ʼE Toe Liliu Ia Sesu Ki Selo

ʼI TE hoholo ʼo te ʼu ʼaho, neʼe hā liuliuga ia Sesu ki tana ʼu tisipulo. ʼI te tahi ʼaho neʼe sio te ʼu tisipulo e toko 500 kia te ia. ʼI te temi ʼaē neʼe hā ai kia nātou, ʼe koutou ʼiloʼi pe koteā te meʼa ʼaē neʼe talanoa age ki ai ia Sesu? Neʼe talanoa age kia nātou ʼo ʼuhiga mo te Puleʼaga ʼo te ʼAtua. Neʼe fekauʼi e Sehova ia Sesu ki te kele ke ina akoʼi ki te hahaʼi ia te Puleʼaga. Pea neʼe ina haga fai ia te meʼa ʼaia, māʼiape la ʼi te hili ʼo tona fakatuʼuake mai te kau mate.

ʼE koutou manatuʼi koa pe koteā te puleʼaga ʼo te ʼAtua? Ei, ko te Puleʼaga ʼaia ʼe ko te puleʼaga moʼoni ʼo te ʼAtua ʼaē ʼe ʼi selo, pea ko Sesu ʼaē neʼe fakanofo ke hau e te ʼAtua. Ohage ko te meʼa ʼaē neʼe tou vakaʼi, neʼe fakahā e Sesu ʼe ko he hau lelei anai ia ia, he neʼe ina fafaga te hahaʼi ʼaē neʼe fia kakai, mo ina fakamālōlō te kau mahaki, pea mo fakatuʼuake te kau mate!

Koia mokā hau anai ia Sesu ʼi selo ʼi te lolotoga ʼo taʼu e afe, ʼe feafeaʼi anai te kele? ʼE liliu anai te kele katoa ko he palatiso taulekaleka. ʼE mole toe ʼi ai anai he ʼu tau, pe ko he ʼu fakapō, pe ko he mahaki, pe ko te mate. ʼE tou ʼiloʼi ʼe hoko moʼoni anai te ʼu meʼa ʼaia, koteʼuhi neʼe fakatupu e te ʼAtua ia te kele ke liliu ko he palatiso ke maʼuli fiafia ai te hahaʼi. Ko te tupuʼaga la ʼaia ʼo tana fakatupu te ʼōloto ʼo Eteni ʼi te kamataʼaga. Pea ʼe tokaga anai ia Sesu ke hoko te finegalo ʼo te ʼAtua ʼo ʼuhiga mo te kele.

Kua hoko mai leva te temi ʼaē ʼe tonu ke toe liliu ai ia Sesu ki selo. Ia ʼaho e 40 neʼe hā ia Sesu ki tana ʼu tisipulo. Koia kua nātou ʼiloʼi papau kua maʼuli ia Sesu. Kae ʼi muʼa ʼo tana mavae ʼi tana kau tisipulo, neʼe ina ʼui age kia nātou: ‘Koutou nonofo ʼi Selusalemi ʼo aʼu ki te temi ʼaē ka koutou tali ai te laumālie maʼoniʼoni.’ Ko te laumālie maʼoniʼoni ʼe ko te mālohi gāue ʼo te ʼAtua, ʼe feala ke fakatatau ki te matagi, pea ʼe tokoni anai ki tana ʼu tisipulo ke nātou fai te finegalo ʼo te ʼAtua. Pea neʼe ʼui age e Sesu: ‘ ʼE tonu ke koutou fai faka mafola ʼo ʼuhiga mo ʼau ʼo aʼu ki te ʼu potu taupotu ʼo te kele.’

ʼI te ʼosi tala e Sesu te meʼa ʼaia, neʼe hoko te meʼa fakapunamaʼuli. Neʼe kamata hake ki selo, ohage ko te meʼa ʼaē ʼe koutou sio kiai ʼi te paki. Pea neʼe ʼaofi ia ia e te ʼao, pea neʼe mole kei feala te sio ʼa te kau tisipulo kia Sesu. Neʼe ʼalu ia Sesu ki selo, pea neʼe kamata pule ki tana ʼu tisipulo ʼi te kele.