Kua Tokalelei Koa Takotou Fānau?
1. He koʼē ʼe ʼaoga ke teuteuʼi ia tatatou fānau ʼaē ʼe kei ako ʼi te faʼahi fakalaumālie ke natou tokalelei ki te ʼu meʼa ʼaē ʼe feala ke hoko kiā nātou?
1 ʼE mahino ia ʼe felāveʼi ia takotou fānau mo te ʼu fihifihia pea mo te ʼu fakaneke. Kae ʼe ko he ʼu faigamālie ʼaia ke natou “fakamoʼoni ki te moʼoni.” (Soa. 18:37) Kua natou tokalelei koa kiai?
2. Ke tokalelei takotou fānau ʼi te faʼahi fakalaumālie ki te ʼu meʼa ʼaē ʼe lava hoko kiā nātou, koteā ʼaē ʼe tonu ke natou mahino kiai?
2 ʼE ʼiloʼi koa e takotou fānau ia te fakaʼuhiga ʼaē ʼo te kau ki te ʼu toʼotoʼoga fakapuleʼaga, ki te ʼu toʼotoʼoga fakapagani pea he koʼē ʼe kovi tanatou kau ʼaē kiai? Kua natou tokalelei koa ʼi te faʼahi fakalaumālie ke natou ʼiloʼi te faʼahiga tauʼi ʼo te ʼu fihifihia ʼaē kā tau anai mo nātou ʼi te ʼu faleako lalahi, ʼi te ʼu fakafiafia, pea mokā fakahalaʼi nātou ke natou ʼahiʼahiʼi te kava peʼe ko te toloke? ʼI te ʼu lakaga ʼaia, ʼe natou ʼui age anai pē koa, ʼe mole natou tali te ʼu faʼahi ʼaia heʼe ko he ʼu aga ia ʼe tapuʼi ʼi tanatou lotu, peʼe feala anai hanatou fakamahinohino age te ʼu pelesepeto ʼo te ʼu akonaki ʼaē ʼe natou tui kiai?—1 Pet. 3:15.
3. Koteā ʼaē ʼe feala ke fai e te ʼu matuʼa ʼi te ʼu afiafi ʼo te Tauhi Fakafāmili moʼo teuteuʼi tanatou fānau ke natou tokalelei ʼi te faʼahi fakalaumālie ki te ʼu meʼa ʼaē ʼe lava hoko kiā nātou?
3 Kotou Fai Palalau Mo Takotou Fānau ʼi Te Afiafi ʼAē ʼe Fai Ai Ia Takotou Tauhi Fakafāmili: ʼE mahino ia, ʼe kotou palalau anai mo takotou ʼu fānau ki te ʼu fihifihia ʼaē ʼe felāveʼi mo nātou lolotoga te temi ʼaē ʼe natou ako ai. Kae kapau ʼe kotou tokaga tuʼumaʼu ʼo palalau mo nātou ki te ʼu fihifihia ʼaē ʼe feala ke hoko kiā nātou ʼi te faleako, pea ʼe lotomālohi anai takotou fānau ki tana lava tauʼi ʼaē ia te ʼu fihifihi ʼaia. ʼE lagi lelei ke kotou palalau ki te ʼu faʼahi ʼaia ʼi te afiafi ʼaē ʼe kotou fai ai takotou Tauhi Fakafāmili. Kotou fehuʼi age ki takotou fānau peʼe koteā ʼaē ʼe natou tuʼaniaʼi tāfito mokā natou ʼolo ki te faleako. ʼE feala hakotou toe vakaʼi mo nātou he ʼu ʼaluʼaga neʼe kua kotou talanoa pē kiai ʼi te ʼu taʼu ʼaē kua hili atu, heʼe ʼi te temi nei kua natou lalahi pea kua lahi age mo tanatou mahino ki te ʼu fihifihia. (Pes. 119:95) ʼE lagi lelei ke kotou fai he ʼu kiʼi faʼifaʼitaki, ʼe kotou gaoʼi te tagata faiako, peʼe ko he tahi ʼe faitokoni ʼi te faleako, peʼe ko honatou kaumeʼa. Kotou akoʼi age ki takotou fānau peʼe feafeaʼi hanatou tali ʼaki te Tohi-tapu, pea mo natou fakaʼaogaʼi te tohi Comment raisonner pea mo te ʼu tohi ʼaē e lua Les jeunes sʼinterrogent. Ko te faʼē neʼe ina fai te ʼu faʼifaʼitaki, pea ʼi te ʼu temi ʼaia neʼe ina akoʼi age ki tana fānau peʼe feafeaʼi hanatou felōgoi mo tonatou ʼu faiako foʼou ʼi te ʼu hū ako pea ke natou fakahā ko nātou ko te ʼu Fakamoʼoni ʼa Sehova.
4. Koteā ʼaē kā fai anai e te ʼu mātuʼa ʼaē ʼe aga fakapotopoto?
4 Kua ʼāʼāsili kovi age te ʼu fihifihia ʼaē ʼe felāveʼi mo te kau tūpulaga ʼi te ʼu ʼaho fakamuli pea mo “faigataʼa” ʼaenī. (2 Tim. 3:1) Ko te ʼu mātuʼa ʼaē ʼe aga fakapotopoto, ʼe natou fakakaukauʼi fakatomuʼa anai te ʼu fihifihia ʼaē ʼe lava hoko ki tanatou ʼu fānau pea mo natou teuteuʼi ai leva ia tanatou ʼu fānau ʼi te faʼahi fakalaumālie ke natou tekeʼi te ʼu fihifihia ʼaia. (Taag. 22:3) ʼI te taʼu ako ʼaenī, ʼe feala kiā koutou fuli ʼu mātuʼa ke kotou tokoni ki takotou fānau ke natou tokalelei ki te ʼu faʼahi fuli ʼaia.