3 Te Fakaʼapaʼapa

TONA FAKAʼUHIGA

Ko te taumatuʼa ʼae ʼe fefakaʼapaʼapaʼaki, ʼe nā feʼofaʼofani tatau aipe pe ʼe mole nā manatu tahi ʼi he aluʼaga. ʼE ui fenei ʼi te tohi ʼo ʼuhiga mo te maʼuli fakataumatuʼa: “Ko te taumatuʼa ʼaia ʼe nā tekeʼi te ʼu aluʼaga ʼae ʼe fakatupu tokakovi. Pea ʼe nā faigaʼi ke nā faipalalau tuʼumaʼu ki he fihifihia pe ʼe tau mo naua. ʼAki te fakaʼapaʼapa ʼe nā fefakalogoʼaki pea mo nā kumi he puleʼaki ke nā logo tahi ai.”

PELESEPETO FAKATOHI-TAPU: “Ko he tahi ʼe ʼofa, . . . ʼe mole ina kumi te ʼu meʼa ʼae ʼe lelei kia ia.” —1 Kolonito 13:4, 5.

ʼE ui fenei e Micah: “ ʼE au fakaʼapaʼapa ki toku ʼohoana ʼo au fakaha age ʼe maʼuhiga ia ia kia au. Pea ʼe mole au fai anai he meʼa ʼe fakatupu kovi kia ia pea mo tomā maʼuli fakataumatuʼa.”

TONA MAʼUHIGA

Ka mole maʼu te fakaʼapaʼapa ʼi te nofo ʼohoana, ʼe feala ke nā fefatufatuʼaki mo fevavaʼaki pea mo fefehihiaʼaki. Pea ʼe ui e te ʼu tagata sivi, ko te ʼu aluʼaga la ʼaia ʼe iku tuʼumaʼu ki he mavete.

ʼE ui fenei e Brian: “Ko te fai ʼo he ʼu fakahuahua moʼo fakalainoaʼi tou ʼohoana ʼe fakatupu tuʼutamaki. Koteʼuhi ʼe puli ai te maʼuhiga ʼo tou ʼohoana pea mo tana falala atu kia koe.”

TE MEʼA ʼAE ʼE FEALA KE KE FAI

SIVISIVI IA KOE

Lolotoga he vahaʼa, tokaga ki au palalau mo tau aga. Pea ke fai leva te ʼu fehuʼi ʼaeni:

• ‘Neʼe au fatufatuʼi koa toku ʼohoana? Neʼe au vikiʼi koa ia ia?’

• ‘Ko te ʼu aluʼaga fea ʼae neʼe au fakaʼapaʼapaʼi ai toku ʼohoana?’

FAIPALALAU MO TOU HOA

• Kotea la he ʼu aga mo he ʼu palalau ʼe kolua logoʼi ai te fakaʼapaʼapa?

• Kotea la he ʼu aga mo he ʼu palalau ʼe kolua logoʼi ai te heʼe fakaʼapaʼapa?

TOKONI

• Kolua tahi tohi ki he moʼi pepa, ni aluʼaga ʼe tolu ʼe kolua loto ke fakaʼapaʼapaʼi ai kolua. Kolua fefoakiʼaki ʼakolua moʼi pepa. Pea kolua faigaʼi leva ke kolua gaueʼi te ʼu faʼahi ʼae ʼe tonu ke kolua fefakaʼapaʼapaʼaki ai.

• Fai he lisi ʼo te ʼu kalitate ʼo tou ʼohoana. Pea ke ui age ki ai pe koʼe ʼe ke leleiʼia ʼona kalitate ʼaia.

ʼE ui fenei e Megan: “ ʼE au fakaha taku fakaʼapaʼapa ki toku ʼohoana ʼaki taku aga. ʼE ha ai tona maʼuhiga ʼae kia au pea mo taku loto ʼae ke fiafia. ʼE mole fakaʼuhiga leva ke tou fai he ʼu toe gaue ke feafeaʼi, kae ʼe feala pe ke ha ʼi he ʼu kiʼi meʼa liliki.”

Koia, ʼe mole ko he fakahaha ʼe ko koe ko he tahi ʼe aga fakaʼapaʼapa peʼe kailoa, kae ke logoʼi e tou ʼohoana tau fakaʼapaʼapa age kia ia.

PELESEPETO FAKATOHI-TAPU: “Kotou kofuʼi te ʼofa mamahi, mo te manavaʼofa, mo te agaʼofa, mo te agavaivai, mo te agamalū pea mo te kataki fualoa.”—Kolose 3:12.