Fakamanatu ʼo Te Ako ʼo Te Minisitelio Faka Teokalatike

Ko te fakamanatu ʼo te ʼu puani neʼe vakaʼi ʼi te lolotoga ʼo te Ako ʼo te minisitelio faka teokalatike ʼo te vāhaʼa ʼo te ʼaho 1 ʼo Sanualio ʼo aʼu ki te vāhaʼa ʼo te ʼaho 23 ʼo ʼApelili 2001. Koutou tali ʼo tohi ki he laupepa te ʼatu ʼu tali ʼo te ʼu fehuʼi ʼe koutou fealagia tona tali ʼi te kiʼi temi neʼe tuku mai.

[Nota: ʼI te lolotoga ʼo te fakamanatu, koutou fakaʼaogaʼi pe te Tohi-Tapu. Ko te ʼu kumiʼaga ʼaē ʼe foaki ʼi te ʼu fakaʼosi fehuʼi ʼe faka faigafua ki ʼakotou ʼu kumi takitokotahi. Ko te ʼu numelo ʼo te ʼu pasina pea mo te ʼu palakalafe ʼe mole fakahā tuʼumaʼu pe ki te ʼu kumiʼaga ʼo Te Tule Leʼo.]

Koutou tohi “moʼoni” peʼe “hala” ki te ʼu fehuʼi ʼaenī:

1. ʼI tana fakatotonu ki tana ʼu tisipulo ke ‘ ʼaua naʼa nātou fāʼufua ki he tahi ʼi te ala moʼo fefakaʼalofaʼaki,’ neʼe fia fakahā age e Sesu te maʼua ʼaē ke foimo fai te gāue fai faka mafola, pea ke nātou tokakaga tāfito ki te gāue maʼuhiga ʼaia. (Luka 10:4) [w98 1/3 p. 30 pal. 5]

2. ʼO hilifaki ki tana talanoa ki te ʼu hōloga, ko te tohi ʼo 1 Fakamatala ʼe ko he toe fakamatala pe ʼo te ʼu meʼa ʼaē ʼe talanoa kiai te ʼu tohi ʼo Samuele pea mo te ʼu Hau. [si p. 75 pal. 1]

3. Logola ko ʼihi ʼe nātou faka ʼuhiga te kupu “fakalotoʼi” ki he faiva kākā pea mo he fakaoloolo, kae ʼe feala ke faka ʼuhiga lelei ki te fetogi ʼa he manatu lelei e he fakakaukau fakapotopoto. (2 Tim. 3:14, 15) [w98 15/5 p. 21 pal. 4]

4. Ko te fale lotu ʼo Salomone ʼe ko he toe fale matalelei, mole ʼuhi pe ko tona kolōlia pea mo te matalelei ʼo tona faʼu, kae ʼuhi ko tana fakatomuʼa te kolōlia lahi age ʼo te fale lotu fakalaumālie ʼa Sehova. [si p. 69 pal. 26]

5. Ko te faikole ʼa Eliseo ke fakakiviʼi e te ʼAtua ia te kau solia ʼo Silia, neʼe ko he fakakiviʼi ʼo tonatou ʼatamai, koteʼuhi neʼe nātou lava sio kia Eliseo, kae neʼe mole nātou lava ʼiloʼi pe ko ai ia ia. (2 Hau 6:18, 19) [Lau ʼo te Tohi-Tapu; vakaʼi te si p. 71 pal. 10.]

6. Ko “te Fakamoʼoni,” ʼaē ʼe talanoa kiai ia 2 Hau 11:12, neʼe ko he fakatātā moʼo fakahā ko te fakamahino ʼa te hau ia te Lao ʼa te ʼAtua, neʼe mole feala ke fetogi, pea neʼe tonu ke fakalogo kiai te hahaʼi. [Lau ʼo te Tohi-Tapu; vakaʼi te wF91 1/2 p. 31 pal. 6.]

7. Ko te kau Kilisitiano ʼe nātou “sio” ki te ʼi henī ʼa Sesu ʼaki te ʼu mata ʼo tanatou mahino. [td 23B]

8. Ko te ʼu hōloga ʼaē ʼe talanoa kiai ia 1 Fakamatala neʼe mole faʼa ʼaoga ki te ʼuluaki kokelekasio faka Kilisitiano. [si p. 79 pal. 23]

Koutou tali ki te ʼu fehuʼi ʼaenī:

9. He koʼe neʼe fai e Sehova he fakatūʼa mamafa ki te loto fale ʼo Akape? (1 Hau 16:31; 2 Hau 9:​7, 26) [si p. 74 pal. 34]

