Mai Te Nofo Popūla ʼi Papiloni ʼo Aʼu Ki Te Toe Laga ʼo Te ʼu Kaupā ʼo Selusalemi

Lolotoga tanatou nonofo popūla ʼi Papiloni, neʼe lahi te ʼu ʼahiʼahiʼi ʼaē neʼe hoko ki te tui ʼa te kau Iselaelite. Ko Satalake, mo Mesake pea mo Apeteneko neʼe lī ia nātou ki te gutuʼumu kakaha, kae neʼe hāofaki ia nātou e te ʼAtua. Ki muli age, ʼi te maumauʼi ʼo Papiloni e te kau Metia pea mo te kau Pelesia, neʼe lī ia Taniela ki te luo ʼo te ʼu laione, kae neʼe puipui ia e te ʼAtua ʼo ina pupunu te ʼu gutu ʼo te ʼu laione.

Pea, neʼe fakamavae e te hau ʼo Pelesia ko Siliusi ia te kau Iselaelite. Neʼe nātou liliu ki tonatou fenua ʼi te hili ʼo taʼu e 70 ki tanatou nonofo popūla ʼi Papiloni. Ko te ʼuluaki meʼa ʼaē neʼe nātou fai ʼi tanatou liliu ʼaē ki Selusalemi, ko te laga ʼo te fale lotu ʼo Sehova. Kae neʼe mole tuai pea neʼe fakagata e tonatou ʼu fili tanatou gāue. Koia neʼe hoki ʼosi tanatou laga te fale lotu ʼi te ʼosi ʼo taʼu e 22 ki tanatou liliu mai ki Selusalemi.

Ki muli age, ʼe tou vakaʼi anai te toe liliu mai ʼa Esitalasi ki Selusalemi moʼo fakamataleleiʼi te fale lotu. Neʼe kaku mai ia ia, ʼi te ʼosi ʼo taʼu e 47 ki te ʼosi laga ʼo te fale lotu. Pea hili kiai taʼu e 13, neʼe haʼu ia Nehemia ʼo tokoni ki te toe laga ʼo te ʼu kaupā ʼo Selusalemi. Ko te Faʼahi NIMA ʼe talanoa ki te ʼu taʼu e 152 ʼo te hisitolia.