Ko Te Fakaliliu ʼo Te Folafola ʼa Te ʼAtua ʼe Maʼuli
“Ko te folafola a te Atua e mauli.”—HEPELEO 4:12.
1. (1) Kotea te gaue ʼae neʼe tuku age e te ʼAtua kia Atama? (2) Talu mai ai, neʼe fakaʼaogaʼi feafeaʼi e te hahaʼi ʼa te ʼAtua te fealagia ʼae ke natou palalau ʼi he lea?
KO SEHOVA ʼATUA neʼe ina foaki te meʼa ʼofa ki te tagata, te fealagia ʼae ke palalau ʼi he lea. ʼI te ʼoloto ʼo Eteni, neʼe tuku age e te ʼAtua kia Atama te gaue ʼae ke ina fakahigoaʼi te ʼu manu fuli. Neʼe foaki ai e Atama te higoa ki te ʼu manu takitahi. (Senesi 2:19, 20) Talu mai ai mo te fakaʼaogaʼi e te hahaʼi ʼa te ʼAtua te meʼa ʼofa ʼae ko te palalau, ke natou fakavikiviki kia Sehova mo fakaha ki te hahaʼi pe ko ai ia ia. ʼE mole faʼa fualoa, neʼe fakaʼaogaʼi e te hahaʼi ʼa te ʼAtua te meʼa ʼofa ʼaia ke natou fakaliliu te Tohi-Tapu ke iloʼi e te tokolahi ia Sehova.
2. (1) Kotea te ʼu fakatuʼutuʼu ʼe tolu neʼe muliʼi e te Komite Fakaliliu ʼo Te Tohi-Tapu Traduction du monde nouveau ʼi tanatou gaue? (2) Kotea ka tou vakaʼi anai ʼi te alatike ʼaeni?
2 Ko te ʼu lauʼi miliale fakaliliu ʼo te Tohi-Tapu ʼe feala ke tou maʼu, kaʼe ʼe lahi te ʼu fakaliliu ʼe totonu age ʼi ʼihi. Koia ke totonu te fakaliliu ʼo te Tohi-Tapu, neʼe toʼo e te Komite Fakaliliu ʼo Te Tohi-Tapu Traduction du monde nouveau, te tonu ʼae ke natou muliʼi ki te ʼu fakatuʼutuʼu tafitō ʼaeni ʼe tolu: (1) Ke fakaʼapaʼapaʼi te huafa ʼo te ʼAtua mo fakaʼaogaʼi ʼi tana Folafola ohage pe ko te ʼu ʼuluaki tohi ʼafeā ʼo te Tohi-Tapu. (Lau ia Mateo 6:9.) (2) Ke fakaliliu te ʼu ʼuluaki kupu totonu ʼo te logo ʼo te Tohi-Tapu mo kapau ʼe feala. Pea kapau ʼe faigataʼa, ke fakaliliu te fakaʼuhiga totonu ʼo te manatu. (3) Ke fakaʼaogaʼi te lea ʼae ʼe faigafua tona lau mo mahino.a (Vakaʼi te kiʼi nota.) (Lau ia Neemia 8:8, 12.) Ko te ʼu fakatuʼutuʼu ʼaia ʼe tolu, neʼe fakatafito ki ai te fakaliliu ʼo te Tohi-Tapu Traduction du monde nouveau ia lea ʼe 130 tupu. ʼI te alatike ʼaeni, ʼe tou vakaʼi anai pe neʼe toe mulimuli feafeaʼi te fakaliliu ʼo te Tohi-Tapu Traduction du monde nouveau ʼo te taʼu 2013 ʼae neʼe toe vakaʼi ki te ʼu fakatuʼutuʼu ʼaia ʼe tolu. ʼE tou toe vakaʼi anai mo tona fakaliliu ki ʼihi atu lea.
KO HE TOHI-TAPU ʼE FAKAMAʼUHIGAʼI AI TE HUAFA ʼO TE ʼATUA
3, 4. (1) ʼE feala ke tou maʼu ʼifea te Tetalakalame? (2) Kotea ʼae neʼe fai e te tokolahi ʼo te kau faifakaliliu Tohi-Tapu ki te huafa ʼo te ʼAtua?
