Ko Te Fale Fehikitaki Moʼo Fai ʼo Te Tauhi

ʼE KOUTOU ʼiloʼi koa pe koteā te fale ʼaenī? Ko te fale fehikitaki makehe moʼo fai te tauhi ʼaē kia Sehova. Neʼe toe fakahigoaʼi foki ko te tapenakulo. Neʼe taʼu katoa te laga e te hahaʼi ia te tapenakulo ʼaia ʼi tanatou ʼosi mavae ʼaē mai Esipito. ʼE koutou ʼiloʼi koa pe ko ai ʼaē neʼe ina fakatuʼutuʼu ke laga te tapenakulo ʼaia?

Neʼe ko te fakatuʼutuʼu ʼa Sehova. ʼI te nofo ʼa Moisese ʼi te Moʼuga ʼo Sinai, neʼe fakahā age e Sehova peʼe feafeaʼi te faʼu ʼo te fale fehikitaki ʼaia. Neʼe ina ʼui age ke fai he fale ʼe faigafua hona vete, ke feala ai hona feʼāveʼaki ʼi te ʼu potu fuli pe. Koia ʼi te feʼoloʼaki ʼa te kau Iselaelite ʼi te toafa, neʼe nātou feʼāveʼaki te fale fehikitaki mo nātou.

Kapau ʼe koutou sio ki loto ʼi te kiʼi kogafale veliveli ʼaē ʼe tuʼu ʼi te potu taupotu ʼo te fale fehikitaki, ʼe koutou sio ki te puha. Neʼe higoa te puha ʼaia ko te aleka ʼo te fuakava. Neʼe ʼi ai te ʼu ʼaselo e lua peʼe ko te ʼu kelupimi aulo, neʼe nā tahi tuʼu ʼi te tafaʼaki ʼo te puha ʼaia. Neʼe toe tohi e te ʼAtua te ʼu Folafola e Hogofulu ki te ʼu maka e lua, he neʼe fasifasiʼi e Moisese te ʼu ʼuluaki maka. Pea ko te ʼu maka ʼaia neʼe tuku ʼi te loto aleka ʼo te fuakava. Neʼe toe ʼai kiai mo te ipu mane. ʼE kei koutou manatuʼi koa la pe koteā te mane?

Neʼe fili e Sehova ia Alone te tēhina ʼo Moisese ke pelepitelo lahi. Neʼe ina takitaki te hahaʼi ʼi te tauhi ʼaē kia Sehova. Pea neʼe toe pelepitelo foki mo tona ʼu foha.

ʼI te temi nei koutou sioʼi te kogafale lahi ʼo te fale fehikitaki. ʼE tuʼa lua tona lahi ʼi te kiʼi kogafale veliveli. ʼE koutou sio koa ki te kiʼi puha veliveli, ʼaē ʼe hake mai ai te kohu? Ko te ʼaletale ʼaia ʼaē neʼe tutu ai e te kau pelepitelo te meʼa magoni ʼaē ʼe higoa ko te iseso. Neʼe ʼi ai te tuʼulaga mālama ko ʼona mālama e fitu. Pea ko te tolu meʼa ʼaē neʼe ʼi te kogafale ʼaia, neʼe ko te laupapa. ʼI te laupapa ʼaia neʼe hili ai te ʼu foʼi pane e 12.

ʼI te malaʼe ʼo te tapenakulo neʼe ʼi ai te foʼi tane vai. Neʼe fakaʼaogaʼi e te kau pelepitelo te vai ʼaia moʼo nātou fakamaʼa. Neʼe toe ʼi ai foki mo te ʼaletale lahi. ʼI te ʼaletale ʼaia neʼe tutu ai te ʼu manu ʼaē neʼe matematehi, ʼe ko he mōlaga kia Sehova. Ko te fale fehikitaki neʼe tuʼu ʼi te lotomalie ʼo te nofoʼaga, pea neʼe nonofo te kau Iselaelite ʼi tonatou ʼu falelā ʼi te ʼu tafaʼaki ʼo te fale fehikitaki ʼaia.