ʼE Fili e Te ʼAtua Ia Tavite

ʼE KOUTOU sio ki te meʼa ʼaē neʼe hoko? Neʼe hāofaki e te tama te akeno mai te uluso. Neʼe haʼu te uluso ʼo toʼo te akeno pea ina ʼave ke ina kai. Kae neʼe tuli ia e te tama, pea neʼe ina faʼao te akeno mai te gutu ʼo te uluso. Pea ʼi te tuʼu ake ʼa te uluso, neʼe puke ia e te tama pea ina tāʼi ʼo mate ai! ʼI te tahi temi neʼe ina hāofaki te ōvi mai te laione. ʼE mole ko he tama lototoʼa koa la? ʼE koutou ʼiloʼi koa pe ko ai te tama ʼaia?

Ko te tūpulaga ko Tavite. Neʼe nofo ʼi Petelehemi. Ko tana kui tagata ko Opete, te tama ʼa Lute mo Poase. Kei koutou manatuʼi koa ia nāua? Pea ko te tāmai ʼa Tavite ʼe ko Sese. Neʼe taupau e Tavite te ʼu ōvi ʼa tana tāmai. Neʼe tupu ia taʼu e 10 ki muli mai ʼi te ʼosi fakanofo hau ʼo Saulo e Sehova.

ʼAki te temi neʼe ʼui ai e Sehova kia Samuele: ‘Toʼo he lolo makehe pea ke ʼalu ki te ʼapi ʼo Sese ʼi Petelehemi. Neʼe ʼau fili te tahi ʼi tona ʼu foha ke hau.’ ʼI te sio ʼa Samuele ki te ʼuluaki foha ʼo Sese ko Eliape, neʼe ʼui maʼana: ‘ ʼE mahino ia ʼe ko ia nei ʼaē neʼe fili e Sehova.’ Kae neʼe ʼui age e Sehova ki ai: ‘ ʼAua naʼa ke sio ki tona lahi pea mo tona talavou. Neʼe mole ʼau fili ia ia ke hau.’

Pea neʼe pāuiʼi e Sese tona foha ko Apinatape pea ina ʼaumai kia Samuele. Kae neʼe ʼui age e Samuele: ‘Kailoa, ʼe mole ko ia ʼaē neʼe fili e Sehova.’ ʼOsi ʼaia, pea ʼaumai e Sese tona foha ko Sama. Neʼe ʼui age e Samuele: ‘Kailoa, ʼe mole ko ia ʼaē neʼe fili e Sehova.’ Neʼe ʼaumai e Sese kia Samuele tona ʼu foha e toko fitu, kae neʼe mole fili e Sehova he tahi ia nātou ʼaia. Pea fehuʼi age e Samuele: ‘Ko tou ʼu foha fuli ʼaenī?’

Neʼe ʼui age e Sese: ‘Kei toe toku foha muli. Kae ʼe ina taupau te ʼu ōvi.’ ʼI te ʼaumai ʼo Tavite, neʼe sio ia Samuele ʼe ko he tama tūpulaga. Neʼe ʼui age e Sehova: ‘Ko ia ʼaia. Liligi ki ai te lolo.’ Pea neʼe fai e Samuele te meʼa ʼaia. ʼE hoko mai anai te temi ʼaē ka hau ai ia Tavite ki Iselaele.