3 Neʼe tohi te huafa ʼo te ʼAtua ʼaki te ʼu mataʼi tohi Fakahepeleo ʼe fa ʼe higoa ko te Tetalakalame. ʼE feala tatatou maʼu te Tetalakalame ʼi te ʼu tohi ʼafeā Fakahepeleo ʼo te Tohi-Tapu, ohage la ko te ʼu Takaiga Tohi ʼo Te Tai Mate. ʼE feala ke tou toe maʼu ʼi te ʼu hiki ʼo te Septante Fakakeleka. Neʼe fai te ʼu hiki ʼaia ia taʼu ʼe 200 ʼi muʼa ʼo te temi ʼo Kilisito ʼo kaku kia taʼu ʼe 100 hili te temi ʼo Kilisito. Tokolahi neʼe punamaʼuli ʼi tanatou sisio ʼae ki te ha tuʼumaʼu ʼo te huafa ʼo te ʼAtua ʼi te ʼu tohi ʼafeā ʼo te Tohi-Tapu.
Tokolahi neʼe punamaʼuli ʼi tanatou sisio ʼae ki te ha tuʼumaʼu ʼo te huafa ʼo te ʼAtua ʼi te ʼu tohi ʼafeā ʼo te Tohi-Tapu
4 ʼE ha lelei mai, ʼe tonu ke tuʼu te huafa ʼo te ʼAtua ʼi te Tohi-Tapu. Kaʼe tokolahi te kau faifakaliliu ʼe mole natou fakaʼaogaʼi te huafa ʼo te ʼAtua. Ohage la, hili pe taʼu ʼe lua ki te maʼu ʼo te Koga Tohi-Tapu Fakakeleka ʼo te Traduction du monde nouveau, neʼe maʼu te Tohi-Tapu American Standard Version ʼae neʼe toe vakaʼi. Pea ʼi te Tohi-Tapu ʼaia ʼo te taʼu 1901, neʼe fakaʼaogaʼi ai te huafa ʼo te ʼAtua, kaʼe ko ʼae ʼo te taʼu 1952 ʼae neʼe toe vakaʼi, neʼe mole fakaʼaogaʼi ai te huafa ʼo te ʼAtua. Kotea tona tupuʼaga? ʼI te manatu ʼa te kau faifakaliliu ʼo te Tohi-Tapu ʼaia, ʼe “mole he ʼuhiga” ʼo te fakaʼaogaʼi ʼo te huafa ʼo te ʼAtua. Pea tokolahi te kau faifakaliliu ʼi te lea Fakapilitania mo ʼihi atu lea, neʼe natou mulimuli ki ai.
5. He koʼe ʼe maʼuhiga ke fakaʼaogaʼi te huafa ʼo te ʼAtua ʼi te Tohi-Tapu?
5 ʼE maʼuhiga koa ke tohi e te kau faifakaliliu te huafa ʼo te ʼAtua ʼi te Tohi-Tapu? ʼEi. ʼE haʼu te Tohi-Tapu mai ia Sehova, pea ʼe ina loto ke iloʼi e te hahaʼi ia tona huafa. Ohage la, ka fakaliliu e he tahi ia he tohi, ʼe tonu ke ina iloʼi pe kotea ʼae ʼe loto ki ai ia ia ʼae ʼe haʼu mai ai te tohi. Pea ʼe maʼua ke ha ʼi tana faifakaliliu. ʼE lahi te ʼu vaega ʼi te Tohi-Tapu Les Saintes Écritures. Traduction du monde nouveau, ʼe fakaha ai te maʼuhiga ʼo te huafa ʼo te ʼAtua pea ʼe tonu ke fakaʼapaʼapaʼi. (Ekesote 3:15; Pesalemo 83:19; 148:13; Esaia 42:8; 43:10; Soane 17:6, 26; Gaue 15:14) Pea neʼe takitaki e Sehova te kau faifakaliliu ʼo te Tohi-Tapu ʼaki tona laumalie maʼoniʼoni ke natou fakaʼaogaʼi tuʼa lauʼi afe tona huafa ʼi te ʼu tohi ʼafeā ʼo te Tohi-Tapu. (Lau ia Esekiele 38:23.)b (Vakaʼi te kiʼi nota.) Koia ʼi te temi ʼae neʼe pulihi ai e te kau faifakaliliu te huafa ʼo te ʼAtua, neʼe mole natou fakaʼapaʼapa kia Sehova.
6. He koʼe neʼe hilifaki te huafa ʼo te ʼAtua kia vaega ʼe ono ʼo te Tohi-Tapu Traduction du monde nouveau ʼae neʼe toe vakaʼi?
