Te ʼu Tonu

◼ Te tufa ʼo Sepetepeli: Te tagata ʼaē ʼe lahi tokotahi ʼo te ʼu temi fuli peʼe ko Te Tohi ʼo Te ʼu Hisitolia Faka Tohi-Tapu. ʼOketopeli: Te Tule Leʼo pea mo te Réveillez-vous ! Kapau ʼe fia logo he tahi pea koutou foaki age te kaupepa Fakamaʼua, pea mo faiga tāfito ke kamata he ʼu ako Tohi-Tapu. Novepeli: Te tagata ʼaē ʼe lahi tokotahi ʼi te ʼu temi fuli. Peʼe feala ke koutou tufa te kaupepa lahi Fakamaʼua. Koutou faiga tāfito ke koutou fakaʼaogaʼi te kaupepa lahi ʼaia moʼo kamata he ʼu ako Tohi-Tapu. Tesepeli: Te tagata ʼaē ʼe lahi tokotahi ʼi te ʼu temi fuli. Peʼe feala ke koutou tufa Te Tohi ʼo Te ʼu Hisitolia Faka Tohi-Tapu.

◼ Ko te foʼi fime viteo Pas de sang​—La médecine relève le défi ʼe vakaʼi anai ʼi he Fono Gāue ʼi Tesepeli. ʼE feala ke koutou sio ki te ʼata ʼaia ʼi te DVD ko tona kupu tāfito Des alternatives à la transfusion. ʼI te DVD ʼaia ʼe ʼi ai te ʼu ʼata ʼaenī: Stratégies alternatives à la transfusion : simples, sûres, efficaces; Soigner sans transfusion​—Besoins et droits du patient; pea mo te Pas de sang​—La médecine relève le défi. Kua fakaliliu ki te ʼu lea Fakafalani, Faka Italia, Faka Lusia, Fakapilitānia, Faka Potukalia (Pelesile), Faka Saponia, Faka Sepania pea mo te Faka Siamani. Ko te foʼi fime viteo Pas de sang ʼe maʼu ʼi te ʼu lea Faka Keleka, Faka Pulukalia, Faka Holani, Faka Italia, Faka Kolea, Faka Siaina (te Cantonais), Faka Lusia, Fakapilitānia, Faka Polonia, Faka Saponia pea mo te Faka Sepania. Kapau ʼe ʼaoga, pea ʼe tonu ke foimo fakaʼui e te kokelekasio he tahi ʼu DVD pea mo he ʼu foʼi fime viteo.

◼ Ko te akonaki makehe ki te kaugamālie ʼaē ka fai ʼi te temi ʼo te ʼAho Fakamanatu ʼo te taʼu 2005 ʼe fai anai ʼi te ʼAhotapu, ʼaho 10 ʼo ʼApelili. ʼE hoki tala atu anai te kupu tāfito ʼo te akonaki. Ko te ʼu kokelekasio ʼaē ʼe lolotoga ʼaʼahi e te tagata taupau faka silikosikilipisio peʼe nātou fakatahi ʼi te fakaʼosi vāhaʼa ʼaia, ʼe fai anai tanatou akonaki makehe ʼi te vāhaʼa ʼaē ka hoa atu kiai. ʼE mole fai anai te akonaki makehe ʼi muʼa ʼo te ʼAhotapu, ʼaho 10 ʼo ʼApelili 2005.

◼ ʼE tonu ki he tahi ʼi te ʼu tagata ʼāfea ke ina tohi katoa te pepa Fiche dʼinspection de sécurité (T-34-F) ʼi te māhina ʼo Sepetepeli ʼi te taʼu fuli. ʼE tonu ke foimo foaki ki te ʼu kokelekasio takitahi ʼaē ʼe nātou fakaʼaogaʼi te fale ʼo te Puleʼaga te pepa ʼaē ʼe fakamoʼoni ai ko tanatou kele. Kapau ʼe tonu ke fai he ʼu fetogi, pea ʼe tonu ke tokakaga te ʼu tagata ʼāfea kiai moʼo puipui te ʼu meʼa ʼaē ʼe maʼu e te kokelekasio. ʼI te ʼaʼahi ʼa te tagata taupau faka silikosikilipisio ia te kokelekasio, ʼe ina toe vakaʼi anai te ʼu pepa ʼaē ʼe nātou fakamoʼoni ai ko tonatou kele pea mo te pepa Fiche dʼinspection de sécurité (T-34-F). Toe vakaʼi te tohi ʼo te ʼaho 7 ʼo Fepualio ʼo te taʼu 2004.

◼ ʼE fakamanatuʼi ki te kau tagata ʼāfea ke nātou mulimuli ki te ʼu tokoni ʼaē ʼe tuʼu ʼi te pasina 21 ki te 23 ʼo Te Tule Leʼo (Fakafalani) ʼo te ʼaho 15 ʼo ʼApelili 1991, mo kapau ʼe toe fia liliu mai ia nātou ʼaē neʼe fakamavae peʼe ko nātou ʼaē neʼe mavae ʼi tonatou loto tokotahi.

◼ ʼE tonu ke foimo tufa e te ʼu kokelekasio te ʼu Tule Leʼo pea mo te ʼu Réveillez-vous ! fakamuli, ʼi te temi pe ʼaē ʼe tau mai ai. ʼE feala ai ki te kau fai faka mafola ke nātou lau ʼi muʼa ʼo tanatou tufa ʼi te fai faka mafola.

◼ Ko te māhina ʼo ʼOketopeli ʼe ko ʼona fakaʼosi vāhaʼa e nima, koia ʼe ko he māhina lelei ʼaia ke tou toʼo ai te selevisi pionie vaeluaʼi temi.