10. Koteā te fakaloto mālohi ʼaē ʼe tou maʼu ia Pesalemo 34:18? [w98 1/4 p. 31 pal. 2]

11. He koʼe neʼe fakahigoaʼi ia Sosefo ko Palenapasi? (Gaue 4:​36) [w98 15/4 p. 20 pal. 3, te nota ʼi te lalo pasina.]

12. He koʼe ʼe feala hatatou talanoa ki te “mālohi fakahala ʼo te ʼu koloā”? (Mat. 13:22) [w98 15/5 p. 5 pal. 1]

13. He koʼe neʼe maʼuhiga ʼi te temi ʼo Isaia te fakamatala ʼaē ʼe tuʼu ia 1 Fakamatala 14:​8-​17, pea he koʼe ʼe tonu ke tokagaʼi e te Keletiate ia ʼaho nei? (Isa. 28:21) [Lau ʼo te Tohi-Tapu; vakaʼi te wF91 1/6 p. 21 pal. 2-3.]

14. Logola neʼe “mole hana lākahala pea neʼe totonu ia,” ʼe fakahā feafeaʼi mai e te tohi ʼo Sopo neʼe mole ko he tagata haohaoa? (Sopo 1:8) [w98 1/5 p. 31 pal. 1]

15. He koʼe ko te fakafisi ʼa Napote ke ina tuku age tana gāueʼaga vite kia Akape, neʼe mole ko hana aga fefeka pe? (1 Hau 21:​2, 3) [Lau ʼo te Tohi-Tapu; vakaʼi te w97 1/8 p. 13 pal. 18.]

16. Ia 2 Hau 6:​16, koteā te fakaloto mālohi ʼaē ʼe maʼu ai e te kau kaugana ʼa Sehova ia ʼaho nei? [Lau ʼo te Tohi-Tapu; vakaʼi te w98 15/6 p. 18 pal. 5.]

17. He koʼe neʼe tohi te ʼu Fakamatala? [si p. 76 pal. 2]

18. ʼO mulimuli kia 2 Hau 19⁠:​32, 33, neʼe tāʼofi feafeaʼi te Hau ʼo Asilia ke mole hū ki Selusalemi? [Lau ʼo te Tohi-Tapu; vakaʼi te wF88 15/2 p. 28 pal. 1.]

Koutou fakakatoa te ʼu kupuʼi palalau ʼaenī:

19. Ko te huafa ʼo te ʼAtua, ia Sehova, ko tona faka ʼuhiga ․․․․․․․․ pea ʼe hā ʼaki mai ko Sehova ʼe feala ke ina fakahoko te ʼu meʼa fuli ʼaē ʼe ʼaoga moʼo fakahoko tana ʼu ․․․․․․․․. [w98 1/5 p. 5 pal. 3]

20. Ohage ko te lototahi ʼa Sonatape mo te Hau ko Sehu, ia ʼaho nei ko te ․․․․․․․․ ʼe nātou fakamoʼoni ʼaki tonatou loto katoa pea ʼe nātou gāue tahi mo te Sehu Lahi, ia ․․․․․․․․ , ʼaē ʼe fakafofoga ʼi te kele e te ․․․․․․․․ . (2 Hau 10:15, 16) [Lau ʼo te Tohi-Tapu; vakaʼi te w98 1/1 p. 13 pal. 5-6.]

21. Ohage ko te meʼa ʼaē neʼe hoko ki te senelale Silia ko ․․․․․․․․ , ʼi ʼihi temi ʼe feala ke tou maʼu he ʼu tapuakina lahi mo kapau ʼe tou ․․․․․․․․ . [Lau ʼo te Tohi-Tapu; vakaʼi te w99 1/2 p. 3 pal. 6–p. 4 pal. 1.]

22. Ko te ʼu lisi ʼo te ʼu hōloga ʼaē ʼe tuʼu ia Tahi Fakamatala neʼe ina fakamālohiʼi te falala ʼa te hahaʼi ʼa te ʼAtua ki ․․․․․․․․ ʼaē neʼe gāue ʼi te fale lotu ʼaē neʼe toe laga. [si p. 79 pal. 22]

23. Ke feala ki he Kilisitiano moʼoni ke ina lava fai te meʼa ʼaē neʼe mole lava fai e Salomone, ʼe mole tonu ke ina fai tana tauhi ʼaki he ․․․․․․․․ , pea ʼe tonu ke mulimuli ki te ʼu folafola ʼa ․․․․․․․․ ke ‘ ʼofa kia Sehova ʼaki tona loto katoa.’ (Mat. 22:37; 1 Fkma. 28:9) [Lau ʼo te Tohi-Tapu; vakaʼi te wF86 1/6 p. 19 pal. 17-​18.]