6 Ia ʼaho nei, kua lahi age te ʼu fakamoʼoni ke tou fakaʼaogaʼi ai te huafa ʼo Sehova. Ko tona huafa ʼe fakaʼaogaʼi tuʼa 7 216 ʼi te Tohi-Tapu Traduction du monde nouveau ʼo te taʼu 2013 ʼae neʼe toe vakaʼi. Neʼe toe hilifaki te huafa ʼo te ʼAtua kia vaega ʼe ono ʼi te Tohi-Tapu ʼaia. Ko vaega ʼe nima ʼe tuʼu ʼi te tohi ʼo 1 Samuele 2:25; 6:3; 10:26; 23:14, 16, koteʼuhi neʼe tuʼu te huafa ʼo te ʼAtua ʼi te ʼu Takaiga Tohi ʼo Te Tai Mate.c (Vakaʼi te kiʼi nota.) Pea ko te ono vaega, ʼe tuʼu ʼi te tohi ʼo Tui Fakamaau 19:18, ʼuhi ko te ʼu kumi neʼe fai ʼi te ʼu tohi ʼafeā ʼo te Tohi-Tapu.
7, 8. Kotea te fakaʼuhiga ʼo te huafa ʼo Sehova?
7 ʼE manatu te kau Kilisitiano moʼoni, ʼe maʼuhiga ke tou mahino ki te fakaʼuhiga ʼo te huafa ʼo te ʼAtua. Ko tona huafa ʼe fakaʼuhiga “ ʼE Ina Fakahoko.”d (Vakaʼi te kiʼi nota.) ʼI muʼa atu, neʼe fakamahino ʼi ʼatatou tohi te fakaʼuhiga ʼo te huafa ʼo te ʼAtua ia Ekesote 3:14, MN ʼae ʼe ui fenei ai: “ ʼE Au Liliu Anai Ko Ia ʼAe ʼe Au Loto Ki Ai.” Ko te Tohi-Tapu ʼae neʼe toe vakaʼi ʼo te taʼu 1984, ʼe fakamahino ai ko Sehova ʼe ina fakahoko, pea ʼe ha mai ai ʼe liliu ko meʼa fuli ʼe loto ki ai ke fakahoko ʼana fakapapau. Kaʼe ʼi te Tohi-Tapu ʼo te taʼu 2013 ʼae neʼe toe vakaʼi, ʼe fakamahino fenei: “ ʼE mole fakatuʼakoi te fakaʼuhiga ʼo te huafa ʼo Sehova ki tana liliu ko meʼa fuli ʼe loto ki ai ke fakahoko ʼana fakapapau. Koteʼuhi ʼe toe feala ke fakaliliu e Sehova te ʼu meʼa ʼae neʼe ina fakatupu, ke feala hana fakaʼaogaʼi ke fakahoko tona finegalo.”
8 ʼE feala ke fakaliliu e Sehova ia tana fakatupu ko meʼa fuli ʼe loto ki ai. Ohage la, neʼe fakaliliu e te ʼAtua ia Noe ko he tagata faʼu aleka, ia Petesaleele ko he tufuga ʼe faiva ʼi te ʼu gaue kehekehe, ia Seteone ko he tagata tau lototoʼa pea ko Paulo ko he misionea. Ko te huafa ʼo te ʼAtua ʼe ʼi ai tona ʼuhiga moʼoni ki tana hahaʼi, pea koia ʼae neʼe tohi ai tona huafa e te Komite Fakaliliu ʼo Te Tohi-Tapu Traduction du monde nouveau ʼi te Tohi-Tapu ʼaia.
9. He koʼe neʼe maʼuhiga ke fakaliliu te Tohi-Tapu ki ʼihi lea?
9 Kua lahi te ʼu fakaliliu ʼo te Tohi-Tapu ʼe pulihi ai te huafa ʼo te ʼAtua. Kaʼe ʼe natou fakaʼaogaʼi te higoa fakatuʼulaga “ ʼAliki” peʼe ko te higoa ʼo te ʼatua ʼo tonatou fenua. Ko te tupuʼaga tafitō ʼaia ʼo te maʼuhiga ki te Kolesi Pule ke maʼu e te hahaʼi ʼo te ʼu lea kehekehe ia he Tohi-Tapu ʼe fakaʼapaʼapaʼi ai te huafa ʼo te ʼAtua. (Lau ia Malakia 3:16.)e (Vakaʼi te kiʼi nota.) Koia, ʼo kaku mai ki te temi nei, ʼe fakamaʼuhigaʼi te huafa ʼo Sehova ʼi te ʼu fakaliliu ʼo te Tohi-Tapu Traduction du monde nouveau ia lea ʼe 130 tupu.
