ʼE Nātou Fafaga Te Faga Ōvi ʼa Te ʼAtua ʼi Te Logo Tahi
ʼE ʼui fēnei e ʼihi: ‘E feafeaʼi koa te taki ʼo te kokelekasio ʼa te kau Fakamoʼoni ʼa Sehova ʼi te malamanei?’ ʼE tou tali fēnei: Ko te fakatuʼutuʼu ʼo te takitaki ʼe mulimuli ki te faʼifaʼitaki ʼo te kokelekasio faka Kilisitiano ʼo te ʼuluaki sēkulō.
ʼI te ʼu taʼu 1870 ko Charles T. Russell pea mo tana ʼu kaugā gāue neʼe nātou fakatuʼutuʼu ke nātou faka mafola te ʼu fua ʼo tanatou ako ʼo te Tohi-Tapu ʼaki te ʼu akonaki pea mo te ʼu tohi. ʼI te fenua ʼaia, ko nātou ʼaē neʼe nātou fakatuʼutuʼu ke nātou kau ki te gāue ʼaia neʼe nātou fakatokagaʼi ko Russell pea mo tana ʼu kaugā gāue, ko he kūtuga ʼe lahi ʼaupito tonatou poto ʼi te gāue ʼa te ʼAliki pea ʼe feala ke nātou kumi tokoni ki te kūtuga ʼaia ʼo ʼuhiga mo tanatou ʼu gāue.
ʼI te taʼu 1884 ko te Zion’s Watch Tower Tract Society neʼe fakatuʼutuʼu ʼo mulimuli ki te ʼu lao ʼo Pennsylvanie katoa. Ko Russell pea mo tana ʼu kaugā gāue tāfito, neʼe nātou takitaki ia te Sosiete ʼo feiā aipe ki te ʼu gāue ʼa te kau Ako ʼo te Tohi-Tapu. ʼI te taʼu 1909 neʼe hiki tonatou fale lahi ki Brooklyn, ʼi New York. ʼI te hoholo ʼo te ʼu taʼu, ko te kau tagata takitaki ʼo te Sosiete Watch Tower pea mo ʼihi kaugā gāue, ʼaē ʼe nātou maʼu te ʼu kalitate ʼaē ʼe tonu ke maʼu ʼi te faʼahi fakalaumālie, pea ko nātou ko te ʼu tagata neʼe fakanofo, neʼe nātou faʼufaʼu te kolesi pule ʼa te kau Fakamoʼoni ʼa Sehova.
Ko te Kolesi Pule ʼe faʼufaʼu e te kūtuga ʼo te kau Kilisitiano fakanofo (ko te toko 11 ʼi te taʼu 1994), ko te toko 7 ʼo nātou ʼe kau ki te komite takitaki ʼo te Sosiete Watch Tower. ʼE nātou takitaki te gāue faka malamanei ʼa te kau Fakamoʼoni ʼa Sehova. ʼI te mole foaki fakahagatonu age e Sehova kia nātou te lea, ʼe feala pe ke nātou faihala, kae ʼe nātou falanaki ki te Folafola ʼa te ʼAtua ʼaē ʼe mole feala ke faihala, ʼaē ko te pule māʼoluga ʼi te kele, pea ʼe nātou maʼu te poto ʼi tonatou maʼuli katoa ʼi tanatou lagolago ki te finegalo ʼo te ʼAtua. Neʼe nātou gāue takitahi ʼi te minisitelio fai faka mafola ʼi te temi katoa pea mo te kau Fakamoʼoni ʼa Sehova ʼi he ʼu taʼu e 50 peʼe laka age.
