Te Lotohoha?

Ko te lotohoha ʼe ko he logoʼi ʼaia e tou sino ia he aluʼaga faigataʼa. Ko te ʼuto ʼe ina tufaki te ʼu hormones ki te ʼu koga fuli ʼo te sino. Pea ko te ʼu hormones ʼaia ʼe natou fakatupu te ta vave ʼo te mafu, te hake ʼo te tōsio, mo te hoha ʼo te manava, pea ʼe fakafefeka ai te ʼu ivi. Ko te ʼu faʼahi ʼaia ʼe ha mo logoʼi e tou sino ki he aluʼaga ʼe hoko. Pea ka puli te lotohoha, kua toe liliu leva tou sino ki te mahani.

ʼONA FUA LELEI MO KOVI

Ko te lotohoha ʼe tau mo te hahaʼi fuli pea e kamata tupu ʼi te ʼuto. ʼE ina fakafealagia ke tou tauʼi te ʼu aluʼaga faigataʼa. Ko tona fua lelei ʼe ko tana uga ia koe ke ke fai vave he ʼu puleʼaki moka hoko he aluʼaga. ʼE toe tokoni foki ke ke fai ni fakatuʼutuʼu peʼe ke hikihiki ʼau faiga ohage la, moka ʼe ke fai he sivi, peʼe ko hau kumi gaue, peʼe ko he faigaoʼi fakataupiepie.

Kae kapau e ke taupau fualoa te lotohoha ʼe fakatupu kovi anai ki tou sino, ki tou loto pea mo tau fakakaukau. ʼE feala ke fetogi ai tau aga mo ʼau felogoi ʼae mo te hahaʼi. Ko ʼihi ʼe natou inu kava mo kakai fakavale mo toloke mo suluka pea mo hoko folo ni faitoʼo. E toe feala ke kita lotomamahi ʼaupito ʼo kita fia fakamate ai.

Logo la ʼe mole tou tatau fuli moka tou lotohoha, kae ʼe fakatupu mahaki ki te ʼu koga fuli ʼo tokita sino.