KO HE FAKALILIU ʼE MAHINO GAFUA MO TOTONU
10, 11. Kotea te ʼu fihifihia neʼe hoko ʼi te fakaliliu ʼo Tohi-Tapu Traduction du monde nouveau ki ʼihi lea?
10 Neʼe ʼi ai te ʼu fihifihia lolotoga te fakaliliu ʼo te Tohi-Tapu Fakapilitania Traduction du monde nouveau ki ʼihi lea. Ohage la, ʼi te Tohi-Tapu Fakapilitania neʼe fakaʼaogaʼi te kupu Fakahepeleo “Shéol” ia Ekelesiasi 9:10 mo ʼihi vaega. Ko te kupu ʼaia ʼe fakaʼaogaʼi mahani ʼi ʼihi Tohi-Tapu Fakapilitania. Kaʼe ʼe mole fakaʼaogaʼi te kupu ʼaia ʼi ʼihi lea koteʼuhi tokolahi te kau lautohi ʼo te ʼu lea ʼaia ʼe mole natou iloʼi te kupu Fakahepeleo “Shéol.” Neʼe mole tuʼu ʼi ʼanatou tikisionalio pea neʼe manatu foki ʼihi ko te higoa ʼo he koga meʼa. Koia neʼe fakagafua ai ki te kau faifakaliliu ke natou fakaliliu te kupu Fakahepeleo “Shéol” mo te kupu Fakakeleka “Hadès” ko “te Faitoka.” Ko he fakaliliu ʼe totonu pea mo mahino.
11 Ko te kupu Fakahepeleo mo Fakakeleka “laumalie,” neʼe toe faigataʼa tona fakaliliu ki ʼihi lea. Koteʼuhi ʼi te ʼu lea ʼaia, ʼe fakaʼuhiga tuʼumaʼu te kupu “laumalie” ki he meʼa ʼe mavae ʼi te sino hili te mate. Koia, ke tekeʼi te mahino hala ʼaia, neʼe fakagafua ki te kau faifakaliliu ke natou fakaliliu te kupu “laumalie” ʼo mulimuli ki te ʼu palalau ʼi muʼa atu pea mo te ʼu palalau ʼae ʼe hoa mai ki ai. Ko te fakaʼuhiga ʼo te ʼu fakamahino kehekehe ʼo te kupu “laumalie” ʼe feala ke maʼu ʼi te fakaʼosi ʼo te Tohi-Tapu Les Saintes Écritures. Traduction du monde nouveau (avec notes et références). ʼE ʼi ai te ʼu kiʼi nota ʼaoga ʼo ʼuhiga mo te ʼu kupu Fakahepeleo mo Fakakeleka ʼe tuʼu ʼi te ʼu lalo pasina ʼo te Tohi-Tapu ʼo te taʼu 2013 ʼae neʼe toe vakaʼi. Pea ʼaki te ʼu kiʼi nota ʼaia, ʼe faigafua ai te lau mo te mahino ki te Tohi-Tapu.
Neʼe vakaʼi e te komite te ʼu lauʼi afe fehuʼi mai te kau faifakaliliu ʼo te Tohi-Tapu lolotoga tona toe vakaʼi
12. Kotea ʼihi fetogi neʼe fai ʼi te Tohi-Tapu ʼo te taʼu 2013 ʼae neʼe toe vakaʼi?
12 ʼAki te ʼu fehuʼi ʼa te kau faifakaliliu, neʼe ha ai te ʼu mahino hala ʼe feala ke maʼu ʼo ʼuhiga mo te Tohi-Tapu. Koia ʼi Sepetepeli 2007, neʼe fakagafua e te Kolesi Pule ke toe vakaʼi te Tohi-Tapu Fakapilitania. Neʼe vakaʼi e te komite te ʼu lauʼi afe fehuʼi mai te kau faifakaliliu ʼo te Tohi-Tapu lolotoga tona toe vakaʼi. Ko te ʼu kupu Fakapilitania ʼafeā neʼe fetogi ʼaki te ʼu kupuʼi palalau ʼe fakaʼaogaʼi mahani. ʼE faigafua ai te lau ʼo te Tohi-Tapu, te mahino pea mo totonu aipe. Ko te fakaliliu ʼae kua fai ki ʼihi lea, neʼe toe tokoni ki te lelei ʼo te fakaliliu ʼo te Tohi-Tapu Fakapilitania.—Taaga Lea 27:17.
