Te Tali Ki ʼAkotou ʼu Fehuʼi

◼ ʼE lelei koa te fai ʼo he fakatuʼutuʼu ke fakatau he ʼu koloa peʼe ko he ʼu tānaki falā moʼo tokoni ki te kōkelekāsio?

ʼE ko he agamāhani ʼa te ʼu kautahi lotu hanatou fai he ʼu tae falā, ʼi he ʼu kātoaga, ʼi he ʼu fakatau koloa, peʼe fai he ʼu kelemesi. ʼE lagi manatu anai e ʼihi ʼe ko he ʼu fakatuʼutuʼu lelei ʼaia, kae ko te ʼu meʼa ʼaia ʼe ko he kole falā ki te hahaʼi. ʼE mole fai feiā e te kau Fakamoʼoni ʼa Sehova tanatou lagolago ʼi te faʼahi ʼo te paʼaga.

ʼI te lua nusipepa ʼo Te Tule Leʼo, ʼi ʼAukusitō 1879, neʼe ʼui fēnei ai ʼo ʼuhiga mo tatatou mole fia faʼifaʼitakiʼi ia te ʼu ʼēkelesia pea mo te kole falā: “ ʼE tou faka tui ʼe lagolago ia SEHOVA ki te ‘Tule Leʼo ʼo Sione,’ pea kapau ʼe haga hoko atu tana lagolago ʼaia, ʼe mole ʼi ai anai he temi ʼe kolekole anai pea mo fakaʼui anai he lagolago fakatagata ʼo ʼuhiga mo te nusipepa ʼaenī. Kapau leva ko ia ʼaē ʼe ina ʼui fēnei: ‘ ʼE ʼaʼaku te ʼaulo fuli pea mo te siliva fuli ʼo te ʼu moʼuga,’ ʼe mole kei ina fia foaki mai ia te falā ʼaē ʼe ʼaoga ki te faʼahi ʼaia, ʼe mahino ai leva kiā tātou kua tonu ke fakagata te tā ʼo te nusipepa.”

ʼE tou haga mulimuli ki te pelesepeto faka Tohi-Tapu ʼaenī: “Ke tahi fai pē ki te meʼa kua ina fakatotonu ʼi tona loto, ʼo mole fai ʼaki he loto fakahemala peʼe ʼaki he loto fakakinau, heʼe ko te ʼAtua ʼe ʼofa kiā ia ʼaē ʼe ina foaki ʼaki te loto fiafia.” (2 Ko. 9:7, MN ) ʼE kei maʼu pē te ʼu puha tānaki falā ʼi te Fale ʼo Te Puleʼaga, ʼo feala ai ki te hahaʼi ke natou foaki he ʼu meʼa ʼofa mo kapau ʼe natou loto kiai. (2 Hau 12:9) ʼE mole fai he tae falā, pea ʼe mole foaki he falā ʼaki he fakaʼamu ke toe liufaki age.