Te ʼu Tonu

◼ Te tufa ʼo Fepualio: Te Kalavi ʼo Te Manuʼia Faka Famili peʼe ko Te Tohi ʼo Te ʼu Hisitolia Faka Tohi-Tapu. Malesio: Koteā ʼAē ʼe Akoʼi Moʼoni Mai ʼi Te Tohi-Tapu? Kotou faiga ke kotou kamata he ʼu ako Tohi-Tapu. ʼApelili Pea Mo Maio: Ko Te Tule Leʼo pea mo te Réveillez-vous ! Kā tou ʼaʼahi ia te hahaʼi ʼaē ʼe fia logo ʼo kau ki ai nātou ʼaē neʼe ʼomai ki te ʼAho Fakamanatu peʼe ki te tahi age fakatahi Fakateokalatike, kae ʼe mole natou ʼomai putuputu ki te kōkelekāsio, tou faiga tāfito ke tou foaki kiā nātou ia te tohi foʼou Koteā ʼAē ʼe Akoʼi Moʼoni Mai ʼi Te Tohi-Tapu? Ko te fakatuʼutuʼu ʼo te ʼu ʼaʼahi ʼaia ʼe ko te kamata ʼo he ako Tohi-Tapu mo nātou ʼaki te tohi ʼaia.

◼ Ko te sīkalaipe pea mo te taupau ki te gāue, ʼe nā vakaʼi anai te gāue ʼa te kau pioniē kātoa fuli. Kapau ʼe faigataʼa ki he tahi ke ina fai tona ʼu hola, pea ʼe fai anai e te kau tagata ʼāfea he ʼu fakatuʼutuʼu ke natou tokoni ki ai.

◼ Ko te akonaki makehe ʼaē kā fai ʼi te temi ʼo te ʼAho Fakamanatu ʼo te taʼu 2009, ko tona kupu tāfito “ ʼE Tali ʼĀteaina Pē Koa e Te ʼAtua Ia He Lotu e Tahi?” Vakaʼi te tonu ʼo Te Minisitelio ʼo Te Puleʼaga ʼo Sepetepeli 2008.