Tou Loto Fakafetaʼi Ki Te Manavaʼofa ʼo Te ʼAtua
1 ʼI muʼa ʼo tana liliu ko he Kilisitiano, neʼe fakafeagai mālohi ia te ʼapositolo ko Paulo ki te mafola ʼo te Lotu Faka Kilisitiano. Kae ʼuhi ko tana mole ʼiloʼi neʼe kovi te meʼa ʼaē neʼe ina fai, neʼe fakahā age kia ia te manavaʼofa. Neʼe fakahā e Sehova tona ʼofa makehe, pea neʼe ina foaki kia Paulo te gāue fai faka mafola maʼuhiga, pea neʼe ko he pilivilesio ʼaia kia Paulo. (Gaue 26:9-18; 1 Tim. 1:12-14) Ko tona loto fakafetaʼi ki te manavaʼofa ʼo te ʼAtua ʼaē neʼe ina uga ai Paulo ke ina sakilifisioʼi tona maʼuli moʼo fakahoko tana minisitelio.—2 Ko. 12:15.
2 Neʼe toe foaki mai kia tatou he minisitelio pea ʼe ko te fakahā ʼaia ʼo te manavaʼofa ʼo te ʼAtua. (2 Ko. 4:1) Ohage ko Paulo, ʼe feala ke tou fakahā totatou loto fakafetaʼi ki te manavaʼofa ʼaē neʼe fakahā mai, ʼo tou faiga ke tou tokoni ki te hahaʼi ke nātou tuputupu ʼi te faʼahi fakalaumālie. ʼE feala ke tou fai te faʼahi ʼaia ʼaki tatatou kamata pea mo fai he ʼu ako Tohi-Tapu.
3 Tou Kamata He ʼu Ako Tohi-Tapu: ʼE feala ke tou kamata he ʼu ako Tohi-Tapu mo te ʼu hahaʼi ʼaē ʼe tou ʼave tuʼumaʼu kia nātou tanatou ʼu nusipepa. ʼI tatatou ʼaʼahi tuʼumaʼu ia nātou ʼaia, ʼe tou liliu ʼo ʼiloʼi lelei ai te ʼu meʼa ʼaē ʼe nātou fia palalau kiai. Ki muli age, ʼe feala ke fakaʼaogaʼi he alatike ʼi he nusipepa moʼo kamata he fai palalau ʼo ʼuhiga mo he ako Tohi-Tapu ʼaki te kaupepa Fakamaʼua. ʼI te ʼu ʼaʼahi ʼaē ʼe hoa kiai, ʼe feala ke hoko atu te ʼu fai palalau ʼi te kaupepa Fakamaʼua mokā tou toe liliu moʼo ʼave tana ʼu nusipepa.
4 ʼE ʼAoga Te Faikole Pea Mo He ʼu Faiga: ʼE tuputupu anai tatatou gāue fai faka mafola mo kapau ʼe tou faikole pea mo faiga lahi kiai. Ko te tuagaʼane pionie ʼaē neʼe ko tana ako Tohi-Tapu e tahi, neʼe faikole ke tapuakina ia ia e Sehova ʼaki he tahi ʼu ako. Neʼe gāue foki ʼo mulimuli ki tana ʼu faikole. Neʼe ina vakavakaʼi tana minisitelio, pea neʼe ina tokagaʼi neʼe mole ina fakaafe te hahaʼi ʼaē ʼe ina ʼaʼahi ke fai hanatou ako Tohi-Tapu. Neʼe ina kamata fai te faʼahi ʼaia pea mole fualoa, neʼe ina maʼu tana ʼu ako e lua.
5 ʼE ko he pilivilesio hatatou kau ki te fakahā ʼo “te logo lelei ʼo te ʼofa makehe ʼo te ʼAtua.” (Gaue 20:24, MN ) ʼOfa pe ke uga tatou e totatou loto fakafetaʼi ki te manavaʼofa ʼo te ʼAtua, ʼo tou gāue lahi moʼo tokoni ki te hahaʼi ke nātou maʼu mo nātou te ʼofa makehe ʼo Sehova.