Neʼe Maʼu e Hulda Te Meʼa Neʼe Loto Ki Ai

ʼI TE kiʼi motu ʼae ko Sangir, ʼi Indonésie, ʼi ni taʼu ki muʼa atu, neʼe maʼuʼuli ai ʼotatou tuagaʼane ʼe toko tolu. ʼI ni taʼu ki muʼa atu, neʼe natou gaue fakatahi ʼi te matatai. ʼE iloʼi e te hahaʼi ʼotatou tuagaʼane ʼuhi ko tanatou faifakamafola, ʼo natou tokoni ki te hahaʼi ke natou mahino ki te Tohi-Tapu. Kae ʼi te temi ʼaia, neʼe natou fai mo te tahi gaue.

Neʼe olo te ʼu fafine ʼaia ʼo tae te ʼu foʼi maka ʼi te matatai, neʼe fua lalahi ohage ko te ʼu foʼi fiti aka fitipolo. Hili ʼaia, neʼe natou heheka ʼo foa liki te ʼu foʼi maka ʼaia ʼaki he hamale. ʼOsi ʼaia, neʼe natou fafaʼo ki te ʼu pakete. Pea neʼe natou kake ʼi he ʼu mata tuʼuga mo te ʼu pakete ʼaia ki te koga meʼa ʼae neʼe natou nonofo ai. Neʼe natou fakafonu maka leva te ʼu kato lalahi, ʼo fafaʼo ki te taumuli ʼo he kamio. Neʼe fakaʼaogaʼi te ʼu maka ʼaia moʼo fai ʼo te ʼu ala.

ʼE higoa te tahi tuagaʼane ko Hulda. Neʼe feala ke lahi age te temi gaue ʼo Hulda ʼi te ʼu tuagaʼane ʼae ʼe lua. Neʼe ina fakaʼaogaʼi mahani te falā ʼae neʼe ina maʼu mai te gaue ʼaia moʼo totogi te ʼu meʼa ʼae neʼe ʼaoga ki tona kiʼi famili. Neʼe ina loto leva ke ina tanaki he foʼi falā moʼo totogi ʼaki he tahi age meʼa. Neʼe loto ia Hulda ki hana kiʼi masini toʼotoʼo, ke feala hana maʼu ia te JW Library^®. Neʼe iloʼi e te tuagaʼane ʼe maʼu ai te ʼu ʼata viteo mo te tahi ʼu meʼa ʼe tokoni ki tana faifakamafola, mo tana ako pea mo tana mahino ki te Tohi-Tapu.

Lolotoga te mahina katoa mo te vaelua, neʼe gaue ia Hulda hola ʼe lua ʼi te uhu fuli, pea neʼe ina fakafonu maka ai te taumuli ʼo te kiʼi kamio. Pea neʼe feʼauga ai leva tana falā moʼo totogi ʼaki hana kiʼi masini toʼotoʼo.

Neʼe ui fenei e Hulda: “Logo la neʼe au gaʼegaʼe pea mo mamahi te ʼu koga ʼo toku sino ʼi taku foa liki te ʼu maka, kae neʼe puli te mamahi fuli ʼaia ʼi te temi ʼae neʼe au lava fakaʼaogaʼi ai taku kiʼi masini toʼotoʼo ke lelei age taku faifakamafola pea neʼe faigafua age taku teuteuʼi ʼaku fono.” Neʼe ina toe ui neʼe ʼaoga te kiʼi masini toʼotoʼo ʼi te temi ʼae neʼe to ai te taʼi mahaki. ʼI te temi ʼaia, neʼe fai te ʼu fono pea mo te faifakamafola ʼi te Neti. ʼE tou fakafiafia mo Hulda ʼi tana lava maʼu te meʼa ʼae neʼe loto ki ai.