24. ʼO mulimuli kia Soane 14⁠:​19, ko te toe liliu mai ʼa Sesu ʼe ․․․․․․․․ anai ki te tagata. [td 23A]

Koutou fakaʼiloga te ʼu tali ʼaē ʼe totonu:

25. Ko te fakamatala ʼo 2 Hau 17:​5, 6 ʼe ina fakamatala mai ko (Tiglath-Piléser; Salamanasar 5; Ésar-Haddôn) neʼe ina ʼohofiʼi te puleʼaga ʼo Iselaele ʼaē neʼe faʼufaʼu e te ʼu telepi e hogofulu ʼo te potu noleto, pea neʼe ina puleʼi ia Samalia lolotoga taʼu e tolu, pea neʼe ʼohofiʼi e te kau Asilia ʼi te taʼu (740; 607; 537) ʼi muʼa ʼo totatou temi. [Lau ʼo te Tohi-Tapu; vakaʼi te wF88 15/2 p. 27 pal. 1.]

26. ʼI tana fakamatala te ʼu meʼa ʼaē neʼe hoko ʼi Selusalemi ʼi te ʼosi kamata ʼo te ʼaunofo ʼi Papiloni, ko 2 Hau kapite 25 ʼe mole ina ʼui papau mai neʼe ko (Taniela; Esekiele; Selemia) ʼaē neʼe ina fai te tohi ʼaia, pea ʼe ina toe fakahā mai neʼe fakaʼosi tona tohi ʼi te taʼu (580; 537; 455) ʼi muʼa ʼo totatou temi. (2 Hau 25:27) [Lau ʼo te Tohi-Tapu; vakaʼi te si p. 65 pal. 3.]

27. Ohage ko tona tuʼu ia Soane 13:5, neʼe fia akoʼi mai e Sesu te kalitate ʼaē ko (te agalelei; te lotomahino; te agavaivai), ʼaē ʼe feala ai ki he tahi ke ina fia fakahoko he ʼu gāue fakamālalo maʼa ʼihi. [w98 15/3 p. 7-8 pal. 6]

28. Neʼe ko (te ʼapositolo ko Paulo; tana tāmai; tana faʼe pea mo tana kui fafine) ʼaē neʼe nā akoʼi kia Timoteo “te ʼu tohi taputapu,” pea neʼe liliu ai ko te misionea faiva pea mo te tagata taupau. (2 Tim. 3:​14, 15; Filp. 2:​19-​22) [w98 15/5 p. 8 pal. 3–p. 9 pal. 4]

29. “Ko te ʼuafulu taʼu ʼo Sotame” ʼe faka ʼuhiga ki te 20 taʼu ʼo (tona maʼuli; tona temi hau; te temi ʼaē neʼe kamata fakanofo hau ai). (2 Hau 15:30) [Lau ʼo te Tohi-Tapu; vakaʼi te wF80 15/12 p. 7.]

Koutou fakatahiʼi te ʼu vaega ʼaē ʼe ʼalutahi mo te ʼu kupuʼi palalau ʼaenī:

2 Hau 3:​11; 2 Hau 5:1-5; 2 Hau 6:​15-​17; Sel. 15:20; Hep. 10⁠:38; Skp. 5:​11

30. ʼE tou lava falala ko Sehova ʼe lagolago mai kia tatou mokā tou fakahoko te fakatotonu ʼaē ke tou faka mafola te logo lelei ʼo te Puleʼaga ʼo te ʼAtua. [w98 1/3 p. 28 pal. 1]

31. ʼE fakamoʼoni mai e Sehova ʼe ina fakaʼaogaʼi anai tana ʼu kautau faka ʼaselo moʼo puipui tana hahaʼi ʼo mulimuli ki tona finegalo. [w98 15/4 p. 29 pal. 5]

32. ʼE foaki mai e Sehova ʼAtua he fakapale lahi, mo kapau ʼe kita nofo agatonu ʼi te ʼu ʼahiʼahi. [w98 1/5 p. 31 pal. 4]

33. ʼE ko he pilivilesio hakita tali kāiga, pea mo hakita tauhi ʼaki he agavaivai ki te ʼu kaugana agatonu ʼa Sehova ʼaē ʼe nātou fai he ʼu gāue makehe. [Lau ʼo te Tohi-Tapu; vakaʼi te w97 1/11 p. 30 pal. 8.]

34. ʼE feala ki te fānau ke nātou uga te hahaʼi lalahi ke nātou fai he ʼu gāue. [Lau ʼo te Tohi-Tapu; vakaʼi te wF74 p. 594.]

35. ʼE mole tonu ʼi he temi ke tuku e he Kilisitiano ki tona ʼohoana, ke ina tāʼofi tana tauhi ki te ʼAtua. [td 9C]