Ko te Kolesi Pule ʼe ina takitaki te tā ʼo te ʼu tohi ʼa te Sosiete. Ko te ʼu tohi ʼaē ʼe fai ʼe fakatafito ki te ʼu meʼa ʼe ʼaoga ʼi te faʼahi fakalaumālie ki te faga ōvi, pea ko te ʼu tohi, ʼe ko te fua ia ʼo te faikole pea mo te ako fakalelei pea mo te kumi ʼe fai ʼi te Folafola ʼa te ʼAtua. Ko te ʼu tagata ʼaia ʼe nātou ako tuʼumaʼu te Tohi-Tapu, ʼo nātou vakaʼi te hoko ʼo te finegalo ʼo te ʼAtua, te hoko ʼo te lea faka polofeta ʼi te malamanei, pea mo te tuʼulaga ʼo te hahaʼi ʼa te ʼAtua ʼi te mālama, e lagi ʼi he tahi temi neʼe ʼaoga ke nātou fai he ʼu fetogi ʼo ʼuhiga mo te mālama ʼaē ki niʼihi ʼu akonaki. Koia, ko te mālama ki te moʼoni neʼe toe ʼāsili age ai tona lahi.—Pesalemo 97:11; Tāʼaga Lea 4:18; Taniela 12:4.
ʼI te ʼu filiale e 100 ʼi te kele katoa, neʼe fakatuʼu e te Kolesi Pule te ʼu Komite ʼo te Filiale ʼe faʼufaʼu e te ʼu tēhina e toko tolu peʼe laka atu ʼe nātou maʼu te fakapotopoto ʼi te faʼahi fakalaumālie, ke nātou fakasiosio te ʼu gāue ʼi te ʼu fenua e 232 pea mo te ʼu motu. Ko te ʼu filiale ʼe felogoi mo te ʼu kokelekasio ʼaē ʼe nātou takitaki. Ko te Kolesi Pule ʼe faka felogoi tuʼumaʼu mo te ʼu komite ʼo te ʼu filiale, pea ko te ʼu tēhina ʼo te Kolesi Pule, ʼe nātou ʼaʼahi ʼi te taʼu fuli te ʼu filiale ke feala ai hanatou ʼiloʼi te ʼaluʼaga ʼo te ʼu filiale.
Ko te ʼu tagata ʼaia ʼe mole nātou puleʼi te tui ʼa ʼihi, kae ko nātou ko te ʼu minisi ʼe nātou gāue kinakina ke feala ai he ʼiloʼi e he tokolahi te Folafola ʼa te ʼAtua. ʼE mole nātou faiga ki he totogi, kae ʼe foaki kia nātou te ʼu meʼa ʼaē ʼe ʼaoga ki tonatou maʼuli ohage pe ko nātou ʼaē ʼe nonofo ʼi te Petele. Ko tanatou gāue agatonu ʼe ʼiloga lelei ʼi te fakamalotoloto, mo te logo tahi, pea mo tanatou faka maʼuhiga te ʼu lekula ʼo ʼuhiga mo te aga ʼaē ʼe tonu ke fai, pea mo tanatou pipiki ʼaē ki te ʼu akonaki faka Tohi-Tapu ʼaē ʼe fakahā e te kau Fakamoʼoni ʼa Sehova ʼi te malamanei katoa.—1 Kolonito 3:5-9; 4:1, 2; 2 Kolonito 1:24; 3:1-3; 1 Petelo 5:2, 3.
• E feafeaʼi te takitaki ʼo te kokelekasio?
• Ko ai koa ʼaē ʼe ina faʼufaʼu ia ʼaho nei te Kolesi Pule, pea koteā tonatou ʼu maʼua?
• E feafeaʼi te takitaki ʼo te gāue ʼi te tahi ʼu fenua?
[Talanoa ʼo te pasina 26]
(Vakaʼi te nusipepa)
Te ʼu fenua ʼe fai ai te finegalo ʼo te ʼAtua
[Talanoa ʼo te pasina 26]
Te ʼu pelesita ʼo te Sosiete Watch Tower ʼi muʼa atu
C. T. Russell, 1884-1916
J. F. Rutherford, 1917-1942
N. H. Knorr, 1942-1977
F. W. Franz, 1977-1992
[Talanoa ʼo te pasina 27]
Ko niʼihi filiale ʼi te ʼu filiale e 100 ʼaē ʼe fakatuʼutuʼu ai te gāue ʼa te kau Fakamoʼoni ʼa Sehova
Kanata
Zambie
Siamani
Saponia
Ositalalia
Pelesile