Ko Te Kau Pionie ʼe Nātou Taki Ia Te Gāue Faka Mafola
E lagi ko te ʼuluaki Fakamoʼoni ʼa Sehova ʼaē neʼe ina ʼaʼahi koutou neʼe ko he pionie peʼe ko he misionea. Mai tona ʼaluʼaga ʼaē, ko te kau Fakamoʼoni ʼa Sehova ʼe mole totogi tonatou minisitelio, e lagi ʼe koutou fia ʼiloʼi anai peʼe feafeaʼi te kau ʼa te hahaʼi ʼaia ki te minisitelio ʼi te temi fuli.
Ko te kau Fakamoʼoni fuli ʼa Sehova ʼaē kua foaki tonatou maʼuli ki te ʼAtua pea mo nātou papitema, ʼe ko te ʼu minisi, kae tokolahi ia nātou ʼe ʼi ai tonatou ʼu maʼua faka famili peʼe ko he tahi age ʼu maʼua, ʼe feala ke siʼisiʼi ai tonatou ʼu hola ʼaē ʼe nātou fakaʼaogaʼi ʼi te vāhaʼa ʼi tonatou minisitelio. Kae, ko te ʼu lauʼi afe kau Fakamoʼoni ʼi te malamanei neʼe nātou fakasiʼisiʼi tonatou faʼahiga maʼuli, ke feala hanatou gāue vaeluaʼi temi pea ke nātou fai te ʼu hola e 1 000 peʼe laka atu ʼi te taʼu ʼi te minisitelio.
ʼE moʼoni, ko te kau pionie ʼe fai faka mafola ʼi te temi fuli ʼe mole lahi hanatou falā ke nātou fakaʼaogaʼi maʼa nātou, kae ʼe nātou tokagaʼi ko te faʼahi ʼaia ʼe nātou ʼuluaki kumi ai muʼa te Puleʼaga ʼo te ʼAtua. Pea ʼe nātou maʼu ai te ʼu tapuakina lahi. Ko te ʼalu ʼo palalau ki niʼihi ʼo ʼuhiga mo te Folafola ʼa te ʼAtua ʼi te ʼu hola e 90 ʼi te māhina ʼe ko he meʼa lelei ia kia nātou. Ko te pionie ʼaē ʼe fai faka mafola ʼi te temi fuli ʼe ina fakatuputupu tona poto lelei ʼi te minisitelio, pea ʼe ina toe maʼu ai foki mo te temi ke ina ʼaʼahi te hahaʼi ʼaē ʼe fia logo ki te moʼoni. ʼE nātou maʼu te ʼu fua ʼe fakatupu loto mālohi. ʼE nātou maʼu te ʼu meʼa ʼaē ʼe ʼaoga ʼi te faʼahi fakasino, pea ʼe nātou leleiʼia ʼaupito te meʼa ʼaē ʼe nātou maʼu.—Mateo 6:33.
ʼI Fepualio 1943, neʼe fakatuʼu e te Sosiete Watch Tower te Ako faka Tohi-Tapu ʼo Kalaate. Ko te fakatuʼutuʼu ʼaia moʼo ako ʼo he ʼu pionie ke nātou gāue ko he kau misionea ʼi he tahi ʼu fenua. Ko te ako ʼaia ʼe fai lolotoga māhina e nima pea ʼe fakatafito ki te ako ʼo te Tohi-Tapu, mo te hisitolia faka Tohi-Tapu, mo te kautahi ʼa Sehova, pea mo te ʼu akonaki ʼe ʼaoga moʼo teuteuʼi ʼo te gāue ʼi he tahi fenua.
