Te ʼu Tonu

◼ Malesio: Koteā ʼAē ʼe Akoʼi Moʼoni Mai ʼi Te Tohi-Tapu? Kotou faiga ke kotou kamata he ʼu ako Tohi-Tapu. ʼApelili Pea Mo Maio: Ko Te Tule Leʼo pea mo te Réveillez-vous ! ʼE tou faiga tāfito anai ke tou ʼaʼahi te hahaʼi ʼaē ʼe fia logo pea neʼe kau ki te ʼAho Fakamanatu peʼe ki te akonaki makehe ki te hahaʼi fuapē kae ʼe mole natou ʼomai putuputu ki te kōkelekāsio. Ko te fakatuʼutuʼu ʼo te ʼu ʼaʼahi ʼaia ʼe ko te kamata ʼo he Ako Tohi-Tapu mo nātou ʼaē mole heʼeki fai hanatou ako. Sūnio: Te Tohi ʼo Te ʼu Hisitolia Faka Tohi-Tapu peʼe Te Tagata ʼAē ʼe Lahi Tokotahi ʼo Te ʼu Temi Fuli.

◼ ʼE tonu ke foimo tufa e te ʼu kōkelekāsio te ʼu Tule Leʼo pea mo te ʼu Réveillez-vous ! foʼou ʼi te temi pē ʼaē ʼe tau mai ai. Heʼe feala ai anai ki te kau fai fakamafola ke natou ʼiloʼi lelei te ʼu nusipepa ʼi muʼa ʼo tanatou tufa ʼi te telituale.

◼ ʼE tonu anai ki he tahi neʼe hinoʼi e te taupau pelesitā, ke ina vakaʼi ia te falā ʼo te ʼu māhina ʼo Tesepeli, Sānualio pea mo Fepualio. ʼE mole tonu ke fakaʼaogaʼi tuʼumaʼu pē he tehina e tahi moʼo fai ia te faʼahi ʼaia. Kā ʼosi anai ia te faʼahi ʼaia, pea ʼe tala anai ki te kōkelekāsio ʼi te vāhaʼa ʼaē kā lau ai te falā.—Vakaʼi ia te pepa Instructions pour les comptes de la congrégation (S-27).

◼ Ko te kupu tāfito ʼaenī ʼo te fakatahi fakatisitilike ʼo te taʼu 2008: “Neʼe Takitaki e Te Laumālie ʼo Te ʼAtua.” ʼI Te Minisitelio ʼo Te Puleʼaga ʼo ʼApelili ʼe tuʼu ai anai he ʼu tokoni ke kotou fai he ʼu fakatuʼutuʼu ke kotou kau ki te polokalama kātoa ʼo te fakatahi ʼaho tolu ʼaia. Kapau ʼe tonu ke kotou kole ki takotou pātolo hakotou ʼaho mālōlō ke kotou kau ki te ʼu ʼaho fuli ʼaia e tolu, ʼaua naʼa kotou fakatuatuaʼi ʼi tona fai.