ʼE Koutou Sio Koa Ki He Tahi ʼe Faigataʼaʼia?
1 ʼE ʼui ko Sehova ʼe ko He Tahi ʼe Tokoni ki te hahaʼi, pea ʼe ko he Holaʼaga. ʼE tou ʼiloʼi ʼe feala ke tou kumi tokoni ki ai ʼi te ʼu temi ʼaē ʼe tou felāveʼi ai mo ni ʼu faigataʼaʼia pea ʼe tokoni mai anai kiā tatou. (Pes. 18:2; 46:1) ʼE feala hatatou muliʼi te kalitātē matalelei ʼaia ʼo te ʼAtua, mokā tou sisio ki he tahi ʼe faigataʼaʼia.
2 Koteā ʼaē ʼe ina uga he tahi ke fia tokoni ki he tahi age? Ko te tokolahi ʼe nātou ʼui ʼe ko he aga ʼe tonu ke fai, pea ʼe ko he aga faka Kilisitiano. Pea ʼe fakaloto mālohiʼi tatou e te Folafola ʼa te ʼAtua ke tou fai te aga ʼaia. (Loma 15:1) Neʼe uga tatou e Paulo ke ‘ʼaua naʼa tou tōkakaga ʼāteaina pe ki te ʼu meʼa ʼaē ʼa tatou totonu, kae ke tou toe tōkakaga pe foki ki te ʼu meʼa ʼaē ʼo ʼuhiga mo ʼihi.’—Filp. 2:4.
3 ʼE feala kiā tatou fuli ke tou ʼiloʼi te fiafia mo kapau ʼe tou fai te faʼahi ʼaia. (Gaue 20:35) Neʼe talanoa ia Paulo ʼo ʼuhiga mo te tūpulaga ko Timoteo, ʼe ko he tahi neʼe “tokaga lelei ki te ʼu meʼa ʼo ʼuhiga mo” tona ʼu tēhina. (Filp. 2:20, MN) Ko he meʼa lelei hatatou maʼu ʼi te ʼu kokelekasio ʼo te temi nei he kau tūpulaga e tokolahi ʼe nātou fai te aga ʼaia. Peʼe tou tūpulaga peʼe tou mātutuʼa, kae ʼe ʼi ai te ʼu meʼa ʼe feala ke tou fai mo kapau ʼe tou sisio ki he tahi ʼe faigataʼaʼia.
4 Kua koutou fakatokagaʼi koa niʼihi ʼe tau mo ni ʼu faigataʼaʼia, pea ʼe feala ke tou tokoni lelei age kiā nātou? ʼE feala ko he tēhina peʼe ko he tuagaʼane neʼe ʼi te lōpitali , pea neʼe tokosiʼi ia nātou ʼaē neʼe ʼolo ʼo ʼaʼahi ia ia, peʼe ko he tahi ʼe māʼimoa, kae neʼe mole he tahi moʼo tuʼufekau ki ai pea moʼo tokoni age ki te ʼu gāue ʼo tona loto fale. ʼE ʼui e Sesu ko nātou ʼaē ʼe nātou tauhi kiā Sehova, ʼe nātou kau ki he foʼi famili ʼe feʼofaʼofani moʼoni. (Mko. 3:33-35) ʼI te lea fakatātā ʼo ʼuhiga mo te ʼu ōvi pea mo te ʼu tao, neʼe ina fakahā ko nātou ʼaē ʼe tapuakina e te Hau ke nātou nonofo ʼi tona toʼomataʼu, ko tona tupuʼaga ko tanatou tokoni ki te ʼu tēhina ʼo te Hau.—Mat. 25:40.
5 ʼE Au Lava Tokoni Feafeaʼi? Koteā ʼaē ʼe feala ke tou fai mo kapau ʼe tou sio ki he tahi ʼe fēlaveʼi moʼoni mo hona faigataʼaʼia? ʼE feala koa ke tou fai e tatou totonu he fakatuʼutuʼu moʼo tokoni kiā ia? Lagi ʼe ʼi ai ʼihi hahaʼi mātutuʼa ʼe ʼaoga kiā nātou he fakaloto mālohi, kae ʼe mole honatou ʼu kaumeʼa moʼo tokoni kiā nātou. ʼE lagi ʼi ai he kau tūpulaga ʼe ʼaoga kiā nātou he tokoni. Lagi ko he taumātuʼa mo tanā fānau kaugamālie ʼe nātou foʼofoʼou mai ki te Fale ʼo Te Puleʼaga, kae ʼe puli ʼi te fono ia ia ʼaē ʼe ina fai tanatou ako. ʼE lagi nātou leleiʼia ke tokoni age he tahi kiā nātou mo tanatou fānau.
6 ʼAki te tuputupu ʼo totatou ʼofa ki te moʼoni pea mo te kautahi ʼa Sehova, ʼe toe tuputupu ai foki mo tatatou fakafetaʼi pea mo tatatou loto tokaga ki niʼihi age ʼi te kokelekasio. Neʼe fakaloto mālohiʼi tatou e Paulo ke tou tuputupu ʼi te faʼahi ʼaia. (2 Ko. 6:11-13) Neʼe ʼui fakalelei e Sesu ko tatatou feʼofaʼofani, ʼe ko te faʼahi tāfito ʼaia ʼe tou fakahā ai ko tatou ko ʼana tisipulo moʼoni.—Soa. 13:35.
7 Koia ka tou sio ki he tahi ʼe faigataʼaʼia, pea ʼe tonu ʼaki totatou ʼofa moʼoni, ke tou fai he ʼu fakatuʼutuʼu moʼo tokoni ki ʼotatou tēhina pea mo te kokelekasio ʼo mulimuli ki totatou ʼu fealagia. (Kal. 6:9, 10) Ko te fia tokoni ʼaia, ʼe ina fakatahiʼi tatou ʼi te ʼu noʼo ʼo te ʼofa pea mo te logo tahi. (1 Ko. 10:24) ʼAki tona fai ʼaia, ʼe tou fai te meʼa ʼaē ʼe tou lavaʼi moʼo tokoni ki ʼaē ʼe ʼaoga ki ai he tokoni ʼi te kokelekasio.