Te ʼu Tonu

◼ Te tufa ʼo ʼOketopeli: Te Tule Leʼo pea mo te Réveillez-vous ! Kapau ʼe fia logo he tahi, kotou fakahā age ia te kiʼi pepa lotu ʼE Kotou Fia ʼIloʼi Koa Te Moʼoni? ʼaki te fakatuʼutuʼu ʼaē ke kamata he ako Tohi-Tapu. Kapau kua ina maʼu ia te kiʼi pepa lotu ʼaia, kotou faiga ke kotou kamata ai he ako Tohi-Tapu. Novepeli: Koteā ʼAē ʼe Akoʼi Moʼoni Mai ʼi Te Tohi-Tapu? ʼE tou faiga tāfito anai ke tou kamata he ʼu ako Tohi-Tapu. Tesepeli: Te tufa ʼo te tohi Te tagata ʼaē ʼe lahi tokotahi ʼo te ʼu temi fuli peʼe ko te tohi Te Fakahā—Kua Ovi Mai Tona Ikuʼaga Lahi! Sānualio: Tufa ʼo te tohi Te ʼAtamai Mālama peʼe Koteā ʼAē ʼe Akoʼi Moʼoni Mai ʼi Te Tohi-Tapu?

◼ Ko te Polokalama ʼo Te Ako Fakateokalatike ʼo te taʼu, ʼe mole toe tufa fakatahi atu anai mo Te Minisitelio ʼo Te Puleʼaga. Kae ʼe foaki anai ki te kōkelekāsio fuli ia te polokalama ʼo te taʼu, pea ʼe fakapipiki anai he polokalama ʼi te panō ʼaē ʼe tuʼu ʼi muli ʼo te Fale ʼo Te Puleʼaga. ʼE taupau anai ia he tahi polokalama e te taupau ʼo te ako, ki tana fakaʼaogaʼi ʼaē ki tana ʼu faiakonaki. ʼE hoko atu pē anai te maʼu e te kau fai fakamafola ia tanatou ʼu polokalama ʼi tanatou Minisitelio ʼo Te Puleʼaga ʼi te māhina fuli, pea ʼe tuʼu ai anai te polokalama ʼo te Ako Tohi-Tapu ʼo Te Kōkelekāsio ʼi te vāhaʼa fuli, mo te Ako Fakateokalatike, pea mo te Fono Gāue.

◼ ʼO kamata atu ʼi te vāhaʼa ʼo te ʼaho 1 ʼo Malesio 2010, ʼe vakaʼi anai te tohi “Te Fakahā—Kua Ovi Mai Tona Ikuʼaga Lahi!” ʼi te Ako Tohi-Tapu ʼo Te Kōkelekāsio. ʼE toe hoko atu anai te polokalama ʼi te ʼu palakalafe ʼaē neʼe fakatuʼu ai e te kōkelekāsio ia te ako ʼo te tohi ʼaia, ʼo kamata atu ʼaki te kāpite 30. Ko te ʼu kōkelekāsio ʼaē ʼe ʼaoga kiai te ʼu tohi ʼaia, ʼe natou fakaʼui anai.