Tohi ʼo Te ʼu Fakamanatu ʼo Te Ako ʼo Te Minisitelio Faka Teokalatike
Ko te fakamanatu ʼo te ʼu puani neʼe vakaʼi ʼi te lolotoga ʼo te Ako ʼo te minisitelio faka teokalatike ʼo te vāhaʼa ʼo te ʼaho 5 ʼo Sanualio ki te vāhaʼa ʼo te ʼaho 20 ʼo ʼApelili 1998. Koutou tali ʼo tohi ki he laupepa te ʼatu ʼu tali ʼo te ʼu fehuʼi ʼe koutou fealagia tona tali ʼi te kiʼi temi neʼe tuku mai.
[Nota: ʼI te lolotoga ʼo te fakamanatu, koutou fakaʼaogaʼi pe te Tohi-Tapu. Ko te ʼu kumiʼaga ʼaē ʼe foaki ʼi te ʼu fakaʼosi fehuʼi ʼe faka faigafua ki ʼakotou ʼu kumi takitokotahi. Ko te ʼu numelo ʼo te ʼu pasina pea mo te ʼu palakalafe ʼe mole fakahā tuʼumaʼu pe ki te ʼu kumiʼaga ʼo Te Tule Leʼo.]
Koutou tohi “moʼoni” peʼe “hala” moʼo tali ki te ʼu palalau ʼaē ʼe hoa mai:
1. ʼE fakahā mai e te Tohi-Tapu, neʼe ʼaʼahi tuʼa tolu e Paulo ia Kolonito. [si p. 202 § 3.]
2. Ko te ʼuluaki puani ʼaē ʼe ina taki ki te papitema faka Kilisitiano ʼe ko te fakahū ki totatou loto te ʼatamai mālama totonu ʼo ʼuhiga mo Sehova ʼAtua pea mo Sesu Kilisito. [kl p. 173 § 7.]
3. ʼE tou mahino ʼaki te manatu ʼaē ʼe tou maʼu ia Efesi 5:13, ko te ʼu aga ʼo te malamanei ʼe ko he ʼu agahala, pea ʼe tou ʼiloʼi moʼoni te faʼahi ʼaia mokā tou vakaʼi ʼaki te mālama ʼo te Folafola ʼa te ʼAtua. [Lau ʼo te Tohi-Tapu; vakaʼi te ad p. 941 § 4.]
4. ʼE feala ke tou maʼu te maʼuli ʼi tatatou tauhi kia Sehova ʼAtua. [kl p. 182 § 4.]
5. Ko te koga tohi ʼo Kalate 5:26, ʼe ina fakahā mai ʼe mole tonu ki te kau Kilisitiano moʼoni ke nātou fai te ʼu faʼahiga fakataupiepie kehekehe. [Lau ʼo te Tohi-Tapu; vakaʼi te g95 8/12 p. 15 § 8.]
6. ʼE ko Helote Atipasi, te hau ʼaē neʼe ina fakatotonu ke tuʼusi te kia ʼo Soane Patita. [ad p. 664.]
7. Neʼe fai e Paulo te tohi ki te kau Filipe, hili pe kiai ni ʼu kiʼi māhina, ʼi tana ʼosi fakatuʼu te kokelekasio ʼi Filipe, pea neʼe ina fai te tohi ʼaia ʼuhi ko te ʼu fihifihia ʼaē neʼe hoko ʼi te kokelekasio ʼaia. [si p. 211 § 3.]
8. Neʼe faʼifaʼitakiʼi e Esekiasi tana tāmai, ia Akasi, ʼo lagolago ki te tauhi ki te ʼu ʼatua loi ʼi Suta. [ad p. 513.]
9. ʼE faka ʼuhiga “te ʼāteaina” ʼaē ʼe tuʼu ia Filipe 1:23, ki te fakaʼamu ʼa Paulo ke fakatahi mo Kilisito ʼi te hili pe ʼo tona mate. [Lau ʼo te Tohi-Tapu; vakaʼi te w95 1/3 p. 30 § 4.]
Koutou tali ki te ʼu fehuʼi ʼaenī:
10. Koteā te ʼu aga ʼaē neʼe “mole tau mo feʼauga” neʼe fai e ʼihi ʼi Kolonito, ʼi tanatou kai te pane pea mo ʼinu te vino ʼi te Fakamanatu ʼo te mate ʼo Kilisito? (1 Ko. 11:27) [Lau ʼo te Tohi-Tapu; vakaʼi te w90 15/2 p. 19 § 17.]