KO TE FAKAFETAʼI LAHI
13. Kotea te manatu ʼa te tokolahi ʼo ʼuhiga mo te Tohi-Tapu ʼo te taʼu 2013 ʼae neʼe toe vakaʼi?
13 Kotea te manatu ʼa te tokolahi ʼo ʼuhiga mo te Tohi-Tapu Fakapilitania Traduction du monde nouveau ʼae neʼe toe vakaʼi? ʼE fakaha e te ʼu tehina mo tuagaʼane tanatou lotofakafetaʼi ʼi te ʼu lauʼi afe tohi neʼe natou momoli ki te ʼu pilo lalahi ʼo te kau Fakamoʼoni ʼa Sehova ʼi Brooklyn, ʼi New York. Tokolahi ʼe natou maʼu te manatu ʼa te tuagaʼane neʼe ina tohi fenei: “ ʼE hage te Tohi-Tapu ko he puha ʼe maʼu ai ni maka maʼuhiga kehekehe. ʼE hage pe te faigafua ʼo te lau ʼo te ʼu folafola ʼa Sehova ʼi te Tohi-Tapu ʼo te taʼu 2013 ʼae neʼe toe vakaʼi, ko te vakavakaʼi ʼo te gigila, mo te lanu, mo te taulekaleka ʼo te ʼu maka maʼuhiga takitahi. ʼE faigafua te ʼu vaega pea ʼe feala ke au iloʼi lelei ai ia Sehova. ʼE hage pe ko he tamai ʼe ina ʼaofi au ʼaki ʼona nima lolotoga tana lau ʼana folafola fakalotofimalie kia au.”
14, 15. Kotea te manatu ʼa ʼihi ʼo ʼuhiga mo te Tohi-Tapu Traduction du monde nouveau ʼi ʼihi lea?
14 Ko natou ʼae ʼe palalau ʼi he tahi lea, neʼe natou toe lotofakafetaʼi ʼo ʼuhiga mo te Tohi-Tapu Traduction du monde nouveau. Ko te tagata kua matuʼa ʼe maʼuli ʼi Sofia, ʼi Bulgarie, neʼe ina ui fenei ʼo ʼuhiga mo te Tohi-Tapu ʼi te lea ʼo Bulgarie: “Neʼe au lau te Tohi-Tapu lolotoga ni taʼu, kaʼe ko taku hoki lau ʼae he fakaliliu ʼe mahino gafua mo malave ki toku loto.” ʼO toe feia ki te tuagaʼane mai Albanie neʼe ina tohi fenei: “ ʼE logo lelei te Folafola ʼa Te ʼAtua ʼi te lea Albanais. Ko he toe pilivilesio te palalau mai ʼa Sehova ʼi tamatou lea.”
15 ʼI ʼihi fenua, ʼe totogi kovi te Tohi-Tapu peʼe faigataʼa tona maʼu. Ko he toe tapuakina te maʼu hakita Tohi-Tapu. Ko he logo mai Rwanda neʼe ui fenei ai: “Lolotoga ni taʼu, tokolahi neʼe natou ako te Tohi-Tapu mo te ʼu tehina, neʼe mole tuputupu ʼi te moʼoni, koteʼuhi neʼe mole hanatou Tohi-Tapu. Neʼe mole hanatou foʼi falā moʼo totogi ʼaki te Tohi-Tapu ʼo tonatou ʼekelesia. Pea neʼe mole natou mahino tuʼumaʼu ki te fakaʼuhiga ʼo ʼihi vaega, koia ʼae neʼe mole natou tuputupu ai.” ʼI te temi ʼae neʼe maʼu ai te Tohi-Tapu Traduction du monde nouveau ʼi te lea ʼo Rwanda, ko te kiʼi famili ʼi Rwanda mo te ʼu fanau ʼe toko fa, neʼe natou ui fenei: “ ʼE matou lotofakafetaʼi ʼaupito kia Sehova mo te tagata faifekau agatonu mo poto ʼi tanatou foaki mai te Tohi-Tapu. ʼE matou masisiva pea ʼe mole hamatou foʼi falā moʼo totogi ʼaki he ʼu Tohi-Tapu maʼa tomatou kiʼi famili katoa. Kaʼe ʼi te temi nei kua matou tahi maʼu tana Tohi-Tapu. Koia ʼe lau te Tohi-Tapu e tomatou kiʼi famili katoa ʼi te ʼaho fuli, ʼo matou fakaha ai tamatou lotofakafetaʼi kia Sehova.”
