Te ʼu Tonu

◼ Te tufa ʼo Fepualio: ʼE feala ke tufa e te kau fai fakamafola te tohi Te Kalavi ʼo Te Manuʼia Faka Fāmili. Malesio: Koteā ʼAē ʼe Akoʼi Moʼoni Mai ʼi Te Tohi-Tapu? ʼE tou faiga tāfito anai ke tou kamata he ʼu ako Tohi-Tapu. ʼApelili pea mo Maio: Ko Te Tule Leʼo pea mo te Réveillez-vous ! ʼI tatatou ʼaʼahi te hahaʼi ʼaē ʼe fia logo, pea mo nātou ʼaē neʼe kau ki te ʼAho Fakamanatu peʼe ki te tahi ʼu fono Fakateokalatike kae ʼe mole natou ʼomai putuputu ki te kōkelekāsio, ʼe tou faiga anai ke tou kamata he ʼu ako Tohi-Tapu ʼaki te tohi Koteā ʼAē ʼe Akoʼi Moʼoni Mai ʼi Te Tohi-Tapu?

◼ Ko te akonaki makehe ʼaē kā fai anai ʼi te temi ʼo te ʼAho Fakamanatu ʼi te taʼu 2011, ʼe ko tona kupu tāfito ʼaenī: “ ʼE Lava Tokoni Mai Koa Te ʼu Pelesepeto Fakatohi-tapu Ke Tou Tauʼi Te ʼu Fihifihia Iā ʼAho Nei?”

◼ ʼE mole fai he ʼu fono ʼi te ʼAhotapu, ʼaho 17 ʼo ʼApelili 2011, te ʼaho ʼaē kā fai ai te Fakamanatu, gata pē ki te ʼu fono fai fakamafola. Kapau ʼe fai māhani hakotou fono ʼi te ʼaho ʼaia, ʼe fai anai he ʼu puleʼaki ke fetogi te ʼaho fono, ke fai ʼi he tahi ʼaho ʼo te vāhaʼa. Kapau ʼe lahi te ʼu kōkelekāsio ʼe natou fakaʼaogaʼi ia te Fale ʼo Te Puleʼaga, ʼo mole feala ai ke fetogi te ʼaho fono, pea ʼe mole fai anai ia te fono. ʼI te ʼu ʼaluʼaga leva ʼaia, ʼe fakalotomālohiʼi te ʼu fāmili ke natou vakaʼi te ʼalatike ʼaē kā fai ʼi te Ako ʼo Te Tule Leʼo ʼi tanatou Tauhi Fakafāmili ʼaē ʼe fai ʼi te afiafi.