Te Tohi ʼa Te Kolesi Pule
ʼE lahi te ʼu lelei ʼaē ʼe tou maʼu! ʼI totatou ʼuhiga kau Fakamoʼoni ʼa Sehova, ʼe ko he pilivilesio hatatou ʼiloʼi ia Sehova, te ʼAtua moʼoni e tahi pea mo maʼuli, te Tupuʼaga ʼo te ʼatulaulau, pea mo tatatou toʼo tona huafa pea mo tou tauhi kia te ia. ʼI tapuakina lahi leva ʼaē ʼe tou maʼu!—Isa. 43:12; Hep. 8:11.
ʼE tou maʼu te ʼamanaki ʼo te hāofaki, pea neʼe fakatotonu mai ke tou faka mafola te logo lelei ʼo te Puleʼaga, ke feala ki ʼihi hahaʼi ke nātou atolasio mo nātou kia Sehova pea mo maʼu tatatou ʼamanaki. (Mat. 24:14; Loma 10:13, 14; 1 Tes. 5:8) Tahi ʼaē meʼa, ʼe tou fiafia heʼe tou kau ki te foʼi famili faka tautēhina ʼo te malamanei katoa, ʼaē ʼe nātou feʼofani pea mo fetokoniʼaki. ʼE ko he ʼu tapuakina fuli ʼaia!
ʼE fai mai e te Tohi-Tapu te fakaafe ʼaenī: “Koutou tauhi kia Sehova ʼaki he loto fiafia. . . . Koutou hū ki tona ʼu matapā ʼaki he loto fakafetaʼi, pea mo he fakavikiviki ki tona ʼu malaʼe. Koutou fakafetaʼi kia te ia, koutou tapuakina tona huafa. Koteʼuhi ko Sehova ʼe agalelei; ko tona lotoʼofa ʼe aʼu ki he ʼu temi ʼe heʼegata, pea ko tana agatonu ʼe fai ʼi he taʼiake ki he taʼiake.” (Pes. 100:2-5) ʼE feala ke tou tauhi fakafiafia kia Sehova, mo kapau ʼe mālohi tatatou ʼu felogoi mo ia. ʼE ina faka fealagia ke tou felogoi feiā mo ia, pea ʼe ko he pilivilesio hatatou taupau te ʼu felogoi ʼaia. Ka tou maʼu te taʼi ʼu felogoi ʼaia, pea ʼe tou ʼiloʼi ko Sehova ʼe lava tokoni tuʼumaʼu mai, pea ʼe ina fakaloto mālohiʼi tatou ʼi te ʼu temi faigataʼaʼia. ʼE tou falala ʼe ina foaki mai anai te mālohi fakalaumālie pea mo te takitaki ʼaē ʼe ʼaoga, ke tou lavaʼi te maʼuli faigataʼa ʼi te ʼu ʼaho fakamuli ʼo te mālama ʼaenī. Tatau aipe pe koteā te ʼu fihifihia ʼaē ʼe hoko kia tatou, kae ʼe tou fiafia ʼi tatatou minisitelio, pea ʼe tou fakamālo kia Sehova ʼi te ʼaho fuli, koteʼuhi ohage ko tona fakamanatuʼi mai e tana Folafola, ‘ ʼe tokaga kia tatou.’—1 Pet. 5:7.
Lolotoga te taʼu ʼaenī kua ʼosi, neʼe lahi tatatou ʼu tapuakina mai ia Sehova. ʼI te Fakatahi Faka Tisitilike “Tou Maʼuliʼi Te Folafola ʼa Te ʼAtua,” neʼe tou fiafia ʼi te fakatahi mo te lauʼi afe hahaʼi ʼe nātou maʼu he tui ohage ko tatou, mo tou hihiva pea mo kakai fakatahi ʼi te laupapa fakalaumālie ʼa Sehova. ʼI te ʼu Ako Tohi, neʼe lahi te ʼu kokelekasio neʼe fakaloto mālohiʼi tanatou tui ʼi tanatou ako te tohi Prêtons attention à la prophétie de Daniel ! Pea tahi ʼaē meʼa, neʼe tou fiafia ʼaupito ʼi te foaki mai ʼo te tohi foʼou La prophétie dʼIsaie, lumière pour tous les humains I. ʼE tou lava ʼui ‘kua fonu lelei totatou ipu.’—Pes. 23:5.
ʼI meʼa fakafiafia hatatou ʼiloʼi ko te toko lauʼi miliona ʼu tēhina mo tuagaʼane fakalaumālie, ʼe nātou logo tahi moʼo tauhi kia Sehova! ʼI meʼa fakaloto mālohi hakita lau te ʼu tuputupu foʼou ʼaē neʼe hoko ʼi te minisitelio! ʼE tou fiafia ʼuhi ko te lauʼi miliona hahaʼi ʼaē neʼe ʼōmai ki te Fakamanatu ʼo te mate ʼo totatou ʼAliki—logola te ʼu faigataʼaʼia ʼaē ʼe hoko ʼi te malamanei katoa. Kapau ʼe tou vakavakaʼi te gāue faka mafola ʼaē ʼe fai ʼi te malamanei, ʼe tou mahino ai ko “te taʼukai ʼe lahi.” (Lu. 10:2, MN ) ʼI te taʼu ʼaenī kua ʼosi, neʼe fakafuafua ko te toko 5 555 kau ako Tohi-Tapu ʼi te vāhaʼa fuli, neʼe nātou foaki tonatou maʼuli kia Sehova pea mo nātou papitema. Logola ko te taʼukai ʼe lahi ʼi ʼihi potu ʼo te kele, kae ʼe tou fiafia fuli ʼi te ʼu meʼa ʼaē ʼe fai e Sehova. ʼE tou sio lelei ki te ʼu fakamoʼoni ʼe ina tapuakinaʼi te ʼu faiga ʼo tana ʼu kaugana ʼi te logo tahi.
