Te Tokoni ʼAe ʼe Lelei Tukupau Kia Natou ʼAe ʼe Putu

NEʼE LAHI TE ʼU SIVI NEʼE FAI HEʼEKI FAʼA FUALOA ʼO ʼUHIGA MO TE LOTOMAMAHI ʼAE MOKA MATE HE TAHI NEʼE TOU ʼOʼOFA MAMAHI AI. Pea ko te ʼu tokoni lelei ʼae ʼe fai e te kau poto ʼe alu tahi mo te ʼu pelesepeto fakapotopoto ʼae ʼe maʼu ʼi te tohi ʼafeā ʼae ko te Tohi-Tapu. Ko te ʼu tokoni ʼae ʼe maʼu ai, ʼe ʼaoga ki te ʼu temi fuli. Pea ʼe mole ko he tohi pe ʼe tuha mo te falala. ʼE ina toe foaki mai mo ni logo ʼe mole tou maʼu anai ʼi he tahi age ʼu faʼahi. Pea ko te ʼu logo ʼaia ʼe fakalotofimalie kia natou ʼae ʼe putu.

• Te iloʼi pau ʼae ʼe mole mamahi te kau mate

  ’E ui fenei ia Ekelesiasi 9:5: “E mole iloi he mea e natou ae kua mate.” Pea ʼe ui ia Pesalemo 146:4, MN: “ ʼE puli [ʼanatou] fakakaukau.” Koia ʼae ʼe fakatatau ai ʼi te Tohi-Tapu te mate ki he moe fimalie.—Soane 11:11.

• Te tui pau ʼae ʼe ʼofa mamahi te ʼAtua kia tatou

  ʼE ui fenei ia Pesalemo 34:15, MN: “ ʼE sio te ʼu mata ʼo Sehovaa ki te kau agatonu, pea ʼe logo ʼona taliga ki ʼanatou tagi.” Ko te fakaha ʼo te ʼu meʼa ʼae ʼe tou logoʼi ʼi te faikole ʼe mole ko he faitoʼo pe ki te fakatotoka lelei ʼo te fakakaukau. ʼI tona fakahagatonu, ʼe tou maʼu ai he ʼu felogoi lelei mo totatou Tupuʼaga ʼae ʼe ina lava fakafimalieʼi tatou ʼaki tona mafimafi.

• Te ʼamanaki ki he ka haʼu taulekaleka

  Fakakaukauʼi age muʼa te temi ʼae ka fakatuʼuake ai anai te kau mate ʼi te kele. ʼE liuliuga te talanoa ʼi te Tohi-Tapu ki te temi ʼaia pea ʼe ina fakaha mai pe ʼe feafeaʼi anai te maʼuli ʼi te kele. ʼE ui fenei ia Fakaha 21: 3, 4: “ ʼE [. . . ] holoholoʼi anai [e te ʼAtua] te ʼu loʼimata fuli mai [ʼotatou] mata, ʼe mole toe ʼi ai anai [he] mate, mo [he] putu, mo [he] lauga pea mo [he] mamahi.”

Ko te tokolahi ʼo natou ʼae ʼe tui kia Sehova, te ʼAtua ʼo te Tohi-Tapu, ʼe natou maʼu he malohi fakaofoofo moʼo ʼutaki te putu. Koteʼuhi ʼe natou fakaʼamu ke natou toe sisio kia natou ʼae neʼe natou ʼoʼofa mamahi ai. Ohage la, ko Ana neʼe mate tona ʼohoana ʼi tona taʼu 65, ʼe ina ui fenei: “Kua au iloʼi leva ʼaki te Tohi-Tapu ko te kau mate ʼe mole natou mamahi. Pea ʼe fakatuʼuake anai e te ʼAua ia natou fuli ʼae ʼe ina manatuʼi. ʼE hake tuʼumaʼu ia au te fakakaukau ʼaia moka au manatu ki toku ʼohoana. Koia,ʼe ko he tokoni ke au lava katakiʼi te malaʼia ʼaia neʼe hoko.”

ʼE ui fenei e Tina ʼae neʼe tou talanoa ki ai ʼi muʼa atu: “Talu mai te mate ʼa Timo, neʼe au logoʼi te nima ʼo te ʼAtua ʼi te ʼu temi faigataʼa. Ko te fakatuʼuake ʼe ko he fakapapau ʼe au tui moʼoni ki ai. ʼE au maʼu ai te faʼa kataki ke feala haku kaku ki te temi ʼae ka mā toe fesioʼaki ai mo Timo.”

Ko te toko lauʼi miliona hahaʼi ʼe natou tui malohi ohage ko Tina, ko te Tohi-Tapu ʼe tuha mo te falala. ʼE lagi hage kia koe te ʼu fakapapau ʼo te Tohi-Tapu ʼe ko he ʼu moemisi pe. Kae he koʼe ʼe mole ke vakavakaʼi muʼa he ʼu fakamoʼoni ʼe ha ai ko te ʼu tokoni ʼae ʼe maʼu ai ʼe tuha mo te falala. ʼE ke iloʼi moʼoni ai anai ko te Tohi-Tapu ʼe ko te tokoni ʼae ʼe lelei tukupau ki te ʼutakiʼi ʼo te putu.

TAHI ʼU FAKAMAHINO ʼO UHIGA MO TE ʼAMANAKI KI TE KAU MATE

Vakaʼi te ʼata viteo ʼi tatatou tuʼasila ʼi te Neti, jw.org/wls

KOTEA TE ALUʼAGA ʼO TE KAU MATE?

Kotea te meʼa ʼae ka hoko moka tou mamate? Ko te tali ʼae ʼi te Tohi-Tapu ʼe tasilo pea ʼe fakalotofimalie mo fakalotomalohi.

Kotou vakaʼi TOHI >VITEO (ʼAta viteo: Te Tohi-Tapu > Akonaki ʼo Te Tohi-Tapu)

ʼE KOTOU FIA MAʼU KOA HE ʼU LOGO ʼE LELEI?

ʼI te ʼu logo fakamataku ʼae ʼe tou logoʼi, kofea ʼae ʼe feala ke kotou maʼu ai he ʼu logo ʼe lelei? ʼI te ʼata viteo ʼaia ʼe ha ai te kaupepa Te ʼu Logo Lelei Mai Te ʼAtua

Kotou vakaʼi TOHI >VITEO (ʼAta viteo: Fono Mo Faifakamafola >Meʼa Gaue Ki Te Faifakamafola)