko te tohi foʼou ʼaia ʼe makehe tokotahi ʼi te faʼahi ʼaia, heʼe ko te hoki maʼu ʼaenī ʼo tatatou tohi neʼe fai tāfito ʼo ʼuhiga mo te maʼuli ʼo Sesu.
2 Koteā te ʼu faʼahiga puani ʼo te tohi ʼaia ʼe feala ke tou fakahā mokā tou fai tatatou ʼu ʼaʼahi? ʼE feala ke koutou uga te fia logo ʼa he tamasiʼi ʼaki te fakamatala fakaloto fiafia ʼi te kapite 44, ko tona kupu tāfito, “Neʼe faka gona e Sesu te afā fakamataku.” Ko he tahi ʼe tau mo he mahaki peʼe māʼimoa ʼe mahino ia ʼe fakafimālieʼi anai ia ʼaki te kapite 57, ko tona kupu tāfito, “Agaʼofa ki te kau lotomamahi.” Ko te kapite 90, “Te falala ki te toe tuʼuake,” ʼe tonu anai ke ina fakaloto mālohiʼi he tahi neʼe lotomamahi ʼi te mate ʼo he tahi neʼe ʼofa mamahi ai. Kapau ʼe tou palalau ʼo ʼuhiga mo te ʼu ʼaluʼaga ʼo te malamanei ʼe feala ke tou fakahā age te kapite 111, “Te fakaʼiloga ʼo te ʼu ʼaho fakamuli.”
3 ʼE feala ke koutou kamata fēnei takotou palalau:
◼ “Koteā koa te meʼa ʼe ʼamanaki te ʼAtua ke tou fai ʼi totatou ʼuhiga Kilisitiano? ʼE fakahā mai e te Tohi-Tapu ke tou muliʼi te faʼifaʼitaki neʼe tuku mai e te tagata ʼaē ʼe lahi tokotahi ʼi te malamanei, ko Sesu Kilisito. [Koutou lau ia 1 Petelo 2:21.] Neʼe ina akoʼi ki tana kau tisipulo te ʼofa ʼaē ki ʼonatou ʼu tatau, ke nātou taupau maʼu te aga maʼa, pea ke nātou faikole ke haʼu te Puleʼaga ʼo te ʼAtua. Ko totatou hāofaki ʼe fakalogo ki tatatou loto fakafetaʼi pea mo tatatou fakalogo ʼaē kia Sesu ko totatou Fakamaʼuli. [Koutou lau ia Soane 14:6.] Neʼe mole hage ia Sesu ko te tagata fuli. Ko te tohi ʼaenī ʼe talanoa ʼo ʼuhiga mo ia ohage ko te tagata ʼaē ʼe lahi tokotahi ʼo te ʼu temi fuli. Ko te kapite 59 ʼe ina fakamoʼoni te faʼahi ʼaia, ʼo ina fakahā ia ia ko ‘te Kilisito, te ʼAlo ʼo te ʼAtua maʼuli.’ Mai tona ʼaluʼaga ʼaē ʼe fakalogo totatou hāofaki kia te ia, ʼe mole hake koa la ʼi tokotou ʼu loto te manatu ʼaē ʼe maʼuhiga ke lahi ʼaupito tatatou ako tana gāue pea mo tana akonaki? Ko te tohi ʼaenī neʼe teuteuʼi tāfito ʼo ʼuhiga mo te faʼahi ʼaia, pea ʼe ʼau fiafia anai ʼi te tokoni kia koe ke tuputupu tau ʼatamai mālama ʼo ʼuhiga mo Sesu Kilisito.”
4 ʼI te ʼosi ʼo tatatou fakamālo ki he tahi neʼe ina tali te tohi “Te tagata ʼaē ʼe lahi tokotahi,” ʼe feala ke tou ʼui fēnei age:
◼ “Ohage ko taku fakahā atu ʼi taku ʼuluaki haʼu, ko te tohi Te tagata ʼaē ʼe lahi tokotahi neʼe fai moʼo ako ʼo te Tohi-Tapu. ʼE ʼau fia fakahā fakanounou atu peʼe feafeaʼi te fakaʼaogaʼi fakalelei ʼo te tohi ʼaia.” Tou avahi te tohi ʼi te kapite 5, “Te tupu ʼo Sesu: ʼifea pea neʼe hoko ʼanafea?” Tou fakatokagaʼi ia ia ki te ʼu fehuʼi ʼaē ʼe tuʼu ʼi te kapite ʼaia. Tou lau te ʼuluaki fehuʼi, ʼosi ʼaia pea tou vakaʼi te ʼu ʼuluaki palakalafe. Tou faka ʼalutahi mo te paki ʼo te lua pasina. Tou vakaʼi te ʼu fehuʼi ʼaē kei toe, pea tou fakahā age te ʼu tali mokā ʼe fealagia te temi. ʼI muʼa ʼo te fakaʼosi ʼo te fai palalau, tou fai he fakatuʼutuʼu ke tou toe liliu ʼo hoko atu te fai palalau.
5 ʼI te ʼosi ʼo tatatou fakahā totatou higoa, ʼe feala ke tou ʼui fēnei:
◼ “ ʼE mātou toe liliu mai ʼo fehuʼi ki te hahaʼi pe koteā tanatou manatu, mokā ʼe nātou lau ʼi tanatou Tohi-Tapu, te meʼa ke fai moʼo maʼu ʼo te maʼuli heʼegata. Ohage la, koutou fakatokagaʼi te meʼa ʼaē neʼe ʼui e Sesu ia Soane 17:3. [Tou lau.] Neʼe fai te tohi ʼaenī moʼo tokoni ki te hahaʼi ke lahi ʼaupito te meʼa ʼe nātou ako ʼo ʼuhiga mo Sesu Kilisito pea mo te meʼa ʼaē neʼe ina akoʼi.” Tou avahi te tohi Te tagata ʼaē ʼe lahi tokotahi ʼo tou fakahā age he ʼu paki matalelei. Tou fakahā age te ʼuluaki palalau ʼi te kamataʼaga ʼo te tohi, pea tou lau te lua palakalafe ʼo te kupu tāfito “Tou ako ke tou ʼiloʼi ia ia, ke fua lelei kia tatou.” Tou fakamahino ki ai peʼe feafeaʼi te fakahā e te tohi ʼaia te ʼu tali fakaloto fiafia ki te ʼu fehuʼi maʼuhiga ʼo ʼuhiga mo totatou fakamaʼuli ko Sesu Kilisito.
6 E lagi ʼe koutou maʼu anai te hahaʼi fakamalotoloto ʼe nātou tali anai te tohi pea ʼe nātou lau anai. Ke koutou tokakaga ʼo ʼaʼahi ia nātou fuli ʼaē neʼe nātou toʼo te tohi. ʼI he tahi temi, ʼe feala ke koutou fakatuʼutuʼu ke koutou fakaʼaogaʼi te tohi foʼou ʼaia moʼo kamata ʼo he ʼu ako faka Tohi-Tapu. ʼE lelei tāfito anai te tohi ʼaia ki te ako faka famili pea mo te ʼu ako ʼaē ʼe fai mo te ʼu tamaliki. Ko te vaevae ʼo te tohi Te tagata ʼaē ʼe lahi tokotahi ʼo te ʼu temi fuli mo niʼihi ʼe feala ke nātou maʼu ai te ala ki te maʼuli heʼegata.