Ko Te Kokelekasio Faka Kilisitiano ʼo Te ʼUluaki Sēkulō
ʼI te Penikosite ʼo te taʼu 33 ʼo totatou temi, neʼe fonu te toko 120 tisipulo ʼa Sesu ʼi te laumālie maʼoniʼoni, pea neʼe nātou palalau ʼi te ʼu lea kehekehe ʼo ʼuhiga mo te ʼu meʼa fakaofoofo ʼa te ʼAtua. Neʼe fakatupu ai te kokelekasio faka Kilisitiano. Neʼe papitema ai te toko 3 000 tisipulo foʼou ʼi te ʼaho pe ʼaia.—Gāue, kapite 2.
Ko te ʼu kokelekasio ʼo te ʼu koga meʼa kehekehe neʼe tuputupu ʼo kaugamālie tona ʼu hahaʼi, pea neʼe hoholo aipe te palalau ʼa te kau ʼapositolo pea mo ʼihi age ʼu Kilisitiano ki te Folafola ʼa te ʼAtua ʼaki te lototoʼa. Ohage pe ko tona fakamatala mai e te tohi Gāue, neʼe mole tuai pea aʼu te fai faka mafola ki te ʼu fenua ʼo te tai ko Metitelanea, ki Papiloni pea mo te Potu Tokelau ʼo Afelika, ki Loma pea lagi mo Sepania.—Loma 15:18-29; Kolose 1:23; 1 Petelo 5:13.
Ko te ʼu koga meʼa ʼaē neʼe liliu ai te hahaʼi ko he kau tisipulo, neʼe faʼufaʼu ai te ʼu kokelekasio. Neʼe fakanofo te ʼu tagata fakapotopoto ko he ʼu tagata ʼāfea, peʼe ko he ʼu tagata taupau, moʼo taupau maʼu ʼo te akonaki faitotonu pea mo te aga ʼaē ʼe lelei ʼi te ʼu kokelekasio. Kae ko te ʼu tagata ʼaia neʼe mole nātou faʼufaʼu he kalasi ʼo he kau takitaki lotu; ko nātou neʼe ko te ʼu minisi pea mo te ʼu kaugā gāue ki te Puleʼaga ʼo te ʼAtua.—Gāue 14:23; 20:28; 1 Kolonito 3:5; 5:13; Kolose 4:11; 1 Timoteo 3:1-15; Hepeleo 13:17; 1 Petelo 5:1-4.
Ko te kau ʼapositolo pea mo ʼihi ʼe kaugā gāue mo nātou, neʼe nātou faʼufaʼu te kolesi pule. Neʼe nātou takitaki te fai faka mafola. Neʼe nātou fakatokatoka te ʼu fihi neʼe malaga ʼi te kokelekasio ʼo Selusalemi. Neʼe nātou fekauʼi te ʼu tēhina fakapotopoto ki Samalia pea mo Atiokia, ke nātou fakaloto mālohiʼi ia nātou ʼaē ʼe foʼofoʼou ʼi te moʼoni. Neʼe nātou fakatokatoka te fihi ʼo ʼuhiga mo te silikosisio, ʼo nātou fakahā tanatou tonu ki te ʼu kokelekasio fuli ke nātou mulimuli kiai. Kae ko te ʼu tagata ʼaia neʼe mole nātou pule fakaʼaliki ki niʼihi, neʼe nātou gāue pea mo kaugā gāue mo te kokelekasio katoa.—Gāue 4:33; 6:1-7; 8:14-25; 11:22-24; 15:1-32; 16:4, 5; 1 Kolonito 3:5-9; 4:1, 2; 2 Kolonito 1:24.
Ko te ʼu ʼuluaki tisipulo neʼe ʼiloga ia nātou ko te kau Kilisitiano, pea neʼe fakahigoa feiā nātou e te ʼAtua. Ko tanatou ʼu akonaki neʼe kehekehe mo ʼihi age akonaki, koia neʼe ʼui ai ko te akonaki ʼa te kau ʼapositolo, peʼe ko te faʼifaʼitakiʼaga ʼo te ʼu palalau ʼaē ʼe ʼaoga. Ko te akonaki faka Tohi-Tapu ʼaia neʼe toe higoaʼi foki ko te moʼoni.—Soane 17:17; Gāue 2:42; 11:26; Loma 6:17; 1 Timoteo 4:6; 6:1, 3; 2 Timoteo 1:13; 2 Petelo 2:2; 2 Soane 1, 4, 9.