16, 17. (1) Kotea ʼae ʼe loto e Sehova maʼa tana hahaʼi? (2) Kotea ʼae ʼe tonu ke tou fai?
16 ʼE toe fakaliliu anai te Tohi-Tapu Traduction du monde nouveau ʼae neʼe toe vakaʼi ki ʼihi lea. Pea ʼe faigaʼi e Satana ke ina taʼofi te gaue ʼaia. Kaʼe ʼe tou iloʼi ko Sehova ʼe ina loto ke fagono tana hahaʼi katoa ki tana palalau age kia natou ʼi he lea ʼe mahino lelei. (Lau ia Esaia 30:21.)f (Vakaʼi te kiʼi nota.) Koia kua vave hoko mai pe te temi ʼae ʼe “fonu moʼoni anai te kele ʼi te ʼatamai malama ʼo ʼuhiga mo Sehova ohage ko te ʼuʼufi ʼo te tai e te ʼu vai.”—Esaia 11:9, MN.
17 ʼOfa pe ke tou fakaʼaogaʼi te ʼu meʼa ʼofa fuli mai ia Sehova, ʼo kau ai mo te fakaliliu ʼaia ʼe ina fakamaʼuhigaʼi tona huafa. Tou tuku ke palalau mai ia Sehova ʼi te ʼaho fuli ʼaki tana Folafola. Pea ʼe feala ke fagono lelei mai ki ʼatatou faikole fuli. ʼE tokoni mai anai ʼatatou felogoʼi ʼaia ke tou iloʼi lelei age ia Sehova mo tuputupu aipe totatou ʼofa ʼae kia te ia.—Soane 17:3.
“Ko he toe pilivilesio te palalau mai ʼa Sehova ʼi tamatou lea”
a Vakaʼi te alatike “Comment choisir une bonne traduction de la Bible?” ʼi Te Tule Leʼo Fakafalani ʼo te ʼaho 1 ʼo Maio 2008.
b Esekiele 38:23, (MN): “Pea ʼe moʼoni ia, ʼe au hikihiki anai ia au pea ʼe au fakamaʼoniʼoniʼi ia au, pea ʼe au fakaha anai ke iloʼi au ia mata ʼo te ʼu puleʼaga tokolahi; pea ʼe tonu anai ke natou iloʼi ko au ia Sehova.’”
c Ko te ʼu Takaiga Tohi ʼo Te Tai Mate, kua ʼafeā age ia taʼu ʼe 1 000 ʼi te tohi Fakahepeleo ʼa te kau Massorètes, ʼae neʼe fakaʼaogaʼi moʼo fakaliliu te Tohi-Tapu Traduction du monde nouveau.
d Ko ʼihi tohi ʼe maʼu ai te fakaʼuhiga ʼaia, kaʼe ʼe mole manatu tahi te kau sivi Tohi-Tapu fuli.
e Malakia 3:16, (MN): “ ʼI te temi ʼaia, ko natou ʼae ʼe manavasiʼi kia Sehova neʼe natou fefaipalalauʼaki, ʼo tahi faipalalau mo tona kaumeʼa, pea neʼe tokagaʼi e Sehova pea mo fakalogo. Pea neʼe ʼi ai te tohi fakamanatu neʼe kamata tohi ʼi ʼona muʼa maʼa natou ʼae ʼe manavasiʼi kia Sehova pea mo natou ʼae ʼe natou manatuʼi tona huafa.”
f Esaia 30:21, (MN): “ ʼE logo anai ʼou taliga ki he folafola ʼe haʼu mai ʼou tuʼa, ʼo ui fenei: ‘Koʼeni te ala. Kotou haʼele ai,’ pe ʼe tonu ke kotou olo ki te faʼahi mataʼu peʼe tonu ke kotou olo ki te faʼahi hema.”