Neʼe tou toe fiafia lahi ʼi te laga ʼo te ʼu Fale foʼou ʼo te Puleʼaga! ʼE tou fiafia ʼaupito he neʼe lagolago ʼaupito ki te gāue ʼaia, te ʼu tēhina mo tuagaʼane ʼo te ʼu fenua ʼaē ʼe maʼu koloā. ʼAki te tokoni ʼa te ʼu kūtuga ʼaē neʼe akoʼi age kia nātou te laga ʼo te ʼu Fale ʼo te Puleʼaga, kua fakatuʼu te ʼu lauʼi teau Fale ʼo te Puleʼaga. Ko te ʼu tēhina ʼaia ʼe nātou feʼoloʼaki ʼi te ʼu kokelekasio ʼo tonatou fenua, moʼo takitaki te laga ʼo te ʼu Fale ʼo te Puleʼaga. Mai tona ʼuhiga ʼaē ʼe kei ʼaoga ke laga he ʼu lauʼi afe Fale ʼo te Puleʼaga, koia ʼe kole mamahi ki he ʼu tēhina mo tuagaʼane ʼo te ʼu fenua koloaʼia, ke nātou tokoni ki te gāue maʼuhiga ʼaia. Kapau ʼe koutou nonofo ʼi te taʼi fenua ʼaia, ʼe feala koa hakotou faka ʼāteaina ʼo koutou moʼo fai te gāue ʼaia? ʼI meʼa fakafiafia foki ki totatou ʼu tēhina mo tuagaʼane, hanatou maʼu tonatou ʼu Fale ʼo te Puleʼaga ke feala hanatou ʼolo ʼo tauhi ai! Pea ʼe nātou loto fakafetaʼi ʼaupito ki tonatou ʼu tēhina mo tuagaʼane ʼo te malamanei katoa, ʼaē neʼe nātou tokoni ʼaki tanatou falā moʼo faka fealagia te ʼu gāue ʼaia!
ʼE tou fiafia he neʼe iku lelei te ʼu fakamāu ʼaē neʼe fai ʼo ʼuhiga mo tatou. Kae ʼe lahi te ʼu fenua ʼe toe fia molehi ai e te hahaʼi maʼu tuʼulaga te tauhi ʼa Sehova. ʼI te ʼu ʼaluʼaga ʼaia, ʼe tou falala ai, ʼe lava tokoni mai ia Sehova, tatau aipe peʼe tokolahi te kau fakafeagai, peʼe kua gaʼegaʼe tana ʼu kaugana. (2 Fkma. 14:11) ʼE fai atu he fakafetaʼi kia koutou fuli ʼu tēhina mo tuagaʼane ʼaē ʼe koutou haga nofo agatonu ki te tauhi moʼoni.
Koutou haga fakamālohi takotou tui pea mo koutou falala mālohi ki te takitaki ʼa Sehova, ʼo koutou fakahoko fakafiafia tokotou ʼu maʼua faka Kilisitiano. (Taag. 3:5, 6) ʼAua naʼa tou lotovaivai, tatau aipe pe koteā te ʼu faigataʼaʼia ʼe lava fakahoko e te fili. Koutou manatuʼi te fakaloto mālohi ʼaē neʼe fai e Eliseo ki tana kaugana ʼaē neʼe tuʼania: “ ʼAua naʼa ke mataku, heʼe kaugamālie age ia nātou ʼaē ʼe kau mo tāua, ia nātou ʼaē ʼe kau mo nātou.” (2 Hau 6:15-17) ʼI te temi nei, kua tokalelei te ʼu foʼi tau ʼa Sehova ʼi selo moʼo puipui te ʼu gāue ʼo te tauhi maʼa, ohage ko te temi ʼo Eliseo. ʼE tou falala ʼo ʼuhiga mo te ka haʼu, heʼe takitaki tatou e Sehova. ʼE mole feala ki te ʼu puleʼaga ke nātou tauʼi ia ia. Kua ina fakanofo hau tona ʼAlo, pea mo foaki katoa kia ia te pule. “Manuʼia ia nātou fuli ʼaē ʼe fenonoʼi ia te ia.”—Pes. 2:1-6, 12.
Ke ʼaua naʼa galo kia koutou fuli, ʼu tēhina mo tuagaʼane, ʼe mātou manatu tuʼumaʼu kia koutou. ʼE mātou faikole mālohi ke feala kia koutou fuli “ke koutou katoa pea mo koutou tui mālohi ʼo ʼuhiga mo te finegalo katoa ʼo te ʼAtua.”—Kol. 4:12.
Tokotou ʼu tēhina,
Te Kolesi Pule ʼa Te Kau Fakamoʼoni ʼa Sehova