Ko te kau Kilisitiano neʼe nātou faʼufaʼu te kautahi faka malamanei ʼo te ʼu tēhina ʼe nātou logo tahi ʼi te ʼofa. Neʼe nātou fakahā tanatou tokaga ki tonatou ʼu kaugā fagona ʼi te tui ʼo te tahi ʼu fenua. Ka nātou folau ki he tahi fenua, neʼe tali ia nātou ʼe tonatou ʼu kaugā fagona ʼi te tui ʼi ʼonatou ʼapi. Neʼe nātou taupau maʼu te lekula māʼoluga ʼo ʼuhiga mo te aga ʼaē ʼe tonu ke fai, mai tona ʼaluʼaga ʼaē, ko nātou ko te hahaʼi maʼoniʼoni ʼe nātou mavae kehe mai te malamanei. Neʼe mole galo ia nātou te temi ʼaē ʼe hoko ai anai te ʼaho ʼo Sehova pea ʼaki tanatou fakamalotoloto, neʼe nātou fakahā tanatou tui ki te hahaʼi. —Soane 13:34, 35; 15:17-19; Gāue 5:42; 11:28, 29; Loma 10:9, 10, 13-15; Tito 2:11-14; Hepeleo 10:23; 13:15; 1 Petelo 1:14-16; 2:9-12; 5:9; 2 Petelo 3:11-14; 3 Soane 5-8.
Kae, ohage ko tona fakakikite, neʼe kamata tuputupu te ʼapositasia lahi, ʼi te lua pea mo te tolu sēkulō. Neʼe lahi te ʼu tuʼu faka lotu neʼe tupu mai ai, ʼo mole nātou taupau maʼu te aga maʼa ʼo te ʼuluaki kokelekasio faka Kilisitiano ʼi te ʼu akonaki, ʼi te aga, ʼi te kautahi, pea mo te tuʼulaga ʼaē ʼo ʼuhiga mo te malamanei.—Mateo 13: 24-30, 37-43; 2 Tesalonika, kapite 2.
Kae, ohage ko tona fakakikite e Sesu, ʼe toe fakatuʼu anai te tauhi moʼoni ʼi te fakaʼosi ʼo te tuʼu ʼo te ʼu faʼahiga meʼa. ʼE tui te kau Fakamoʼoni ʼa Sehova ko te fakatuʼu ʼo te tauhi moʼoni ʼe ʼiloga ʼi tanatou ʼu gāue faka malamanei ʼi totatou temi, ʼi te hili ʼo te ʼu taʼu e 1 900 ki te lea faka polofeta ʼa Sesu. Ko te ʼu pasina ʼe hoa mai ʼe nātou fakamoʼoni anai ki te faʼahi ʼaia.
• Neʼe feafeaʼi te fakatupu ʼo te kokelekasio faka Kilisitiano, pea neʼe feafeaʼi tana tuputupu?
• Neʼe feafeaʼi te takitaki ʼo te kokelekasio ʼaia?
• Koteā te ʼu meʼa ʼaē neʼe kehekehe ai te kau Kilisitiano ʼo te ʼuluaki sēkulō mo te tahi age hahaʼi?
[Mape]
(Vakaʼi te nusipepa)
[Paki ʼo te pasina 7]
Ko te ʼu ʼuluaki Kilisitiano neʼe nātou faka mafola te Folafola ʼa te ʼAtua ʼaki te lototoʼa
Neʼe tali te kau Kilisitiano ʼi te ʼu ʼapi ʼo tonatou ʼu kaugā fagona ʼi te tui ʼi te koga meʼa ʼaē neʼe nātou fagona kiai
Te ʼu koga meʼa neʼe aʼu kiai te logo lelei ʼi te ʼuluaki sēkulō
Ko ʼihi ʼi te ʼu koga meʼa ʼaia neʼe nātou liliu ko te hahaʼi tui