Tou Haga Kātaki ʼi Tatatou Faʼafai
1 Ko te faʼafai ʼaē neʼe maʼu e Apolose ʼo ʼuhiga mo tana minisitelio, ʼe ina fakamanatuʼi mai te faʼafai ʼo totatou tehina mo tuagaʼane ʼi te fai fakamafola ʼi te temi nei. (Gaue 18:24-28) Kae ʼe fai mai kiā tātou fuli ia te fakalotomālohi ʼaenī: “Ke kotou faafai, kae aua naa kotou pipiko. Ke kotou loto mafana.” (Loma 12:11) Koteā ʼaē ʼe lava tokoni mai ke tou maʼu ia te faʼafai ʼaia ʼi te minisitelio Fakakilisitiano?
2 ʼAki Te ʼAtamai Mālama ʼe Mālohi Ai Tatatou Faʼafai: ʼI te ʼosi hā ʼa Sesu ki tana ʼu tisipulo e toko lua, neʼe ina “fakamahino kia naua i te Tohi tapu katoa te u mea o uhiga mo ia,” neʼe nā ʼui fēnei: “Pe nee mole vevela ota loto, i tana palalau mai kia taua i te ala?” (Luka 24:27, 32) ʼE lagi toe fēia koa lā mo ʼotatou loto mokā fakahaʼuhaʼu tatatou mahino lelei ki te Folafola ʼa te ʼAtua? ʼE mahino ia, ko te tui ʼe fafaga ʼaki ia te ʼatamai mālama. ʼE ʼui fēnei iā Loma 10:17: “E hau ai te tui mai te mea e logo ki ai.” Kā fonu totatou loto ʼi te falala ki te ʼu fakapapau ʼa Sehova, pea ʼe tou fia palalau tuʼumaʼu anai ki te ʼu meʼa ʼaē neʼe tou logo kiai!—Pes. 145:7; Gaue 4:20.
3 Kapau ʼe tou loto ke mālohi totatou ʼofa ʼaē ki te ʼAtua pea mo tou faʼafai ʼi te tauhi ʼaē kiā te ia, pea ʼe mole tonu ke gata ʼaki pē tatatou mahino ʼaē neʼe tou maʼu ʼi tatatou kamata ako ia te Tohi-Tapu. ʼE toe ʼaoga foki ke tou toe tuputupu ʼi tatatou mahino ki te moʼoni pea ke lahi age totatou ʼofa ʼaē kiā Sehova. Heʼe kapau ʼe mole tou fai ia te faʼahi ʼaia, pea ʼe feala anai, ʼaki te temi, ke mole kei fakamālotoloto tatatou tauhi ʼaē kiā te ia. (Apk. 2:4) ʼE fakalotomālohiʼi tātou e te Folafola ʼa te ʼAtua ke tou haga tuputupu ʼi te ʼatamai mālama totonu ʼa te ʼAtua.—Kol. 1:9, 10.
4 Tatatou ʼu Agamāhani ʼo ʼUhiga Mo Tatatou Ako Ia Te Tohi-Tapu: ʼE tonu ke tou vakavakaʼi peʼe feafeaʼi tatatou ʼu agamāhani ʼo ʼuhiga mo tatatou ako ia te Folafola. ʼE lagi tou popoto ʼi te maʼu ʼo te ʼu tali ʼi Te Tule Leʼo pea mo fai ia he ʼu tali ʼe totonu. Kae ʼe tou kumi koa te ʼu vaega Fakatohi-tapu ʼaē ʼe tuʼu ʼi te ʼalatike, pea mo fakakaukauʼi peʼe feafeaʼi honatou fakaʼaogaʼi ʼi totatou maʼuli? ʼAki tatatou lau ia te Tohi-Tapu ʼi te vāhaʼa fuli, ʼe tou faiga koa ke tou fai he tahi ʼu kumi mo kapau ʼe tou fealagia pea mo tou metitāsioʼi te ʼu ako ʼaē ʼe tou lava tāʼofi mai te ʼu hisitolia ʼaē ʼe tou lau? (Pes. 77:11, 12; Taag. 2:1-5) ʼE ko he meʼa lelei hatatou metitāsioʼi pea mo lau tuʼumaʼu ia te Folafola ʼa te ʼAtua! (1 Tim. 4:15, 16) Kapau ʼe fēia tatatou ako ia te Tohi-Tapu, ʼe tou lotomālohi anai pea mo uga ai tātou ke tou “faafai i te u gaue lelei.”—Tito 2:14.