11. Ko ai te ʼu hahaʼi ʼaē neʼe fakatupu tuʼutāmaki ki te kokelekasio ʼo Kolonito, ʼo tupu ai te fai e Paulo tana lua tohi kia nātou? [si p. 202 § 2.]
12. Koteā te ʼu tapuakina ʼaē ka foaki mai e Sehova ʼuhi ko te ʼu sakilifisio ʼaē neʼe tou fai maʼa tana tauhi? [kl p. 169 § 20.]
13. Koteā te ʼu meʼa ʼaē ʼe fai e ʼihi kau fai faka mafola ke feala hanatou maʼu te hahaʼi ʼi te minisitelio? [jv p. 516 §§ 2-4.]
14. ʼI tana fakaʼaogaʼi te Folafola ʼa te ʼAtua, koteā te faʼifaʼitaki lelei ʼaē neʼe tuku e Paulo ki te kau minisi Kilisitiano ʼo te temi ʼaenī? [si p. 204 § 19.]
15. Koteā te faka ʼuhiga ʼo te ʼui ʼaē e te ʼapositolo ko Paulo ko te Lao “neʼe hilifaki moʼo fakahā te ʼu talagataʼa”? (Kal. 3:19) [Lau ʼo te Tohi-Tapu; vakaʼi te uw p. 147 §§ 3-4.]
16. Ia Filipe 1:3-7, koteā te ʼu tupuʼaga ʼaē ʼe vikiʼi ai e Paulo te ʼu tēhina, pea ʼe lava ʼaoga feafeaʼi kia tatou tanatou faʼifaʼitaki? [si p. 212 § 12.]
17. He koʼe ʼe tonu ke muliʼi fuli e te kau minisi Kilisitiano te tokoni ʼaē ʼe tuʼu ia Kolose 4:6? [si p. 214 § 13.]
18. He koʼe neʼe fakatotonu e Sehova kia Elia ke “ina fakanofo ia Asaele ko he hau ki Silia”? (1 Hau 19:15) [ad p. 643.]
19. He koʼe ʼe lelei ke fakamavae e te kokelekasio faka Kilisitiano te kau agahala ʼaē ʼe mole fakahemala? (1 Ko. 5:11, 13) [Lau ʼo te Tohi-Tapu; vakaʼi te g96 8/9 p. 27 §§ 2-3.]
Koutou tohi te ʼu kupu ʼaē ʼe ʼaoga moʼo fakakatoa ʼo te ʼu kupuʼi palalau ʼaenī:
20. Ko te ʼohoana ʼa Helote Atipasi pea mo Helotiate neʼe ․․․․․․․․ pea ․․․․․․․․ ki te lao faka Sutea. [ad p. 667.]
21. Ko te ʼuluaki tohi ʼa Paulo ki te kau Kolonito ʼe ʼaoga ʼaupito kia tatou, heʼe tou mahino lelei ai ki te ․․․․․․․․ , ʼaē neʼe lahi tana fakaʼaogaʼi. [si p. 201 § 23.]
22. ʼI tana tohi ʼaē ki te kau Kalate, ʼe fakamoʼoni ai e Paulo ʼe faka lākatonuʼi tatou ʼuhi ko tatatou ․․․․․․․․ kia Sesu Kilisito, kae mole ʼuhi ko te ․․․․․․․․ , pea koia la ʼaē ʼe mole fakamaʼua ai te ․․․․․․․․ ki te kau Kilisitiano. [si p. 205 § 6.]
23. ʼI tana ʼuluaki tohi ki te kau Tesalonika, ʼe talanoa tuʼa fā ia Paulo ki te ․․․․․․․․ ʼa Sesu Kilisito, lagi ʼuhi ko te fia ʼiloʼi e te kokelekasio te akonaki ʼaia. [si p. 217 § 15.]
24. Ko te lua tohi ki te kau Tesalonika neʼe tohi e ․․․․․․․․ ʼi tana nofo ʼi ․․․․․․․․ ʼi te taʼu ․․․․․․․․ . [si p. 218 § 4.]
Koutou fakaʼiloga te ʼu tali ʼaē ʼe totonu:
25. ʼI tana ʼui ʼaē ʼe maʼua, ʼaki te minisitelio, ke ina maʼu ai te ʼu meʼa ʼaē ʼe ʼaoga ki tona maʼuli, neʼe fakatafito e Paulo tana ʼu palalau ʼaia ki te (Talmud; Mishna; Lao ʼa Moisese), ʼaē ʼe ʼui ai ʼe mole tonu ke haʼi te ʼu gutu ʼo te ʼu manu ʼaē ʼe gāue pea mo te ʼui ʼaē ko te kau (Levite; Netinime; mo te famili faka pelepitelo ʼo Alone) ʼaē ʼe gāue ʼi te fale lotu ʼe tonu ke nātou maʼu tonatou ʼinasi meʼa kai mai te ʼaletale. [si p. 201 § 24.]
