Te ʼu Tonu

◼ Te tufa ʼo Sepetepeli: Te tohi Koteā ʼAē ʼe Akoʼi Moʼoni Mai ʼi Te Tohi-Tapu? ʼE tou faiga tāfito anai ke tou kamata he ʼu ako Tohi-Tapu ʼi te temi pē ʼaē ʼe tou foaki age ki te hahaʼi ia te tohi. Kapau kua maʼu te tohi e te loto fale peʼe mole fia fai ki he ako Tohi-Tapu, ʼe feala pē ke tuku age e te kau fai fakamafola ia he nusipepa ʼāfea peʼe ko he kaupepa lahi ʼe fia fai kiai. ʼOketopeli: Te Tule Leʼo pea mo te Réveillez-vous ! Kapau ʼe fia logo he tahi, kotou fakahā age ia te kiʼi pepa lotu ʼE Kotou Fia ʼIloʼi Koa Te Moʼoni? ʼaki te fakatuʼutuʼu ʼaē ke kamata he ako Tohi-Tapu. Novepeli: Ko he kaupepa pē ʼi te ʼu kaupepa lalahi ʼaē ʼe pāsina 32 ʼaē ʼe fia lau e te hahaʼi ʼo te telituale: ʼE Tokaga Moʼoni Koa Te ʼAtua Kia Tatou?, Kotou Nonofo ʼAlaʼala!, Kote puleaga ae ka ina fakatuu anai te Palatiso, Mokā Mate He Tahi ʼe Tou ʼOfa Mamahi Ai, Te ʼu laumālie ʼo te kau mate—ʼE feala koa hanatou tokoniʼi koutou peʼe nātou fakahalaʼi koutou? ʼE nātou maʼuʼuli moʼoni koa? Tesepeli: Te tohi Te tagata ʼaē ʼe lahi tokotahi ʼo te ʼu temi fuli. Kapau ʼe ʼi ai he fānau ʼi te loto fale, pea kotou tufa te tohi Te Tohi ʼo Te ʼu Hisitolia Faka Tohi-Tapu.

◼ Ko te akonaki makehe ʼaē kā fai ʼi te temi ʼo te ʼAho Fakamanatu ʼo te taʼu 2012, ʼe fai anai ʼi te vāhaʼa ʼo te ʼaho 2 ʼo ʼApelili 2012. ʼE hoki tala atu anai ia te kupu tāfito ʼo te akonaki ʼaia. ʼE mole he kōkelekāsio ʼe ina fai anai ia te akonaki makehe ʼi muʼa ʼo te ʼAho Fakamanatu.

◼ Ko natou ʼaē kā pioniē vaeluaʼi temi anai ʼi te māhina ʼo Malesio 2012, ʼe feala anai hanatou filifili ke natou fai hola e 30 peʼe 50. Tahi ʼaē meʼa, kapau ʼe ʼaʼahi e te taupau fakasilikō takotou kōkelekāsio ʼi Malesio, ko te kau pioniē vaeluaʼi temi, hola 30 peʼe hola 50, ʼe fakaafe nātou fuli ke natou kau ki te fono kātoa ʼa te kau pioniē kātoa.

◼ ʼO kamata atu ʼi Sepetepeli, ʼe fai anai e te ʼu taupau fakasilikō ia te akonaki ki te hahaʼi fuapē, ko tona kupu tāfito: “Tou Fakatahi Mo Te Hahaʼi Fiafia ʼa Te ʼAtua.”