Fai He ʼu Ako Tohi-Tapu ʼe Lelei
1. Kotea ia te maʼua ʼae ʼe maʼu e te kau faifakamafola moka natou fai he ako?
1 ʼE mole feala ki he tahi ke tauhi ki te ʼAtua kaʼe neʼe mole “taki mai ia ia “ e Sehova. (Soa. 6:44) Koia ʼe tonu foki ki te kau faifakamafola ʼae ʼe natou fai he ʼu ako Tohi-Tapu ke natou tokoni ki te hahaʼi ke natou fakaovi ki tatatou Tamai ʼae ʼe ʼi selo. (Skp 4:8) Koia, ʼe tonu ai ke tou teuteuʼi te ʼu ako Tohi-Tapu. ʼE mole gata pe ki te lau ʼo te ʼu palakalafe takitahi pea mo te fai ʼo te fehuʼi moʼo tokoni ki te ʼu ako ke natou mahino ki te logo pea ke natou tuputupu ai.
2. ʼE fua lelei feafeaʼi anai ia te fai ʼo he ako Tohi-Tapu ʼe lelei?
2 Ke fai he ʼu ako Tohi-Tapu ʼe lelei, ʼe tonu ki te kau faifakamafola ke natou tokoni ki ʼanatou kau ako ke natou (1) mahino pe ʼe kotea ʼae ʼe akoʼi mai ʼi te Tohi-Tapu, (2) tali te ʼu tokoni ʼae ʼe tuʼu ʼi te Tohi-Tapu pea (3) maʼuliʼi te ʼu tokoni ʼae ʼe foaki mai ʼi te Tohi-Tapu. (Soa. 3:16; 17:3; Sakp. 2:26) ʼE lagi feala ke lauʼi mahina te tokoni ki he tahi ke mulimuli ki te ʼu puani ʼaia. Kaʼe ʼaki te ʼu puani takitahi ʼaia, ʼe feala anai ke tuputupu ai ʼana felogoʼi ʼae mo Sehova pea mo foaki ia tona maʼuli kia te ia.
3. He koʼe ʼe tonu ke tou fai he ʼu fehuʼi ke tou iloʼi ai tana manatu?
3 Kotea Te Manatu ʼa He Tahi ʼe Ina Ako Te Tohi-Tapu?: Ke tou iloʼi pe ʼe mahino ia ia ʼae ʼe tou ako pea mo ina tali ia te ʼu faʼahi fuli ʼae ʼe ina ako, ʼe tou faiga anai ke ʼaua naʼa lahi fau tatatou palalau pea ʼe tou fakalotomalohiʼi ia ia ke ina fakaha ia tana manatu. (Sakp. 1:19) ʼE mahino koa ki te manatu ʼae ʼe ui ʼi te Tohi-Tapu ʼo ʼuhiga mo te faʼahi ʼae ʼe ina ako? ʼE feala koa ke ina fakamahino ʼaki ʼana palalau ʼa ia totonu? Kotea ʼe ina logoʼi ʼo ʼuhiga mo te faʼahi ʼae ʼe ina ako? ʼE tui koa ʼe fakapotopoto ia te ʼu faʼahi ʼae ʼe akoʼi mai ʼi te Tohi-Tapu? (1 Tes. 2:13) ʼE mahino koa ʼe feala ke ina fai he ʼu fetogi ʼi tona maʼuli ʼaki te ʼu faʼahi ʼae ʼe ina ako? (Kol. 3:10) ʼI muʼa ʼo hatatou maʼu he ʼu tali ki te ʼu fehuʼi ʼaia, ʼe tonu ke tou fai he ʼu fehuʼi ʼe tou iloʼi ai tana manatu pea ʼosi leva, tou fagono lelei ki ai.—Mat. 16:13-16.
4. Kotea ʼae ʼe tonu ke tou fai mo kapau ʼe faigataʼa kia ia ʼae ʼe ako hana mahino peʼe maʼuliʼi he tokoni mai te Tohi-Tapu?
4 ʼE malohi ʼaupito ia te ʼu agamahani pea mo te faʼahiga manatu ʼo te malama ʼaeni. Koia ʼe ʼaoga ai he temi moʼo liakī te ʼu faʼahi ʼaia. (2 Ko. 10:5) ʼE feafeaʼi mo kapau ʼe mole tali e ia ʼae ʼe ako peʼe mole ina maʼuliʼi ia te ʼu faʼahi ʼae ʼe ina ako? ʼE ʼaoga ia te faʼa kataki moʼo tuku he temi feʼauga ke feala ki te Folafola ʼa te ʼAtua pea mo te laumalie maʼoniʼoni ke gaue ʼi te loto ʼo ia ʼae ʼe ako. (1 Ko. 3:6, 7; Hep. 4:12) ʼAua naʼa tou fakakinauʼi, kaʼe ʼe lelei age tatatou palalau ki he tahi age faʼahi mo kapau ʼe faigataʼa kia ia ʼae ʼe ako hana mahino peʼe maʼuliʼi he tokoni mai te Tohi-Tapu. ʼI tatatou haga ako mo ia te Tohi-Tapu ʼaki te faʼa kataki mo te ʼofa, ʼe feala pe ʼaki te temi ke ina fai he ʼu fetogi ʼe ʼaoga.