26. Ko te tohi ʼa Paulo ki te kau Kalate ʼe ina fakamahino ai ia Isaia 54:1-6, ʼo ina ʼui ko te ʼohoana ʼo Sehova ʼe ko (te Selusalemi fakakelekele; te Selusalemi ʼaē ʼi ʼoluga; te Selusalemi Foʼou). (Kal. 4:21-26) [si p. 207 § 16.]
27. Ia Efesi 1:10, ko te “fakatuʼutuʼu” ʼaē ʼe talanoa kiai ʼe ko (te Puleʼaga faka Mesianike; te Kolesi Pule; te faʼahiga fakaʼaluʼalu ʼa te ʼAtua te ʼu meʼa ʼo tona ʼapi). [si-E p. 221 § 8.]
28. Ia 2 Tesalonika 2:3, ko “te tagata ʼaē ʼe manukinuki ki te lao” ʼe faka ʼuhiga ki (te kau Sutea; te kalasi ʼo te kau takitaki lotu ʼo te Keletiate; te Papiloni Lahi). [Lau ʼo te Tohi-Tapu; vakaʼi te w90 15/1 p. 19 § 11.]
29. Kapau ʼe koutou fakatahi mo he tahi pea ʼe koutou loto mahalohalo ʼo ʼuhiga mo ia, ʼe ko he agapoto anai ke koutou (tuku tokotou ʼofa ke ina ʼuʼufi takotou ʼu mahalohalo; fakagata te fakatahi; lītuʼa ki te ʼu hala mamafa ʼi takotou manatu ʼaē ʼe ʼamanaki ʼe lelei anai ia meʼa fuli mokā ʼosi te fai ʼohoana). [fy p. 24 § 19.]
30. Neʼe fai e Paulo tana ʼuluaki tohi ki te kau Kolonito ʼi tana kei nofo ʼi (Loma; Efesi; Kolonito) ʼi te taʼu (52; 55; 56) ʼo totatou temi. [si p. 198 § 3.]
31. ʼI te taʼu 1992, ko te kau ako e (2 500; 4 500; 6 500) tupu neʼe ʼōmai mai te ʼu fenua e (40; 80; 110) ʼo kau ki te ako ʼo Kalaate pea neʼe fekauʼi nātou ki te ʼu fenua mo te ʼu motu e (100; 150; 200). [jv p. 524 § 3.]
Fakatahiʼi te ʼu vaega faka Tohi-Tapu ʼaē ʼe ʼalutahi mo te ʼu kupuʼi palalau ʼaenī:
Gāue 12:20-23; 1 Ko. 10:11, 12; 2 Ko. 4:7; 2 Ko. 8:14
32. Ka fakamuʼamuʼa e he tahi te minisitelio faka Kilisitiano ʼi tona maʼuli, pea ʼe ina maʼu te mālohi ʼaē ʼe foaki mai e te ʼAtua. [Lau ʼo te Tohi-Tapu; vakaʼi te w90 1/3 p. 29 § 5.]
33. Ko te meʼa ʼaē neʼe hoko ki te kau Iselaele ʼaē neʼe takitaki e Moisese, ʼe ko he fakatokaga kia tatou ke ʼaua naʼa tou falala kia tatou totonu. [si p. 201 § 23.]
34. Ko te ʼu meʼa ʼofa ʼaē ʼe fai e te kau Kilisitiano maʼu meʼa, ʼe feala ke ʼaoga moʼo fakakatoa te ʼu meʼa ʼaē ʼe mole maʼu e nātou māsisiva, pea ko te gāue mālohi ʼo te ʼu tēhina masiva ʼaia, mo tanatou fai fakamalotoloto pea mo tanatou faʼa kātaki, ʼe ko he meʼa fakaloto mālohi pea mo fakafiafia ki te kau foaki meʼa ʼofa ʼaia. [Lau ʼo te Tohi-Tapu; vakaʼi te w93 15/12 p. 21 § 20.]
35. ʼE tonu ke tou tokaga ke ʼaua naʼa tou laupisi, heʼe ko te ʼAtua pea mo te tokolahi, ʼe nātou fehiʼa ʼaupito ki te faʼahi ʼaia. [ad p. 665; vakaʼi mo te w94 1/9 p. 21.]