ʼE totogi e te Sosiete te feʼaluʼaki ʼa te misionea ʼo aʼu ki te telituale ʼaē neʼe hinoʼi ke ʼalu kiai pea mo foaki ki ai tana meʼa kai pea mo tona nofoʼaga ʼi he ʼapi ʼo te kau misionea. ʼE ina toe foaki foki ki te kau misionea takitokotahi te kiʼi foʼi falā moʼo huʼi ʼo te falā ʼaē neʼe nātou fakaʼaogaʼi ki te ʼu meʼa ʼaē ʼe ʼaoga kia nātou. Ko te kau misionea ʼe nātou fefakahoahoaʼaki te fai ʼo te ʼu gāue ʼo tonatou ʼapi, te fai fakatau, te teuteuʼi ʼo te meʼa kai, pea mo te fakamaʼa. ʼAki te fakatuʼutuʼu fakapotopoto ʼaia ʼe faka fealagia ai ki te kau misionea ke nātou fai te ʼu hola e 140 ʼi te māhina ʼi te fai faka mafola, pea mo te ʼu ako faka Tohi-Tapu mo te hahaʼi ʼaē ʼe fia logo ki te moʼoni.
Tokolahi ʼi te kau misionea ʼaia neʼe fekauʼi ki he koga meʼa ʼe lauʼi afe kilometa tona mamaʼo mo tonatou ʼapi pea mo tonatou famili. Neʼe nātou fakamāmāhani ai ki te faʼahiga maʼuli pea mo te agaʼi fenua, mo te ʼu aga foʼou ʼo ʼuhiga mo te meʼa kai pea mo he koga meʼa ʼe kehe tona ʼaele mo te koga meʼa ʼe nātou ʼōmai mai ai, pea mo te ako ʼo he tahi lea. Neʼe nātou fai te gāue ʼaia koteʼuhi ʼe nātou ʼoʼofa ki te hahaʼi pea ʼe nātou loto ʼaupito ke nātou tokoni ki te hahaʼi ʼaia ke nātou ʼiloʼi te Puleʼaga ʼo te ʼAtua.
Mai te taʼu 1943 ki te 1993, neʼe akoʼi e te Ako faka Tohi-Tapu ʼo Kalaate te ʼu kalasi e 96 pea neʼe ina fekauʼi ki te tahi ʼu fenua te ʼu misionea e 6 500 tupu. ʼAki te takitaki ʼa te Sosiete, neʼe tupu mai ia nātou te mafola ʼo te gāue ʼo te ako faka Tohi-Tapu ʼi Afelika, ʼi Amelika Latina pea mo tona Potu Toga, ʼi Asia, pea mo te Potu Toga ʼo te Pasifika, pea neʼe nātou toe fai te gāue lahi ʼi te Eulopa.
Ko te kau Fakamoʼoni ʼa Sehova ʼaē ʼe nātou hū ki te minisitelio ʼo gāue ko te ʼu pionie katoa peʼe ko te ʼu misionea peʼe ko te ʼu pionie vaeluaʼi temi, ʼe mole totogi ia nātou. ʼE nātou foaki tonatou temi pea mo tanatou falā, pea mo tonatou mālohi, moʼo tokoni ki niʼihi ke nātou maʼu te mālama ʼaē ʼe ina taki ki te maʼuli heʼegata.—Soane 17:3.
• E feafeaʼi te lavaʼi e ʼihi kau Fakamoʼoni ʼa Sehova ke nātou kau ki te minisitelio fai faka mafola ʼi te temi fuli, pea koteā te tupuʼaga ʼo tanatou fai te faʼahi ʼaia?
• Ko te ako feafeaʼi ʼaē ʼe fai ki te ʼu minisi ʼo ʼuhiga mo te gāue faka misionea?
• Neʼe feafeaʼi te tokoni ki te kau misionea ʼi tonatou telituale?
[Paki ʼo te pasina 22]
ʼI te faʼahi hema: Ko te kalasi ʼo te Ako ʼo Kalaate, ʼi Brooklyn, N.Y., ʼi Amelika
ʼI te faʼahi mataʼu: Ko te misionea ʼe ina ako te Folafola ʼa te ʼAtua ki te hahaʼi ʼi Niu Kini
Paki ʼo te pasina 23]
Ko te kau pionie pea mo te kau misionea ʼe nātou faka mafola te Folafola ʼa te ʼAtua ʼi te ʼu fenua kehekehe
Pelesile
Lepupilika Tominika
Sepania
Siela Leone, ʼi Afelika