Te Fakahoko ʼo Te Gāue ʼAki Te ʼu Meʼa ʼOfa

Ko te ʼu gāue fuli ʼaenī neʼe tou talanoa kiai ʼe fakahoko e te hahaʼi ʼe nātou gāue ʼi tonatou lotolelei, koia la ʼaē ʼe mole totogi kovi ai te ʼu tohi. Ko te minisitelio ʼi te ʼu ʼapi pea mo te tufa ʼo te ʼu tohi ʼe fai e te kau Fakamoʼoni ʼa Sehova ʼi tonatou lotolelei. ʼE nātou totogi pe tanatou ʼu tohi. Ko te ʼu tagata ʼāfea ʼaē ʼe nātou takitaki te ʼu kokelekasio, ʼo tokoni kiai te ʼu tagata faifekau faka minisitelio, ʼe mole totogi tanatou gāue. ʼE nātou totogi pe te ʼu meʼa ʼaē ʼe ʼaoga kia nātou.

ʼO toe feiā aipe mo nātou ʼe kau ki te Kolesi Pule pea mo nātou fuli ʼaē ʼe gāue ʼi te temi fuli ʼi te kele katoa ki te teuteuʼi ʼo te ʼu Tohi-Tapu pea mo te ʼu tohi faka Tohi-Tapu, ʼe foaki kia nātou tonatou koga fale pea mo tanatou meʼa kai pea mo he kiʼi foʼi falā moʼo huʼi ʼo te falā ʼaē neʼe nātou fakaʼaogaʼi ki te ʼu meʼa ʼaē ʼe ʼaoga kia nātou. Ko te meʼa pe foki ʼaia ʼe hoko ki te ʼu taupau feʼaluʼaki.

Ko ʼatatou ʼu tohi neʼe tā moʼo tokoni ki te hahaʼi ʼaē ʼe fia logo moʼoni ki te Tohi-Tapu. Ko te totogi ʼo ʼihi meʼa ohage ko te tā ʼo te ʼu tohi, pea mo te fetuku tohi ʼe fai ʼaki te ʼu meʼa ʼofa ʼo te hahaʼi ʼaē ʼe fia fai ki te moʼoni, peʼe te ʼu tōfiga ʼaē ʼe foaki totonu pe e te kau Fakamoʼoni ʼa Sehova.

ʼI te ʼu fono fuli ʼa te kau Fakamoʼoni ʼa Sehova, peʼe ʼi te kokelekasio peʼe ʼi te ʼu fakatahi, ʼe ʼi ai te ʼu kesi tukuʼaga meʼa ʼofa, ʼe ko he faigamālie ʼaia kia nātou ʼaē ʼe nātou fia foaki hanatou meʼa ʼofa. ʼE mole ʼi ai he tae falā. ʼE mole fakamaʼuaʼi he time peʼe ko he tānaki falā. Ohage pe ko tona ʼui mai ʼi te Tohi-Tapu, ʼe feala ke tahi foaki e te hahaʼi ʼo mulimuli pe ki te meʼa ʼaē kua ina fakapapau ʼi tona loto.—2 Kolonito 8:12; 9:7.

• E feafeaʼi koa te lagolago paʼaga ki te gāue ʼa te kau Fakamoʼoni ʼa Sehova?