KUA ʼAʼASILI KOVI TE MALAMANEI

1 | Tokaga Ki Tou Maʼuli Malolo

HE KOʼE ʼE MAʼUHIGA

ʼE feala ke tuʼutamakiʼia totatou maʼuli malolo ʼi ni aluʼaga kehekehe.

Ka hoko ni tokakovi pea ʼe lotohoha te hahaʼi, pea ka fualoa ʼi te temi te lotohoha pea ʼe fakatupu mahaki.
Ka hoko he taʼi mahaki pea ʼe fakalahi tuʼumaʼu te gaue ʼo te ʼu lopitali, ʼo faigataʼa ai te tokaga ki te hahaʼi mahaki fuli pea mo te maʼu feʼauga ʼo he ʼu faitoʼo.
Ka hoko he tuʼutamaki pea ʼe faigataʼa te totogi ʼo te ʼu meʼa ʼae ʼe ʼaoga tafito ki te maʼuli, ia he meʼa kai pea mo he ʼu faitoʼo.

Ko Meʼa ʼe Tonu Ke Iloʼi

Ko he mahaki tausino peʼe ko he lotohoha lahi, ʼe feala ke ina uga he tahi ke ina fai he ʼu tonu ʼe mole lelei, pea ke mole ina taupau lelei tona maʼuli malolo. Ki muli age ʼe lelesili tona mahaki.
Ko he mahaki neʼe mole faitoʼo ʼe lelesili kovi anai, ʼo feala ke tuʼutamaki ai.
Ka lelei te maʼuli malolo, pea ʼe feala ke lelei te ʼu tonu ka fai ʼi te ʼu temi faigataʼa.
ʼE feala ke fai he puleʼaki ki te puipui ʼo te maʼuli malolo, tatau aipe peʼe tou masisiva.

Ko Meʼa ʼe Tonu Ke Fai Nei

Kapau ʼe feala, aga fakapotopoto ʼo vakaʼi fakatomuʼa ni aluʼaga ʼe fakatupu tuʼutamaki pea mo fai ni puleʼaki ke tou hao ai. ʼE toe maʼuhiga ki te maʼuli malolo. ʼE feala ke tou hao mai te mahaki, peʼe ke mole kovi age, mo kapau ʼe tou aga maʼa pea ke maʼa totatou nofoʼaga. ʼE lelei age pe te mole mahaki.

“Ka tou aga maʼa pea mo maʼa totatou nofoʼaga, pea ʼe mole lahi te puli falā ki te toketa pea mo te ʼu faitoʼo.”—Andreas.a

a Neʼe fetogi te ʼu higoa.

ʼE FEAFEAʼI TONA KATAKIʼI—Ko Tokoni ʼAoga

ʼI te ʼu temi faigataʼa, taupau tou maʼuli malolo ʼo ke muliʼi te ʼu tokoni ʼaeni

AGA MAʼA

Aga maʼa

ʼE ui ʼi te Tohi-Tapu: “E sio te tagata poto ki te kovi pea e nono ia ia.” (Taaga Lea 22:3) Faiga ke ke iloʼi te ʼu meʼa fuli ʼae ʼe fakatupu kovi ki tou maʼuli malolo.

Fanofano lelei ʼaki he foʼi topa, tafito ia muʼa ʼo tau kai peʼe ʼi tau ʼosi alu ki te fale mamaʼo.
Fakamaʼa lelei tou loto fale, tafito te ʼu meʼa pea mo te ʼu faʼahi ʼae ʼe ke fakalaka ai.
Kapau ʼe feala, tokaga naʼa ke fakaovi ki he tahi ʼe ina maʼu he mahaki ʼe pikisia gafua.

KAI FAKAPOTOPOTO

Kai fakapotopoto

ʼE ui ʼi te Tohi-Tapu: “ ʼE mole fehiʼa he tagata ki tona sino, kaʼe ʼe ina fafaga pea mo fakapelepeleʼi.” (Efeso 5:29) ʼE tou fakaha ʼe tou ʼofa ki totatou sino mo kapau ʼe tou tokaga lelei ki te meʼa ʼae ʼe tou kai mo inu.

Inu lahi te vai.
Kai lahi te lauʼakau mo te fuaʼi ʼakau.
Fakasiʼisiʼi tau kai te gako, te masima pea mo te suka.
Fakagata te suluka mo te toloke. Fakapotopoto te inu kava.

“Tou kai fakapotopoto ke mole tou mahahaki, heʼe feala ke lahi takita puli ʼi te totogi ʼo te toketa mo te ʼu faitoʼo. ʼE lelei age te toʼo ʼo he meʼa kai ʼe ʼaoga mo lelei ki te maʼuli.”—Carlos.

FAIGAOʼI MO MALOLO FEʼAUGA

Malolo feʼauga

ʼE ui ʼi te Tohi-Tapu: “E lelei age te fonu o te nima e tahi mo te malolo, i te fonu o te u nima lua mo te gaue pea mo te tuli o te matagi.” (Ekelesiasi 4:6) Fakafuafua lelei tau gaue mo tau malolo.

Faigaoʼi ʼo ke haʼele muʼa. Tatau aipe pe kua ke matuʼa, mahaki mo maʼimoa, kae ʼe siasiaʼa age tou maʼuli moka gaugaue tou sino.
Faigaoʼi

Ke feʼauga tau malolo. He kapau ʼe mole feʼauga, pea ʼe lahi te hoha pea ʼe mole tokalelei te fakakaukau. Pea ʼaki te temi, ʼe feala ke tupu ai he tahi ʼu mahaki.
Fakatuʼutuʼu fakapotopoto te hola moe pea mo ke fakaʼapaʼapa ki ai. Ke ke moe mo ke ʼala tuʼumaʼu ʼi te hola neʼe ke fakatuʼutuʼu ki ai.
Ka hoko te temi moe, matehi te televisio pea mo te ʼu masini toʼotoʼo.
Ia muʼa ʼo tau alu ʼo moe, tokaga naʼa ke inu kafe mo inu kava, pea mo fakasiʼisiʼi te kai.

“Neʼe au tokagaʼi ʼe ʼi ai te fua lelei ʼo taku malolo ki toku maʼuli. Ka mole feʼauga taku moe, pea ʼe au mamahi ʼulu pea mo mamahi toku sino. Kae kapau ʼe au malolo feʼauga, pea ʼe au malohi ke au fai ia meʼa fuli ʼe au loto ki ai pea ʼe tahitahiga taku mahaki.”—Justin.