Te ʼu Fehuʼi ʼa Te Kau Lautohi

He koʼe ʼe tonu ki te kau Kilisitiano ke tokakaga moka natou fakaʼaogaʼi te ʼu meʼa fakafelogoi ʼi te Neti?

Ko ʼihi kau Kilisitiano ʼe natou fakaʼaogaʼi te ʼu meʼa fakafelogoi ʼi te Neti moʼo faipalalau mo ʼonatou famili, pea mo ʼihi atu kau Fakamoʼoni. ʼE mahino ia, ko he Kilisitiano kua fotufotuʼa ʼi te faʼahi fakalaumalie ʼe mulimuli anai ki te tokoni ʼaeni: “Ko te tagata ae e poto e sio ki te kovi pea e nono, kae ko natou ae e hala atamai e fakaovi ki ai pea e natou tauteai.”—Taag. 27:12.

ʼE tou iloʼi ʼe fia puipui tatou e Sehova. Koia ʼae ʼe mole tou fakatahi ai mo natou ʼae ʼe fakatupu maveuveu, mo natou ʼae neʼe fakamavae ʼi te kokelekasio, pea mo natou ʼae ʼe natou fakamafola ni loi. (Loma 16:17; 1 Ko. 5:11; 2 Soa. 10, 11) Maʼia pe la ʼi te kokelekasio, ʼe mole natou tuku fuli he faʼifaʼitaki ʼe lelei. (2 Tim. 2:20, 21) Koia ʼae ʼe tonu ai ke tou filifili ʼotatou kaumeʼa. Kae ʼe mole faigafua te faʼahi ʼaia moka tou fakaʼaogaʼi te meʼa fakafelogoi ʼi te Neti.

ʼE maʼuhiga ke tou tokakaga moka tou felogoi mo he kutuga kaugamalie ʼi te Neti. Ko ʼihi kau Kilisitiano neʼe natou kau ki te ʼu kutuga ʼaia, pea neʼe natou fakahemala leva. Kapau la ʼe tou felogoi mo he toko teau peʼe ko he toko afe, ʼe mole feala anai hatatou iloʼi ia natou fuli, pe ʼe natou malolohi ʼi te faʼahi fakalaumalie. ʼE ui fenei ia Pesalemo 26:4: “E mole au lala fakatahi mo te kau faikaka, pea e mole au alu fakatahi mo te kau malualoi.” Koia ʼae ʼe lelei age ke tou felogoi pe mo natou ʼae ʼe tou iloʼi lelei.

Tatau aipe pe ʼe tokosiʼi te kutuga ʼae ʼe tou kau ki ai, ʼe tonu ke tou tokakaga ki te temi ʼae ʼe tou fakaʼaogaʼi ki ai, pea mo te ʼu meʼa ʼae ʼe tou palalau ki ai. ʼE mole ko he maʼua leva ke tou tali ki te ʼu faipalalau fuli ʼaia. Neʼe kua fakaha e Paulo kia Timoteo ʼe ʼi ai anai ʼihi ʼe natou ‘faifatufatu pea mo fia iloʼi meʼa fuli.’ (1 Tim. 5:13) Ia ʼaho nei, ʼe ʼi ai ʼihi kau Kilisitiano ʼe natou felogoi feia ʼi te Neti.

Ko he Kilisitiano kua fotufotuʼa ʼe mole ina fakamafola anai ni faifatufatu, peʼe ko he ʼu meʼa ʼe mole tonu ke palalauʼi ʼo ʼuhiga mo te ʼu tehina mo tuagaʼane, pea ʼe mole ina fia lau pe la te ʼu meʼa ʼaia. (Pes. 15:3; Taag. 20:19) ʼE mole ina fakalogo peʼe mole ina momoli anai he ʼu foʼi hisitolia, peʼe ko he ʼu logo ʼe mole iloʼi pe ʼe moʼoni. (Efe. 4:25) ʼE lahi te meʼa kai fakalaumalie ʼe tou maʼu ʼi totatou tuʼasila ʼi te Neti, pea ʼi te Televisio JW ʼe moʼoni fuli.

Ko ʼihi Fakamoʼoni ʼa Sehova ʼe natou fakaʼaogaʼi te ʼu meʼa fakafelogoi ʼi te Neti moʼo fakatau, peʼe totogi, peʼe fakahaha he ʼu koloa, peʼe ke foaki ai he ʼu gaue. Kae ko te ʼu faikoloa ʼaia ʼe mole ʼi ai honatou pikipikiga mo tatatou tauhi. Ko te Kilisitiano ʼae ʼe mole “manako ki te paʼaga” ʼe mole ina fakaʼaogaʼi anai te ʼu tehina mo tuagaʼane ke maʼu koloa ai.—Hep. 13:5.

ʼE lelei koa hatatou fakaʼaogaʼi te ʼu meʼa fakafelogoi ʼi te Neti ke tanaki he falā moʼo tokoni ki te ʼu tehina mo tuagaʼane ʼae ʼe faigataʼaʼia, peʼe moka hoko he tuʼutamaki fakanatula? ʼE moʼoni, ʼe tou fakaha totatou ʼofa ʼae ki ʼotatou tehina mo tuagaʼane ʼi tatatou fetokoniʼaki pea mo fefakalotomalohiʼaki. (Sakp. 2:15, 16) Kae kapau ʼe tou fakaʼaogaʼi te ʼu meʼa fakafelogoi ʼi te Neti moʼo kole he ʼu meʼa ʼofa, ʼe feala ke faigataʼa ki te filiale mo te kokelekasio hanatou fakatuʼutuʼu he ʼu tokoni. (1 Tim. 5:3, 4, 9, 10, 16) Pea ʼe mole ui anai e he tahi neʼe hinoʼi tatou ke tou tokakaga ki ʼotatou tehina mo tuagaʼane.

ʼE tou loto fuli ke fakakololiaʼi ia Sehova ʼi te ʼu meʼa ʼae ʼe tou fai. (1 Ko. 10:31) Koia tou nonofo tokakaga pe moka tou fakaʼaogaʼi he ʼu meʼa fakafelogoi ʼi te Neti, pea mo ʼihi atu meʼa feia.