Te ʼu Tonu

◼ Te tufa ʼo ʼApelili Pea Mo Maio: Ko Te Tule Leʼo pea mo te Réveillez-vous ! ʼE tou faiga tāfito anai mokā tou ʼaʼahi te hahaʼi ʼaē ʼe fia logo pea neʼe kau ki te ʼAho Fakamanatu peʼe ki te akonaki makehe maʼa te hahaʼi fuapē kae ʼe mole natou ʼomai putuputu ki te kōkelekāsio, ke tou tuku age kiā nātou ʼaia ia te tohi foʼou Koteā ʼAē ʼe Akoʼi Moʼoni Mai ʼi Te Tohi-Tapu? Ko te fakatuʼutuʼu ʼo te ʼu ʼaʼahi ʼaia, ke kamata he ako Tohi-Tapu mo nātou ʼaē mole heʼeki fai hanatou ako. Sūnio: Te tohi Te ʼAtamai Mālama. Kapau ʼe mole kei maʼu te tohi ʼaia e te ʼu kōkelekāsio, ʼe feala ke tufa ia te tohi Te Ako Mai Te Tohi-Tapu peʼe ko te kaupepa lahi Kotou Nonofo ʼAlaʼala! Sūlio: Te kaupepa lahi Kotou Nonofo ʼAlaʼala!, peʼe ko he kaupepa ʼi te ʼu kaupepa lalahi ʼaenī ʼe kei maʼu: ʼE Tokaga Moʼoni Koa Te ʼAtua Kia Tatou?, Fiafia Kite Mauli Heegata Ite Kele!, Kote puleaga ae ka ina fakatuu anai te Palatiso, Koteā ʼAē ʼe Hoko Kia Tatou Mokā Tou Mamate?, Mokā Mate He Tahi ʼe Tou ʼOfa Mamahi Ai, Te ʼu laumalie ʼo te kau mate—ʼE feala koa hanatou tokoniʼi koutou peʼe nātou fakahalaʼi koutou? ʼE natou maʼuʼuli moʼoni koa?, peʼe ʼE Koutou Lava Kaumeʼa Mo Te ʼAtua!

◼ Lolotoga te ʼu vāhaʼa ʼo te fakatahi fakatisitilike, mo te fakatahi fakasilikō, pea mo te fakatahi makehe ʼaho tahi, ʼe mole fai anai e te kōkelekāsio ia te Ako Tohi-Tapu ʼo Te Kōkelekāsio, mo te Ako Fakateokalatike, pea mo te Fono Gāue. ʼUhi ko te ʼaluʼaga ʼaenī, ʼe fakalotomālohiʼi tātou fuli ke tou tahi vakaʼi te ʼu ʼalatike ʼo te ʼu fono ʼaia e tolu, ohagē lā ʼi te afiafi ʼaē ʼe fai ai te Tauhi Fakafāmili.

◼ Ko te akonaki makehe ʼaē kā fai ʼi te temi ʼo te ʼAho Fakamanatu ʼo Te Mate ʼa Sesu, ʼi te taʼu 2010 ʼe ko tona kupu tāfito ʼaenī: “Ko ʼĀfea ʼAē Kā Fakatuʼu Ai Ia Te Tokalelei Pea Mo Te Fīmālie Moʼoni?”